Paidaaish 3

gunaah ka aaghaaz

1saamp zameen par chalnay phirnay vaalay un tamaam jaanvaron say ziyaada chaalaak tha jin ko rabb khuda nay banaaya tha. us nay aurat say poochha, “kya allaah nay vaaqaee kaha ki baagh kay kisee bhee darakht ka phal na khaana?” 2aurat nay javaab diya, “hargiz naheen. ham baagh ka har phal kha saktay hain, 3sirf us darakht kay phal say gurez karna hai jo baagh kay beech men hai. allaah nay kaha ki us ka phal na khaao balki usay chhoona bhee naheen, varna tum yaqeenan mar jaaogay.” 4saamp nay aurat say kaha, “tum hargiz na marogay, 5balki allaah jaanta hai ki jab tum us ka phal khaaogay to tumhaaree aankhen khul jaaengee aur tum allaah kee maanind ho jaaogay, tum jo bhee achchha aur bura hai usay jaan logay.”

6aurat nay darakht par ghaur kiya ki khaanay kay liyay achchha aur dekhnay men bhee dilkash hai. sab say dilfareb baat yah ki us say samajh haasil ho saktee hai! yah soch kar us nay us ka phal lay kar usay khaaya. phir us nay apnay shauhar ko bhee day diya, kyoonki vah us kay saath tha. us nay bhee kha liya. 7lekin khaatay hee un kee aankhen khul gaeen aur un ko maaloom hua ki ham nangay hain. chunaanchay unhon nay anjeer kay pattay see kar lungiyaan bana leen.

8shaam kay vaqt jab thandee hava chalnay lagee to unhon nay rabb khuda ko baagh men chaltay phirtay suna. vah dar kay maaray darakhton kay peechhay chhup gaay. 9rabb khuda nay pukaar kar kaha, “aadam, too kahaan hai?” 10aadam nay javaab diya, “main nay tujhay baagh men chaltay huay suna to dar gaya, kyoonki main nanga hoon. is liyay main chhup gaya.” 11us nay poochha, “kis nay tujhay bataaya ki too nanga hai? kya too nay us darakht ka phal khaaya hai jisay khaanay say main nay mana kiya tha?” 12aadam nay kaha, “jo aurat too nay meray saath rahenay kay liyay dee hai us nay mujhay phal diya. is liyay main nay kha liya.” 13ab rabb khuda aurat say mukhaatib hua, “too nay yah kyoon kiya?” aurat nay javaab diya, “saamp nay mujhay bahekaaya to main nay khaaya.”