Mattee 3

yaheya baptisma denay vaalay kee khidmat

¹un dinon men yaheya baptisma denay vaala aaya aur yahoodiya kay registaan men elaan karnay laga, ²“tauba karo, kyoonki aasmaan kee baadshaahee qareeb a gaee hai.” ³yaheya vahee hai jis kay baaray men yasaayaah nabee nay farmaaya, ‘registaan men ek aavaaz pukaar rahee hai, rabb kee raah tayyaar karo! us kay raastay seedhay banaao.’

⁴yaheya oonton kay baalon ka libaas pahenay aur kamar par chamday ka patka baandhay raheta tha. khuraak kay taur par vah tiddiyaan aur janglee shahed khaata tha. ⁵log yarooshalam, pooray yahoodiya aur darya-ay-yardan kay pooray ilaaqay say nikal kar us kay paas aaay. ⁶aur apnay gunaahon ko tasleem karkay unhon nay darya-ay- yardan men yaheya say baptisma liya.

⁷bahut say fareesee aur sadooqee bhee vahaan aaay jahaan vah baptisma day raha tha. unhen dekh kar us nay kaha, “ai zahereelay saamp kay bachcho! kis nay tumhen aanay vaalay ghazab say bachnay kee hidaayat kee? ⁸apnee zindagee say zaahir karo ki tum nay vaaqaee tauba kee hai. ⁹yah khayaal mat karo ki ham to bach jaaengay kyoonki ibraaheem hamaara baap hai. main tum ko bataata hoon ki allaah in pattharon say bhee ibraaheem kay liyay aulaad paida kar sakta hai. ¹⁰ab to adaalat kee kulhaadee darakhton kee jadon par rakhee huee hai. har darakht jo achchha phal na laaay kaata aur aag men jhonka jaaega. ¹¹main to tum tauba karnay vaalon ko paanee say baptisma deta hoon, lekin ek aanay vaala hai jo mujh say bada hai. main us kay jooton ko uthaanay kay bhee laaiq naheen. vah tumhen rooh-ul-quds aur aag say baptisma dega. ¹²vah haath men chhaaj pakday huay anaaj ko bhoosay say alag karnay kay liyay tayyaar khada hai. vah gaahanay kee jagah bilkul saaf karkay anaaj ko apnay godaam men jama karega. lekin bhoosay ko vah aisee aag men jhonkega jo bujhnay kee naheen.”

eesa ka baptismaa

¹³phir eesa galeel say darya-ay-yardan kay kinaaray aaya taaki yaheya say baptisma lay. ¹⁴lekin yaheya nay usay roknay kee koshish karkay kaha, “mujhay to aap say baptisma lenay kee zaroorat hai, to phir aap meray paas kyoon aaay hain?”

¹⁵eesa nay javaab diya, “ab honay hee day, kyoonki munaasib hai ki ham yah kartay huay allaah kee raast marzee pooree karen ^[a] lafzee tarjuma : ham tamaam raastbaazee pooree karen. .” is par yaheya maan gaya.

¹⁶baptisma lenay par eesa fauran paanee say nikla. usee lamhay aasmaan khul gaya aur us nay allaah kay rooh ko dekha jo kabootar kee tarah utar kar us par thaher gaya. ¹⁷saath saath aasmaan say ek aavaaz sunaaee dee, “yah mera piyaara farzand hai, is say main khush hoon.”

Yoohanna 1

allaah ka lelaa

²⁹aglay din yaheya nay eesa ko apnay paas aatay dekha. us nay kaha, “dekho, yah allaah ka lela hai jo duniya ka gunaah utha lay jaata hai. ³⁰yah vahee hai jis kay baaray men main nay kaha, ‘ek meray baad aanay vaala hai jo mujh say bada hai, kyoonki vah mujh say pahelay tha.’ ³¹main to usay naheen jaanta tha, lekin main is liyay a kar paanee say baptisma denay laga taaki vah israaeel par zaahir ho jaaay.”

³²aur yaheya nay yah gavaahee dee, “main nay dekha ki rooh-ul-quds kabootar kee tarah aasmaan par say utar kar us par thaher gaya. ³³main to usay naheen jaanta tha, lekin jab allaah nay mujhay baptisma denay kay liyay bheja to us nay mujhay bataaya, ‘too dekhega ki rooh-ul-quds utar kar kisee par thaher jaaega. yah vahee hoga jo rooh-ul-quds say baptisma dega.’ ³⁴ab main nay dekha hai aur gavaahee deta hoon ki yah allaah ka farzand hai.”