Ḵẖurooj 12

fasah kee eed

¹phir rabb nay misr men moosa aur haaroon say kaha, ²“ab say yah maheena tumhaaray liyay saal ka pahela maheena ho.” ³israaeel kee pooree jamaaat ko bataana ki is maheenay kay dasven din har khaandaan ka sarparast apnay gharaanay kay liyay lela yaanee bhed ya bakree ka bachcha haasil karay. ⁴agar gharaanay kay afraad poora jaanvar khaanay kay liyay kam hon to vah apnay sab say qareebee padosee kay saath mil kar lela haasil karen. itnay log us men say khaaen ki sab kay liyay kaafee ho aur poora jaanvar khaaya jaaay. ⁵is kay liyay ek saal ka nar bachcha chun lena jis men nuqs na ho. vah bhed ya bakree ka bachcha ho sakta hai.

⁶maheenay kay 14ven din tak us kee dekh-bhaal karo. us din tamaam israaeelee sooraj kay ghuroob hotay vaqt apnay lelay zabah karen. ⁷har khaandaan apnay jaanvar ka kuchh khoon jama karkay usay us ghar kay darvaazay kee chaukhat par lagaaay jahaan lela khaaya jaaega. yah khoon chaukhat kay oopar vaalay hissay aur daaen baaen kay baazooon par lagaaya jaaay. ⁸laazim hai ki log jaanvar ko bhoon kar usee raat khaaen. saath hee vah kadva saag-paat aur bekhameeree rotiyaan bhee khaaen. ⁹lelay ka gosht kachcha na khaana, na usay paanee men ubaalna balki pooray jaanvar ko sar, pairon aur androonee hisson samet aag par bhoonna. ¹⁰laazim hai ki poora gosht usee raat khaaya jaaay. agar kuchh subah tak bach jaaay to usay jalaana hai. ¹¹khaana khaatay vaqt aisa libaas pahenna jaisay tum safar par ja rahay ho. apnay jootay pahenay rakhna aur haath men safar kay liyay laathee liyay huay tum usay jaldee jaldee khaana. rabb kay fasah kee eed yoon manaana.

¹²main aaj raat misr men say guzaroonga aur har pahelauthay ko jaan say maar doonga, khwaah insaan ka ho ya haivaan ka. yoon main jo rabb hoon misr kay tamaam devtaaon kee adaalat karoonga. ¹³lekin tumhaaray gharon par laga hua khoon tumhaara khaas nishaan hoga. jis jis ghar kay darvaazay par main vah khoon dekhoonga usay chhodta jaaoonga. jab main misr par hamla karoonga to muhalak vaba tum tak naheen pahunchegee. ¹⁴aaj kee raat ko hamesha yaad rakhna. isay nasal-dar-nasal aur har saal rabb kee khaas eed kay taur par manaana.

bekhameeree rotee kee eed

¹⁵saat din tak bekhameeree rotee khaana hai. pahelay din apnay gharon say tamaam khameer nikaal dena. agar koee in saat dinon kay dauraan khameer khaaay to usay qaum men say mitaaya jaaay. ¹⁶is eed kay pahelay aur aakhiree din muqaddas ijtima mun’aqid karna. in tamaam dinon kay dauraan kaam na karna. sirf ek kaam kee ijaazat hai aur vah hai apna khaana tayyaar karna. ¹⁷bekhameeree rotee kee eed manaana laazim hai, kyoonki us din main tumhaaray mut’addid khaandaanon ko misr say nikaal laaya. is liyay yah din nasal-dar-nasal har saal yaad rakhna. ¹⁸pahelay maheenay kay 14ven din kee shaam say lay kar 21ven din kee shaam tak sirf bekhameeree rotee khaana. ¹⁹saat din tak tumhaaray gharon men khameer na paaya jaaay. jo bhee is dauraan khameer khaaay usay israaeel kee jamaaat men say mitaaya jaaay, khwaah vah israaeelee shaheree ho ya ajnabee. ²⁰gharaz, is eed kay dauraan khameer na khaana. jahaan bhee tum rahetay ho vahaan bekhameeree rotee hee khaana hai.

pahelauthon kee halaakat

²¹phir moosa nay tamaam israaeelee buzurgon ko bula kar un say kaha, “jaao, apnay khaandaanon kay liyay bhed ya bakree kay bachchay chun kar unhen fasah kee eed kay liyay zabah karo. ²²zoofay ka guchchha lay kar usay khoon say bharay huay baasan men dubo dena. phir usay lay kar khoon ko chaukhat kay oopar vaalay hissay aur daaen baaen kay baazooon par laga dena. subah tak koee apnay ghar say na niklay. ²³jab rabb misriyon ko maar daalnay kay liyay mulk men say guzrega to vah chaukhat kay oopar vaalay hissay aur daaen baaen kay baazooon par laga hua khoon dekh kar un gharon ko chhod dega. vah halaak karnay vaalay farishtay ko ijaazat naheen dega ki vah tumhaaray gharon men ja kar tumhen halaak karay.

²⁴tum apnee aulaad samet hamesha in hidaayaat par amal karna. ²⁵yah rasm us vaqt bhee ada karna jab tum us mulk men pahunchogay jo rabb tumhen dega. ²⁶aur jab tumhaaray bachchay tum say poochhen ki ham yah eed kyoon manaatay hain ²⁷to un say kaho, ‘yah fasah kee qurbaanee hai jo ham rabb ko pesh kartay hain. kyoonki jab rabb misriyon ko halaak kar raha tha to us nay hamaaray gharon ko chhod diya tha’.”

yah sun kar israaeeliyon nay allaah ko sijda kiya.²⁸phir unhon nay sab kuchh vaisa hee kiya jaisa rabb nay moosa aur haaroon ko bataaya tha.