Paidaaish 22

ibraaheem kee aazmaaish

1kuchh arsay kay baad allaah nay ibraaheem ko aazmaaya. us nay us say kaha, “ibraaheem!” us nay javaab diya, “jee, main haazir hoon.” 2allaah nay kaha, “apnay iklautay betay ishaaq ko jisay too piyaar karta hai saath lay kar moriyaah kay ilaaqay men chala ja. vahaan main tujhay ek pahaad dikhaaoonga. us par apnay betay ko qurbaan kar day. usay zabah karkay qurbaangaah par jala dena.”

3subah-saveray ibraaheem utha aur apnay gadhay par zeen kasa. us nay apnay saath do naukron aur apnay betay ishaaq ko liya. phir vah qurbaanee ko jalaanay kay liyay lakdee kaat kar us jagah kee taraf ravaana hua jo allaah nay usay bataaee thee. 4safar kartay kartay teesray din qurbaanee kee jagah ibraaheem ko door say nazar aaee. 5us nay naukron say kaha, “yahaan gadhay kay paas thahero. main ladkay kay saath vahaan ja kar parastish karoonga. phir ham tumhaaray paas vaapas a jaaengay.”

6ibraaheem nay qurbaanee ko jalaanay kay liyay lakdiyaan ishaaq kay kandhon par rakh deen aur khud chhuree aur aag jalaanay kay liyay angaaron ka bartan uthaaya. donon chal diay. 7ishaaq bola, “abboo!” ibraaheem nay kaha, “jee beta.” “abboo, aag aur lakdiyaan to hamaaray paas hain, lekin qurbaanee kay liyay bhed ya bakree kahaan hai?” 8ibraaheem nay javaab diya, “allaah khud qurbaanee kay liyay jaanvar muhayya karega, beta.” vah aagay badh gaay.

9chaltay chaltay vah us maqaam par pahunchay jo allaah nay us par zaahir kiya tha. ibraaheem nay vahaan qurbaangaah banaaee aur us par lakdiyaan tarteeb say rakh deen. phir us nay ishaaq ko baandh kar lakdiyon par rakh diyaa 10aur chhuree pakad lee taaki apnay betay ko zabah karay. 11ain usee vaqt rabb kay farishtay nay aasmaan par say usay aavaaz dee, “ibraaheem, ibraaheem!” ibraaheem nay kaha, “jee, main haazir hoon.” 12farishtay nay kaha, “apnay betay par haath na chala, na us kay saath kuchh kar. ab main nay jaan liya hai ki too allaah ka khauf rakhta hai, kyoonki too apnay iklautay betay ko bhee mujhay denay kay liyay tayyaar hai.”

13achaanak ibraaheem ko ek mendha nazar aaya jis kay seeng gunjaan jhaadiyon men phansay huay thay. ibraaheem nay usay zabah karkay apnay betay kee jagah qurbaanee kay taur par jala diya. 14us nay us maqaam ka naam “rabb muhayya karta hai” rakha. is liyay aaj tak kaha jaata hai, “rabb kay pahaad par muhayya kiya jaata hai.”

15rabb kay farishtay nay ek baar phir aasmaan par say pukaar kar us say baat kee. 16“rabb ka farmaan hai, meree zaat kee qasam, choonki too nay yah kiya aur apnay iklautay betay ko mujhay pesh karnay kay liyay tayyaar thaa 17is liyay main tujhay barkat doonga aur teree aulaad ko aasmaan kay sitaaron aur saahil kee ret kee tarah beshumaar honay doonga. teree aulaad apnay dushmanon kay shaheron kay darvaazon par qabza karegee. 18choonki too nay meree sunee is liyay teree aulaad say duniya kee tamaam qaumen barkat paaengee.”

19is kay baad ibraaheem apnay naukron kay paas vaapas aaya, aur vah mil kar bair-saba lautay. vahaan ibraaheem aabaad raha.