Looqa 5

maflooj kay liyay chhat kholee jaatee hai

¹⁷ek din vah logon ko taaleem day raha tha. fareesee aur shareeat kay aalim bhee galeel aur yahoodiya kay har gaaon aur yarooshalam say a kar us kay paas baithay thay. aur rabb kee qudrat usay shifa denay kay liyay tahereek day rahee thee. ¹⁸itnay men kuchh aadmee ek maflooj ko chaarpaaee par daal kar vahaan pahunchay. unhon nay usay ghar kay andar eesa kay saamnay rakhnay kee koshish kee, ¹⁹lekin befaaida. ghar men itnay log thay ki andar jaana naamumkin tha. is liyay vah aakhirkaar chhat par chadh gaay aur kuchh taaylen udhed kar chhat ka ek hissa khol diya. phir unhon nay chaarpaaee ko maflooj samet hujoom kay darmiyaan eesa kay saamnay utaara. ²⁰jab eesa nay un ka eemaan dekha to us nay maflooj say kaha, “ai aadmee, teray gunaah muaaf kar diay gaay hain.”

²¹yah sun kar shareeat kay aalim aur fareesee soch-bichaar men pad gaay, “yah kis tarah ka banda hai jo is qism ka kufr bakta hai? sirf allaah hee gunaah muaaf kar sakta hai.”

²²lekin eesa nay jaan liya ki yah kya soch rahay hain, is liyay us nay poochha, “tum dil men is tarah kee baaten kyoon soch rahay ho? ²³kya maflooj say yah kahena ziyaada aasaan hai ki ‘teray gunaah muaaf kar diay gaay hain’ ya yah ki ‘uth kar chal phir’? ²⁴lekin main tum ko dikhaata hoon ki ibn-ay-aadam ko vaaqaee duniya men gunaah muaaf karnay ka ikhtiyaar hai.” yah kah kar vah maflooj say mukhaatib hua, “uth, apnee chaarpaaee utha kar apnay ghar chala ja.”

²⁵logon kay dekhtay dekhtay vah aadmee khada hua aur apnee chaarpaaee utha kar allaah kee hamd-o-sana kartay huay apnay ghar chala gaya. ²⁶yah dekh kar sab sakht hairatzada huay aur allaah kee tamjeed karnay lagay. un par khauf chha gaya aur vah kah uthay, “aaj ham nay naaqaabil-ay-yaqeen baaten dekhee hain.”