Marqus 4

eesa aandhee ko thama deta hai

³⁵us din jab shaam huee to eesa nay apnay shaagirdon say kaha, “aao, ham jheel kay paar chalen.” ³⁶chunaanchay vah bheed ko rukhsat karkay usay lay kar chal paday. baaz aur kashtiyaan bhee saath gaeen. ³⁷achaanak sakht aandhee aaee. laheren kashtee say takra kar usay paanee say bharnay lageen, ³⁸lekin eesa abhee tak kashtee kay pichhlay hissay men apna sar gaddee par rakhay so raha tha. shaagirdon nay usay jaga kar kaha, “ustaad, kya aap ko parva naheen ki ham tabaah ho rahay hain?”

³⁹vah jaag utha, aandhee ko daanta aur jheel say kaha, “khaamosh! chup kar!” is par aandhee tham gaee aur laheren bilkul saakit ho gaeen. ⁴⁰phir eesa nay shaagirdon say poochha, “tum kyoon ghabraatay ho? kya tum abhee tak eemaan naheen rakhtay?” ⁴¹un par sakht khauf taaree ho gaya aur vah ek doosray say kahenay lagay, “aakhir yah kaun hai? hava aur jheel bhee us ka hukm maantee hain.”