Genesis12:1-8
Paidaaish 12
abraam kee bulaahat
1rabb nay abraam say kaha, “apnay vatan, apnay rishtedaaron aur apnay baap kay ghar ko chhodkar us mulk men chala ja jo main tujhay dikhaaoonga.
2main tujh say ek badee qaum banaaoonga, tujhay barkat doonga aur teray naam ko bahut badhaaoonga. too doosron kay liyay barkat ka baais hoga.
3jo tujhay barkat dengay unhen main bhee barkat doonga. jo tujh par laanat karega us par main bhee laanat karoonga. duniya kee tamaam qaumen tujh say barkat paaengee.”
4abraam nay rabb kee sunee aur haaraan say ravaana hua. loot us kay saath tha. us vaqt abraam 75 saal ka tha.
5us kay saath us kee beevee saaray aur us ka bhateeja loot thay. vah apnay naukar-chaakron samet apnee pooree milkiyat bhee saath lay gaya jo us nay haaraan men haasil kee thee. chaltay chaltay vah kan’aan pahunchay.
6abraam us mulk men say guzar kar sikam kay maqaam par thaher gaya jahaan morih kay baloot ka darakht tha. us zamaanay men mulk men kan’aanee qaumen aabaad theen.
7vahaan rabb abraam par zaahir hua aur us say kaha, “main teree aulaad ko yah mulk doonga.” is liyay us nay vahaan rabb kee taazeem men qurbaangaah banaaee jahaan vah us par zaahir hua tha.
8vahaan say vah us pahaadee ilaaqay kee taraf gaya jo bait-el kay mashriq men hai. vahaan us nay apna khaima lagaaya. maghrib men bait-el tha aur mashriq men aee. is jagah par bhee us nay rabb kee taazeem men qurbaangaah banaaee aur rabb ka naam lay kar ibaadat kee.
Genesis15:1-6
Paidaaish 15
abraam kay saath rabb ka ahd
1is kay baad rabb roya men abraam say hamkalaam hua, “abraam, mat dar. main hee teree sipar hoon, main hee tera bahut bada ajr hoon.”
2lekin abraam nay etiraaz kiya, “ai rabb qaadir-ay-mutlaq, too mujhay kya dega jabki abhee tak meray haan koee bachcha naheen hai aur ileeazar damishqee meree meeraas paaega.
3too nay mujhay aulaad naheen bakhshee, is liyay meray gharaanay ka naukar mera vaaris hoga.”
4tab abraam ko allaah say ek aur kalaam mila. “yah aadmee ileeazar tera vaaris naheen hoga balki tera apna hee beta tera vaaris hoga.”
5rabb nay usay baahar lay ja kar kaha, “aasmaan kee taraf dekh aur sitaaron ko ginnay kee koshish kar. teree aulaad itnee hee beshumaar hogee.”
6abraam nay rabb par bharosa rakha. is bina par allaah nay usay raastbaaz qaraar diya.
Genesis17:1-7
Paidaaish 17
ahd ka nishaan : khatnaa
1jab abraam 99 saal ka tha to rabb us par zaahir hua. us nay kaha, “main allaah qaadir-ay-mutlaq hoon. meray huzoor chalta rah aur beilzaam ho.
2main teray saath apna ahd baandhoonga aur teree aulaad bahut hee ziyaada badha doonga.”
3abraam munh kay bal gir gaya, aur allaah nay us say kaha,
4“mera teray saath ahd hai ki too bahut qaumon ka baap hoga.
5ab say too abraam yaanee ‘azeem baap’ naheen kahelaaega balki tera naam ibraaheem yaanee ‘bahut qaumon ka baap’ hoga. kyoonki main nay tujhay bahut qaumon ka baap bana diya hai.
6main tujhay bahut hee ziyaada aulaad bakhsh doonga, itnee ki qaumen banengee. tujh say baadshaah bhee nikalengay.
7main apna ahd teray aur teree aulaad kay saath nasal-dar-nasal qaaim karoonga, ek abdee ahd jis kay mutaabiq main tera aur teree aulaad ka khuda hoonga.
