Paidaaish 6

5rabb nay dekha ki insaan nihaayat bigad gaya hai, ki us kay tamaam khayaalaat lagaataar buraaee kee taraf maail rahetay hain. 6vah pachhtaaya ki main nay insaan ko bana kar duniya men rakh diya hai, aur usay sakht dukh hua. 7us nay kaha, “go main hee nay insaan ko khalaq kiya main usay roo-ay-zameen par say mita daaloonga. main na sirf logon ko balki zameen par chalnay phirnay aur rengnay vaalay jaanvaron aur hava kay parindon ko bhee halaak kar doonga, kyoonki main pachhtaata hoon ki main nay un ko banaaya.”

baday sailaab kay liyay nooh kee tayyaariyaan

8sirf nooh par rabb kee nazar-ay-karam thee. 9yah us kee zindagee ka bayaan hai.

nooh raastbaaz tha. us zamaanay kay logon men sirf vahee bequsoor tha. vah allaah kay saath saath chalta tha.10nooh kay teen betay thay, sim, haam aur yaafat. 11lekin duniya allaah kee nazar men bigdee huee aur zulm-o-tashaddud say bharee huee thee. 12jahaan bhee allaah dekhta duniya kharaab thee, kyoonki tamaam jaandaaron nay zameen par apnee ravish ko bigaad diya tha.

13tab allaah nay nooh say kaha, “main nay tamaam jaandaaron ko khatm karnay ka faisla kiya hai, kyoonki un kay sabab say pooree duniya zulm-o-tashaddud say bhar gaee hai. chunaanchay main un ko zameen samet tabaah kar doonga. 14ab apnay liyay sarv[a] ibraanee lafz matrook hai. shaayad is ka matlab sarv ya deodaar kee lakdee ho.kee lakdee kee kashtee bana lay. us men kamray hon aur usay andar aur baahar taarkol laga.15us kee lambaaee 450 fut, chaudaaee 75 fut aur oonchaaee 45 fut ho. 16kashtee kee chhat ko yoon banaana ki us kay neechay 18 inch khula rahay. ek taraf darvaaza ho, aur us kee teen manzilen hon. 17main paanee ka itna bada sailaab laaoonga ki vah zameen kay tamaam jaandaaron ko halaak kar daalega. zameen par sab kuchh fana ho jaaega. 18lekin teray saath main ahd baandhoonga jis kay tahet too apnay beton, apnee beevee aur bahooon kay saath kashtee men jaaega. 19har qism kay jaanvar ka ek nar aur ek maada bhee apnay saath kashtee men lay jaana taaki vah teray saath jeetay bachen. 20har qism kay par rakhnay vaalay jaanvar aur har qism kay zameen par phirnay ya rengnay vaalay jaanvar do do ho kar teray paas aaengay taaki jeetay bach jaaen. 21jo bhee khuraak darkaar hai usay apnay aur un kay liyay jama karkay kashtee men mahfooz kar lena.”

22nooh nay sab kuchh vaisa hee kiya jaisa allaah nay usay bataaya.

[a] ibraanee lafz matrook hai. shaayad is ka matlab sarv ya deodaar kee lakdee ho.

Paidaaish 7

sailaab ka aghaaz

1phir rabb nay nooh say kaha, “apnay gharaanay samet kashtee men daakhil ho ja, kyoonki is daur kay logon men say main nay sirf tujhay raastbaaz paaya hai. 2har qism kay paak jaanvaron men say saat saat nar-o-maada kay joday jabki naapaak jaanvaron men say nar-o-maada ka sirf ek ek joda saath lay jaana. 3isee tarah har qism kay par rakhnay vaalon men say saat saat nar-o-maada kay joday bhee saath lay jaana taaki un kee naslen bachee rahen. 4ek haftay kay baad main chaalees din aur chaalees raat mutvaatir baarish barasaaoonga. is say main tamaam jaandaaron ko roo-ay-zameen par say mita daaloonga, agarchi main hee nay unhen banaaya hai.”

5nooh nay vaisa hee kiya jaisa rabb nay hukm diya tha. 6vah 600 saal ka tha jab yah toofaanee sailaab zameen par aaya.

