Yoohanna 18
eesa kee giriftaaree
1yah kah kar eesa apnay shaagirdon kay saath nikla aur vaadee-ay-qidron ko paar karkay ek baagh men daakhil hua. 2yahoodaah jo usay dushman kay havaalay karnay vaala tha vah bhee is jagah say vaaqif tha, kyoonki eesa vahaan apnay shaagirdon kay saath jaaya karta tha. 3raahanuma imaamon aur fareesiyon nay yahoodaah ko romee faujiyon ka dasta aur bait-ul-muqaddas kay kuchh paheredaar diay thay. ab yah mash’alen, laaltain aur hathiyaar liyay baagh men pahunchay. 4eesa ko maaloom tha ki usay kya pesh aaega. chunaanchay us nay nikal kar un say poochha, “tum kis ko dhoond rahay ho?”
5unhon nay javaab diya, “eesa naasree ko.”
eesa nay unhen bataaya, “main hee hoon.”
yahoodaah jo usay dushman kay havaalay karna chaahata tha, vah bhee un kay saath khada tha.6jab eesa nay elaan kiya, “main hee hoon,” to sab peechhay hat kar zameen par gir paday. 7ek aur baar eesa nay un say savaal kiya, “tum kis ko dhoond rahay ho?”
unhon nay javaab diya, “eesa naasree ko.”
8us nay kaha, “main tum ko bata chuka hoon ki main hee hoon. agar tum mujhay dhoond rahay ho to in ko jaanay do.” 9yoon us kee yah baat pooree huee, “main nay un men say jo too nay mujhay diay hain ek ko bhee naheen khoya.”
10shamaaoon patras kay paas talvaar thee. ab us nay usay miyaan say nikaal kar imaam-ay-aazam kay ghulaam ka dahena kaan uda diya (ghulaam ka naam malkhus tha). 11lekin eesa nay patras say kaha, “talvaar ko miyaan men rakh. kya main vah piyaala na piyoon jo baap nay mujhay diya hai?”
eesa hanna kay saamne
12phir faujee dastay, un kay afsar aur bait-ul-muqaddas kay yahoodee paheredaaron nay eesa ko giriftaar karkay baandh liya. 13pahelay vah usay hanna kay paas lay gaay. hanna us saal kay imaam-ay-aazam kaaifa ka susar tha. 14kaaifa hee nay yahoodiyon ko yah mashvra diya tha ki behatar yah hai ki ek hee aadmee ummat kay liyay mar jaaay.
patras eesa ko jaannay say inkaar karta hai
15shamaaoon patras kisee aur shaagird kay saath eesa kay peechhay ho liya tha. yah doosra shaagird imaam-ay-aazam ka jaannay vaala tha, is liyay vah eesa kay saath imaam-ay-aazam kay sahen men daakhil hua. 16patras baahar darvaazay par khada raha. phir imaam-ay-aazam ka jaannay vaala shaagird dubaara nikal aaya. us nay get kee nigraanee karnay vaalee aurat say baat kee to usay patras ko apnay saath andar lay jaanay kee ijaazat milee. 17us aurat nay patras say poochha, “tum bhee is aadmee kay shaagird ho ki naheen?”
us nay javaab diya, “naheen, main naheen hoon.”
18thand thee, is liyay ghulaamon aur paheredaaron nay lakdee kay koilon say aag jalaaee. ab vah us kay paas khaday taap rahay thay. patras bhee un kay saath khada taap raha tha.
imaam-ay-aazam eesa kee poochhgichh karta hai
19itnay men imaam-ay-aazam eesa kee poochhgichh karkay us kay shaagirdon aur taaleem kay baaray men tafteesh karnay laga. 20eesa nay javaab men kaha, “main nay duniya men khul kar baat kee hai. main hamesha yahoodee ibaadatkhaanon aur bait-ul-muqaddas men taaleem deta raha, vahaan jahaan tamaam yahoodee jama hua kartay hain. posheedgee men to main nay kuchh naheen kaha. 21aap mujh say kyoon poochh rahay hain? un say darayaaft karen jinhon nay meree baaten sunee hain. un ko maaloom hai ki main nay kya kuchh kaha hai.”
