Yoohanna 3

neekudemus kay saath mulaaqaat

¹fareesee firqay ka ek aadmee banaam neekudemus tha jo yahoodee adaalat-ay-aliya ka rukan tha. ²vah raat kay vaqt eesa kay paas aaya aur kaha, “ustaad, ham jaantay hain ki aap aisay ustaad hain jo allaah kee taraf say aaay hain, kyoonki jo ilaahee nishaan aap dikhaatay hain vah sirf aisa shakhs hee dikha sakta hai jis kay saath allaah ho.”

³eesa nay javaab diya, “main tujhay sachch bataata hoon, sirf vah shakhs allaah kee baadshaahee ko dekh sakta hai jo naay siray say paida hua ho.”

⁴neekudemus nay etiraaz kiya, “kya matlab? boodha aadmee kis tarah naay siray say paida ho sakta hai? kya vah dubaara apnee maan kay pet men ja kar paida ho sakta hai?”

⁵eesa nay javaab diya, “main tujhay sachch bataata hoon, sirf vah shakhs allaah kee baadshaahee men daakhil ho sakta hai jo paanee aur rooh say paida hua ho. ⁶jo kuchh jism say paida hota hai vah jismaanee hai, lekin jo rooh say paida hota hai vah ruhaanee hai. ⁷is liyay too taajjub na kar ki main kaheta hoon, ‘tumhen naay siray say paida hona zaroor hai.’ ⁸hava jahaan chaahay chaltee hai. too us kee aavaaz to sunta hai, lekin yah naheen jaanta ki kahaan say aatee aur kahaan ko jaatee hai. yahee haalat har us shakhs kee hai jo rooh say paida hua hai.”

⁹neekudemus nay poochha, “yah kis tarah ho sakta hai?”

¹⁰eesa nay javaab diya, “too to israaeel ka ustaad hai. kya is kay baavujood bhee yah baaten naheen samajhta? ¹¹main tujh ko sachch bataata hoon, ham vah kuchh bayaan kartay hain jo ham jaantay hain aur us kee gavaahee detay hain jo ham nay khud dekha hai. to bhee tum log hamaaree gavaahee qabool naheen kartay. ¹²main nay tum ko duniyaavee baaten sunaaee hain aur tum un par eemaan naheen rakhtay. to phir tum kyoonkar eemaan laaogay agar tumhen aasmaanee baaton kay baaray men bataaoon? ¹³aasmaan par koee naheen chadha siva-ay-ibn-ay-aadam kay, jo aasmaan say utra hai.

¹⁴aur jis tarah moosa nay registaan men saamp ko lakdee par latka kar ooncha kar diya usee tarah zaroor hai ki ibn-ay-aadam ko bhee oonchay par chadhaaya jaaay, ¹⁵taaki har ek ko jo us par eemaan laaega abdee zindagee mil jaaay. ¹⁶kyoonki allaah nay duniya say itnee muhabbat rakhee ki us nay apnay iklautay farzand ko bakhsh diya, taaki jo bhee us par eemaan laaay halaak na ho balki abdee zindagee paaay. ¹⁷kyoonki allaah nay apnay farzand ko is liyay duniya men naheen bheja ki vah duniya ko mujrim thaheraaay balki is liyay ki vah usay najaat day.

¹⁸jo bhee us par eemaan laaya hai usay mujrim naheen qaraar diya jaaega, lekin jo eemaan naheen rakhta usay mujrim thaheraaya ja chuka hai. vajah yah hai ki vah allaah kay iklautay farzand kay naam par eemaan naheen laaya. ¹⁹aur logon ko mujrim thaheraanay ka sabab yah hai ki go allaah ka noor is duniya men aaya, lekin logon nay noor kee nisbat andheray ko ziyaada piyaar kiya, kyoonki un kay kaam buray thay. ²⁰jo bhee ghalat kaam karta hai vah noor say dushmanee rakhta hai aur us kay qareeb naheen aata taaki us kay buray kaamon ka pol na khul jaaay. ²¹lekin jo sachcha kaam karta hai vah noor kay paas aata hai taaki zaahir ho jaaay ki us kay kaam allaah kay vaseelay say huay hain.”