7toofaanee sailaab say bachnay kay liyay nooh apnay beton, apnee beevee aur bahooon kay saath kashtee men savaar hua. 8zameen par phirnay vaalay paak aur naapaak jaanvar, par rakhnay vaalay aur tamaam rengnay vaalay jaanvar bhee aaay. 9nar-o-maada kee soorat men do do ho kar vah nooh kay paas a kar kashtee men savaar huay. sab kuchh vaisa hee hua jaisa allaah nay nooh ko hukm diya tha. 10ek haftay kay baad toofaanee sailaab zameen par a gaya.

11yah sab kuchh us vaqt hua jab nooh 600 saal ka tha. doosray maheenay kay 17ven din zameen kee gaheraaiyon men say tamaam chashmay phoot niklay aur aasmaan par paanee kay dareechay khul gaay. 12chaalees din aur chaalees raat tak mooslaadhaar baarish hotee rahee. 13jab baarish shuroo huee to nooh, us kay betay sim, haam aur yaafat, us kee beevee aur bahooen kashtee men savaar ho chukay thay. 14un kay saath har qism kay janglee jaanvar, maveshee, rengnay aur par rakhnay vaalay jaanvar thay. 15har qism kay jaandaar do do ho kar nooh kay paas a kar kashtee men savaar ho chukay thay. 16nar-o-maada aaay thay. sab kuchh vaisa hee hua tha jaisa allaah nay nooh ko hukm diya tha. phir rabb nay darvaazay ko band kar diya.

17chaalees din tak toofaanee sailaab jaaree raha. paanee chadha to us nay kashtee ko zameen par say utha liya. 18paanee zor pakad kar bahut badh gaya, aur kashtee us par tairnay lagee. 19aakhirkaar paanee itna ziyaada ho gaya ki tamaam oonchay pahaad bhee us men chhup gaay, 20balki sab say oonchee chotee par paanee kee gaheraaee 20 fut thee. 21zameen par rahenay vaalee har makhlooq halaak huee. parinday, maveshee, janglee jaanvar, tamaam jaandaar jin say zameen bharee huee thee aur insaan, sab kuchh mar gaya. 22zameen par har jaandaar makhlooq halaak huee. 23yoon har makhlooq ko roo-ay-zameen par say mita diya gaya. insaan, zameen par phirnay aur rengnay vaalay jaanvar aur parinday, sab kuchh khatm kar diya gaya. sirf nooh aur kashtee men savaar us kay saathee bach gaay.

24sailaab dedh sau din tak zameen par ghaalib raha.

Paidaaish 8

sailaab ka ikhtitaam

1lekin allaah ko nooh aur tamaam jaanvar yaad rahay jo kashtee men thay. us nay hava chala dee jis say paanee kam honay laga. 2zameen kay chashmay aur aasmaan par kay paanee kay dareechay band ho gaay, aur baarish ruk gaee. 3paanee ghatta gaya. 150 din kay baad vah kaafee kam ho gaya tha. 4saatven maheenay kay 17ven din kashtee araaraat kay ek pahaad par tik gaee. 5dasven maheenay kay pahelay din paanee itna kam ho gaya tha ki pahaadon kee chotiyaan nazar aanay lagee theen.

6-7 chaalees din kay baad nooh nay kashtee kee khidkee khol kar ek kavva chhod diya, aur vah ud kar chala gaya. lekin jab tak zameen par paanee tha vah aata jaata raha. 8phir nooh nay ek kabootar chhod diya taaki pata chalay ki zameen paanee say nikal aaee hai ya naheen. 9lekin kabootar ko kaheen bhee baithnay kee jagah na milee, kyoonki ab tak pooree zameen par paanee hee paanee tha. vah kashtee aur nooh kay paas vaapas a gaya, aur nooh nay apna haath badhaaya aur kabootar ko pakad kar apnay paas kashtee men rakh liya.

10us nay ek hafta aur intizaar karkay kabootar ko dubaara chhod diya. 11shaam kay vaqt vah laut aaya. is dafa us kee chonch men zaitoon ka taaza patta tha. tab nooh ko maaloom hua ki zameen paanee say nikal aaee hai.

12us nay mazeed ek haftay kay baad kabootar ko chhod diya. is dafa vah vaapas na aaya.

13jab nooh 601 saal ka tha to pahelay maheenay kay pahelay din zameen kee satah par paanee khatm ho gaya. tab nooh nay kashtee kee chhat khol dee aur dekha ki zameen kee satah par paanee naheen hai. 14doosray maheenay kay 27ven din zameen bilkul khushk ho gaee.

