Paidāish 2
ādam aur havvā
4yah āsmān-o-zamīn kī taḵẖlīq kā bayān hai. jab rabb ḵẖudā ne āsmān-o-zamīn ko banāyā 5to shurū meṅ jhāṛiyāṅ aur paude nahīṅ ugte the. vajah yah thī ki allāh ne bārish kā intizām nahīṅ kiyā thā. aur abhī insān bhī paidā nahīṅ huā thā ki zamīn kī khetībāṛī kartā. 6is kī bajāy zamīn meṅ se dhund uṭh kar us kī pūrī satah ko tar kartī thī. 7phir rabb ḵẖudā ne zamīn se miṭṭī le kar insān ko tashkīl diyā aur us ke nathnoṅ meṅ zindagī kā dam phūṅkā to vah jītī jān huā.
8rabb ḵẖudā ne mashriq meṅ mulk-e-adan meṅ ek bāġ lagāyā. us meṅ us ne us ādmī ko rakhā jise us ne banāyā thā. 9rabb ḵẖudā ke hukm par zamīn meṅ se tarah tarah ke daraḵẖt phūṭ nikle, aise daraḵẖt jo dekhne meṅ dilkash aur khāne ke liye acchhe the. bāġ ke bīch meṅ do daraḵẖt the. ek kā phal zindagī baḵẖshtā thā jabki dūsre kā phal acchhe aur bure kī pahachān dilātā thā. 10adan meṅ se ek daryā nikal kar bāġ kī ābpāshī kartā thā. vahāṅ se bah kar vah chār shāḵẖoṅ meṅ taqsīm huā. 11-12pahalī shāḵẖ kā nām fīsūn hai. vah mulk-e-havīlā ko ghere hue bahatī hai jahāṅ ḵẖālis sonā, gūgal kā gūṅd aur aqīq-e-ahmar [a] charanelianpāe jāte haiṅ.13dūsrī kā nām jaihūn hai jo kūsh ko ghere hue bahatī hai. 14tīsrī kā nām dijlā hai jo asūr ke mashriq ko jātī hai aur chauthī kā nām furāt hai.
15rabb ḵẖudā ne pahale ādmī ko bāġ-e-adan meṅ rakhā tāki vah us kī bāġbānī aur hifāzat kare. 16lekin rabb ḵẖudā ne use āgāh kiyā, “tujhe har daraḵẖt kā phal khāne kī ijāzat hai. 17lekin jis daraḵẖt kā phal acchhe aur bure kī pahachān dilātā hai us kā phal khānā manā hai. agar use khāe to yaqīnan maregā.”
18rabb ḵẖudā ne kahā, “acchhā nahīṅ ki ādmī akelā rahe. maiṅ us ke liye ek munāsib madadgār banātā hūṅ.”
19rabb ḵẖudā ne miṭṭī se zamīn par chalne phirne vāle jānvar aur havā ke parinde banāe the. ab vah unheṅ ādmī ke pās le āyā tāki mālūm ho jāe ki vah un ke kyā kyā nām rakhegā. yūṅ har jānvar ko ādam kī taraf se nām mil gayā. 20ādmī ne tamām maveshiyoṅ, parindoṅ aur zamīn par phirne vāle jāndāroṅ ke nām rakhe. lekin use apne liye koī munāsib madadgār na milā.
21tab rabb ḵẖudā ne use sulā diyā. jab vah gaharī nīṅd so rahā thā to us ne us kī pasliyoṅ meṅ se ek nikāl kar us kī jagah gosht bhar diyā. 22paslī se us ne aurat banāī aur use ādmī ke pās le āyā. 23use dekh kar vah pukār uṭhā, “vāh! yah to mujh jaisī hī hai, merī haḍḍiyoṅ meṅ se haḍḍī aur mere gosht meṅ se gosht hai. is kā nām nārī rakhā jāe kyūṅki vah nar se nikālī gaī hai.” 24is liye mard apne māṅ-bāp ko chhoṛ kar apnī bīvī ke sāth paivast ho jātā hai, aur vah donoṅ ek ho jāte haiṅ. 25donoṅ, ādmī aur aurat naṅge the, lekin yah un ke liye sharm kā bāis nahīṅ thā.