Yoohanna 11

laazar kee maut

1un dinon men ek aadmee beemaar pad gaya jis ka naam laazar tha. vah apnee bahenon mariyam aur martha kay saath bait-aniyaah men raheta tha. 2yah vahee mariyam thee jis nay baad men khudaavand par khushboo undel kar us kay paaon apnay baalon say khushk kiay thay. usee ka bhaaee laazar beemaar tha. 3chunaanchay bahenon nay eesa ko ittila dee, “khudaavand, jisay aap piyaar kartay hain vah beemaar hai.”

4jab eesa ko yah khabar milee to us nay kaha, “is beemaaree ka anjaam maut naheen hai, balki yah allaah kay jalaal kay vaastay hua hai, taaki is say allaah kay farzand ko jalaal milay.”

5eesa martha, mariyam aur laazar say muhabbat rakhta tha. 6to bhee vah laazar kay baaray men ittila milnay kay baad do din aur vaheen thahera. 7phir us nay apnay shaagirdon say baat kee, “aao, ham dubaara yahoodiya chalay jaaen.”

8shaagirdon nay etiraaz kiya, “ustaad, abhee abhee vahaan kay yahoodee aap ko sangasaar karnay kee koshish kar rahay thay, phir bhee aap vaapas jaana chaahatay hain?”

9eesa nay javaab diya, “kya din men raushnee kay baarah ghantay naheen hotay? jo shakhs din kay vaqt chalta phirta hai vah kisee bhee cheez say naheen takaraaega, kyoonki vah is duniya kee raushnee kay zareeay dekh sakta hai. 10lekin jo raat kay vaqt chalta hai vah cheezon say takra jaata hai, kyoonki us kay paas raushnee naheen hai.” 11phir us nay kaha, “hamaara dost laazar so gaya hai. lekin main ja kar usay jaga doonga.”

12shaagirdon nay kaha, “khudaavand, agar vah so raha hai to vah bach jaaega.”

13un ka khayaal tha ki eesa laazar kee fitree neend ka zikr kar raha hai jabki haqeeqat men vah us kee maut kee taraf ishaara kar raha tha. 14is liyay us nay unhen saaf bata diya, “laazar vafaat pa gaya hai. 15aur tumhaaree khaatir main khush hoon ki main us kay martay vaqt vahaan naheen tha, kyoonki ab tum eemaan laaogay. aao, ham us kay paas jaaen.”

16toma nay jis ka laqab judvaan tha apnay saathee shaagirdon say kaha, “chalo, ham bhee vahaan ja kar us kay saath mar jaaen.”

eesa qiyaamat aur zindagee hai

17vahaan pahunch kar eesa ko maaloom hua ki laazar ko qabr men rakhay chaar din ho gaay hain. 18bait-aniyaah ka yarooshalam say faasila teen kilomeetar say kam tha, 19aur bahut say yahoodee martha aur mariyam ko un kay bhaaee kay baaray men tasallee denay kay liyay aaay huay thay.

20yah sun kar ki eesa a raha hai martha usay milnay gaee. lekin mariyam ghar men baithee rahee. 21martha nay kaha, “khudaavand, agar aap yahaan hotay to mera bhaaee na marta. 22lekin main jaantee hoon ki ab bhee allaah aap ko jo bhee maangengay dega.”

23eesa nay usay bataaya, “tera bhaaee jee uthega.”

24martha nay javaab diya, “jee, mujhay maaloom hai ki vah qiyaamat kay din jee uthega, jab sab jee uthengay.”

25eesa nay usay bataaya, “qiyaamat aur zindagee to main hoon. jo mujh par eemaan rakhay vah zinda rahega, chaahay vah mar bhee jaaay. 26aur jo zinda hai aur mujh par eemaan rakhta hai vah kabhee naheen marega. martha, kya tujhay is baat ka yaqeen hai?”

27martha nay javaab diya, “jee khudaavand, main eemaan rakhtee hoon ki aap khuda kay farzand maseeh hain, jisay duniya men aana tha.”

eesa rota hai

28yah kah kar martha vaapas chalee gaee aur chupkay say mariyam ko bulaaya, “ustaad a gaay hain, vah tujhay bula rahay hain.” 29yah suntay hee mariyam uth kar eesa kay paas gaee. 30vah abhee gaaon kay baahar usee jagah thahera tha jahaan us kee mulaaqaat martha say huee thee. 31jo yahoodee ghar men mariyam kay saath baithay usay tasallee day rahay thay, jab unhon nay dekha ki vah jaldee say uth kar nikal gaee hai to vah us kay peechhay ho liyay. kyoonki vah samajh rahay thay ki vah maatam karnay kay liyay apnay bhaaee kee qabr par ja rahee hai.

32mariyam eesa kay paas pahunch gaee. usay dekhtay hee vah us kay paaon men gir gaee aur kahenay lagee, “khudaavand, agar aap yahaan hotay to mera bhaaee na marta.”

33jab eesa nay mariyam aur us kay saathiyon ko rotay dekha to usay badee ranjish huee. muztarib haalat men 34us nay poochha, “tum nay usay kahaan rakha hai?”

unhon nay javaab diya, “aaen khudaavand, aur dekh len.”

35eesa ro pada. 36yahoodiyon nay kaha, “dekho, vah usay kitna azeez tha.”

37lekin un men say baaz nay kaha, “is aadmee nay andhay ko shifa dee. kya yah laazar ko marnay say naheen bacha sakta tha?”

laazar ko zinda kar diya jaata hai

38phir eesa dubaara nihaayat ranjeeda ho kar qabr par aaya. qabr ek ghaar thee jis kay munh par patthar rakha gaya tha. 39eesa nay kaha, “patthar ko hata do.”

lekin marhoom kee bahen martha nay etiraaz kiya, “khudaavand, badboo aaegee, kyoonki usay yahaan paday chaar din ho gaay hain.”

40eesa nay us say kaha, “kya main nay tujhay naheen bataaya ki agar too eemaan rakhay to allaah ka jalaal dekhegee?” 41chunaanchay unhon nay patthar ko hata diya. phir eesa nay apnee nazar utha kar kaha, “ai baap, main tera shukr karta hoon ki too nay meree sun lee hai. 42main to jaanta hoon ki too hamesha meree sunta hai. lekin main nay yah baat paas khaday logon kee khaatir kee, taaki vah eemaan laaen ki too nay mujhay bheja hai.” 43phir eesa zor say pukaar utha, “laazar, nikal a!” 44aur murda nikal aaya. abhee tak us kay haath aur paaon pattiyon say bandhay huay thay jabki us ka chihara kapday men lipta hua tha. eesa nay un say kaha, “is kay kafan ko khol kar isay jaanay do.”