15phir allaah nay nooh say kaha, 16“apnee beevee, beton aur bahooon kay saath kashtee say nikal a. 17jitnay bhee jaanvar saath hain unhen nikaal day, khwaah parinday hon, khwaah zameen par phirnay ya rengnay vaalay jaanvar. vah duniya men phail jaaen, nasal badhaaen aur taadaad men badhtay jaaen.” 18chunaanchay nooh apnay beton, apnee beevee aur bahooon samet nikal aaya. 19tamaam jaanvar aur parinday bhee apnee apnee qism kay gurohon men kashtee say niklay.

20us vaqt nooh nay rabb kay liyay qurbaangaah banaaee. us nay tamaam phirnay aur udnay vaalay paak jaanvaron men say kuchh chun kar unhen zabah kiya aur qurbaangaah par pooree tarah jala diya. 21yah qurbaaniyaan dekh kar rabb khush hua aur apnay dil men kaha, “ab say main kabhee zameen par insaan kee vajah say laanat naheen bhejoonga, kyoonki us ka dil bachpan hee say buraaee kee taraf maail hai. ab say main kabhee is tarah tamaam jaan rakhnay vaalee makhlooqaat ko roo-ay-zameen par say naheen mitaaoonga. 22duniya kay muqarrara auqaat jaaree rahengay. beej bonay aur fasal kaatnay ka vaqt, thand aur tapish, garmiyon aur sardiyon ka mausam, din aur raat, yah sab kuchh duniya kay akheer tak qaaim rahega.”

Paidaaish 9

allaah ka nooh kay saath ahd

1phir allaah nay nooh aur us kay beton ko barkat day kar kaha, “phalo phoolo aur taadaad men badhtay jaao. duniya tum say bhar jaae 2zameen par phirnay aur rengnay vaalay jaanvar, parinday aur machhliyaan sab tum say darengay. unhen tumhaaray ikhtiyaar men kar diya gaya hai. 3jis tarah main nay tumhaaray khaanay kay liyay paudon kee paidaavaar muqarrar kee hai isee tarah ab say tumhen har qism kay jaanvar khaanay kee ijaazat bhee hai. 4lekin khabardaar! aisa gosht na khaana jis men khoon hai, kyoonki khoon men us kee jaan hai.

5kisee kee jaan lena mana hai. jo aisa karega usay apnee jaan denee padegee, khwaah vah insaan ho ya haivaan. main khud is ka mutaalba karoonga. 6jo bhee kisee ka khoon bahaaay us ka khoon bhee bahaaya jaaega. kyoonki allaah nay insaan ko apnee soorat par banaaya hai.

7ab phalo phoolo aur taadaad men badhtay jaao. duniya men phail jaao.”

8tab allaah nay nooh aur us kay beton say kaha, 9“ab main tumhaaray aur tumhaaree aulaad kay saath ahd qaaim karta hoon. 10yah ahd un tamaam jaanvaron kay saath bhee hoga jo kashtee men say niklay hain yaanee parindon, maveshiyon aur zameen par kay tamaam jaanvaron kay saath. 11main tumhaaray saath ahd baandh kar vaada karta hoon ki ab say aisa kabhee naheen hoga ki zameen kee tamaam zindagee sailaab say khatm kar dee jaaegee. ab say aisa sailaab kabhee naheen aaega jo pooree zameen ko tabaah kar day. 12is abdee ahd ka nishaan jo main tumhaaray aur tamaam jaandaaron kay saath qaaim kar raha hoon yah hai ki 13main apnee kamaan baadlon men rakhta hoon. vah meray duniya kay saath ahd ka nishaan hoga. 14jab kabhee meray kahenay par aasmaan par baadal chha jaaengay aur qaus-ay-quzah un men say nazar aaegee 15to main yah ahd yaad karoonga jo tumhaaray aur tamaam jaandaaron kay saath kiya gaya hai. ab kabhee bhee aisa sailaab naheen aaega jo tamaam zindagee ko halaak kar day. 16qaus-ay-quzah nazar aaegee to main usay dekh kar us daaimee ahd ko yaad karoonga jo meray aur duniya kee tamaam jaandaar makhlooqaat kay darmiyaan hai. 17yah us ahd ka nishaan hai jo main nay duniya kay tamaam jaandaaron kay saath kiya hai.”