Paidaaish 2
aadam aur havvaa
4yah aasmaan-o-zameen kee takhleeq ka bayaan hai. jab rabb khuda nay aasmaan-o-zameen ko banaayaa 5to shuroo men jhaadiyaan aur pauday naheen ugtay thay. vajah yah thee ki allaah nay baarish ka intizaam naheen kiya tha. aur abhee insaan bhee paida naheen hua tha ki zameen kee kheteebaadee karta. 6is kee bajaay zameen men say dhund uth kar us kee pooree satah ko tar kartee thee. 7phir rabb khuda nay zameen say mittee lay kar insaan ko tashkeel diya aur us kay nathnon men zindagee ka dam phoonka to vah jeetee jaan hua.
8rabb khuda nay mashriq men mulk-ay-adan men ek baagh lagaaya. us men us nay us aadmee ko rakha jisay us nay banaaya tha. 9rabb khuda kay hukm par zameen men say tarah tarah kay darakht phoot niklay, aisay darakht jo dekhnay men dilkash aur khaanay kay liyay achchhay thay. baagh kay beech men do darakht thay. ek ka phal zindagee bakhshta tha jabki doosray ka phal achchhay aur buray kee pahechaan dilaata tha. 10adan men say ek darya nikal kar baagh kee aabpaashee karta tha. vahaan say bah kar vah chaar shaakhon men taqseem hua. 11-12pahelee shaakh ka naam feesoon hai. vah mulk-ay-haveela ko gheray huay bahetee hai jahaan khaalis sona, googal ka goond aur aqeeq-ay-ahmar [a] charanelianpaaay jaatay hain.13doosree ka naam jaihoon hai jo koosh ko gheray huay bahetee hai. 14teesree ka naam dijla hai jo asoor kay mashriq ko jaatee hai aur chauthee ka naam furaat hai.
15rabb khuda nay pahelay aadmee ko baagh-ay-adan men rakha taaki vah us kee baaghbaanee aur hifaazat karay. 16lekin rabb khuda nay usay aagaah kiya, “tujhay har darakht ka phal khaanay kee ijaazat hai. 17lekin jis darakht ka phal achchhay aur buray kee pahechaan dilaata hai us ka phal khaana mana hai. agar usay khaaay to yaqeenan marega.”
18rabb khuda nay kaha, “achchha naheen ki aadmee akela rahay. main us kay liyay ek munaasib madadgaar banaata hoon.”
19rabb khuda nay mittee say zameen par chalnay phirnay vaalay jaanvar aur hava kay parinday banaaay thay. ab vah unhen aadmee kay paas lay aaya taaki maaloom ho jaaay ki vah un kay kya kya naam rakhega. yoon har jaanvar ko aadam kee taraf say naam mil gaya. 20aadmee nay tamaam maveshiyon, parindon aur zameen par phirnay vaalay jaandaaron kay naam rakhay. lekin usay apnay liyay koee munaasib madadgaar na mila.
21tab rabb khuda nay usay sula diya. jab vah gaheree neend so raha tha to us nay us kee pasliyon men say ek nikaal kar us kee jagah gosht bhar diya. 22paslee say us nay aurat banaaee aur usay aadmee kay paas lay aaya. 23usay dekh kar vah pukaar utha, “vaah! yah to mujh jaisee hee hai, meree haddiyon men say haddee aur meray gosht men say gosht hai. is ka naam naaree rakha jaaay kyoonki vah nar say nikaalee gaee hai.” 24is liyay mard apnay maan-baap ko chhod kar apnee beevee kay saath paivast ho jaata hai, aur vah donon ek ho jaatay hain. 25donon, aadmee aur aurat nangay thay, lekin yah un kay liyay sharm ka baais naheen tha.