Mattee 4

eesa ko aazmaaya jaata hai

1phir rooh-ul-quds eesa ko registaan men lay gaya taaki usay iblees say aazmaaya jaaay. 2chaalees din aur chaalees raat roza rakhnay kay baad usay aakhirkaar bhook lagee. 3phir aazmaanay vaala us kay paas a kar kahenay laga, “agar too allaah ka farzand hai to in pattharon ko hukm day ki rotee ban jaaen.”

4lekin eesa nay inkaar karkay kaha, “hargiz naheen, kyoonki kalaam-ay-muqaddas men likha hai ki insaan kee zindagee sirf rotee par munhasir naheen hotee balki har us baat par jo rabb kay munh say nikaltee hai.”

5is par iblees nay usay muqaddas shaher yarooshalam lay ja kar bait-ul-muqaddas kee sab say oonchee jagah par khada kiya aur kaha, 6“agar too allaah ka farzand hai to yahaan say chhalaang laga day. kyoonki kalaam-ay-muqaddas men likha hai, ‘vah teree khaatir apnay farishton ko hukm dega, aur vah tujhay apnay haathon par utha lengay taaki teray paaon ko patthar say thes na lagay’.”

7lekin eesa nay javaab diya, “kalaam-ay-muqaddas yah bhee farmaata hai, ‘rabb apnay khuda ko na aazmaana’.”

8phir iblees nay usay ek nihaayat oonchay pahaad par lay ja kar usay duniya kay tamaam mamaalik aur un kee shaan-o-shaukat dikhaaee. 9vah bola, “yah sab kuchh main tujhay day doonga, shart yah hai ki too gir kar mujhay sijda karay.”

10lekin eesa nay teesree baar inkaar kiya aur kaha, “iblees, dafa ho ja! kyoonki kalaam-ay-muqaddas men yoon likha hai, ‘rabb apnay khuda ko sijda kar aur sirf usee kee ibaadat kar’.”

11is par iblees usay chhod kar chala gaya aur farishtay a kar us kee khidmat karnay lagay.