22is par saath khaday bait-ul-muqaddas kay paheredaaron men say ek nay eesa kay munh par thappad maar kar kaha, “kya yah imaam-ay-aazam say baat karnay ka tareeqa hai jab vah tum say kuchh poochhay?”
23eesa nay javaab diya, “agar main nay buree baat kee hai to saabit kar. lekin agar sachch kaha, to too nay mujhay kyoon maara?”
24phir hanna nay eesa ko bandhee huee haalat men imaam-ay-aazam kaaifa kay paas bhej diya.
patras dubaara eesa ko jaannay say inkaar karta hai
25shamaaoon patras ab tak aag kay paas khada taap raha tha. itnay men doosray us say poochhnay lagay, “tum bhee us kay shaagird ho ki naheen?”
lekin patras nay inkaar kiya, “naheen, main naheen hoon.”
26phir imaam-ay-aazam ka ek ghulaam bol utha jo us aadmee ka rishtedaar tha jis ka kaan patras nay uda diya tha, “kya main nay tum ko baagh men us kay saath naheen dekha tha?”
27patras nay ek baar phir inkaar kiya, aur inkaar kartay hee murgh kee baang sunaaee dee.
eesa ko peelaatus kay saamnay pesh kiya jaata hai
28phir yahoodee eesa ko kaaifa say lay kar romee gavarnar kay mahel banaam praitoriyum kay paas pahunch gaay. ab subah ho chukee thee aur choonki yahoodee fasah kee eed kay khaanay men shareek hona chaahatay thay, is liyay vah mahel men daakhil na huay, varna vah naapaak ho jaatay. 29chunaanchay peelaatus nikal kar un kay paas aaya aur poochha, “tum is aadmee par kya ilzaam laga rahay ho?”
30unhon nay javaab diya, “agar yah mujrim na hota to ham isay aap kay havaalay na kartay.”
31peelaatus nay kaha, “phir isay lay jaao aur apnee sharaee adaalaton men pesh karo.”
lekin yahoodiyon nay etiraaz kiya, “hamen kisee ko saza-ay-maut denay kee ijaazat naheen.”32eesa nay is taraf ishaara kiya tha ki vah kis tarah marega aur ab us kee yah baat pooree huee.
33tab peelaatus phir apnay mahel men gaya. vahaan say us nay eesa ko bulaaya aur us say poochha, “kya tum yahoodiyon kay baadshaah ho?”
34eesa nay poochha, “kya aap apnee taraf say yah savaal kar rahay hain, ya auron nay aap ko meray baaray men bataaya hai?”
35peelaatus nay javaab diya, “kya main yahoodee hoon? tumhaaree apnee qaum aur raahanuma imaamon hee nay tumhen meray havaalay kiya hai. tum say kya kuchh sarzad hua hai?”
36eesa nay kaha, “meree baadshaahee is duniya kee naheen hai. agar vah is duniya kee hotee to meray khaadim sakht jidd-o-jahd kartay taaki mujhay yahoodiyon kay havaalay na kiya jaata. lekin aisa naheen hai. ab meree baadshaahee yahaan kee naheen hai.”
37peelaatus nay kaha, “to phir tum vaaqaee baadshaah ho?”
eesa nay javaab diya, “aap saheeh kahetay hain, main baadshaah hoon. main isee maqsad kay liyay paida ho kar duniya men aaya ki sachchaaee kee gavaahee doon. jo bhee sachchaaee kee taraf say hai vah meree sunta hai.”
38peelaatus nay poochha, “sachchaaee kya hai?”
eesa ko saza-ay-maut sunaaee jaatee hai
phir vah dubaara nikal kar yahoodiyon kay paas gaya. us nay elaan kiya, “mujhay usay mujrim thaheraanay kee koee vajah naheen milee.39lekin tumhaaree ek rasm hai jis kay mutaabiq mujhay eed-ay-fasah kay mauqay par tumhaaray liyay ek qaidee ko riha karna hai. kya tum chaahatay ho ki main ‘yahoodiyon kay baadshaah’ ko riha kar doon?”
40lekin javaab men log chillaanay lagay, “naheen, is ko naheen balki bar-abba ko.” (bar-abba daakoo tha.)