Ḵẖurooj 20
das ahkaam
1tab allaah nay yah tamaam baaten farmaaeen, 2“main rabb tera khuda hoon jo tujhay mulk-ay-misr kee ghulaamee say nikaal laaya. 3meray siva kisee aur maabood kee parastish na karna. 4apnay liyay but na banaana. kisee bhee cheez kee moorat na banaana, chaahay vah aasmaan men, zameen par ya samundar men ho. 5na buton kee parastish, na un kee khidmat karna, kyoonki main tera rabb ghayoor khuda hoon. jo mujh say nafrat kartay hain unhen main teesree aur chauthee pusht tak saza doonga. 6lekin jo mujh say muhabbat rakhtay aur meray ahkaam pooray kartay hain un par main hazaar pushton tak meharbaanee karoonga.
7rabb apnay khuda ka naam bemaqsad ya ghalat maqsad kay liyay istemaal na karna. jo bhee aisa karta hai usay rabb saza diay baghair naheen chhodega.
8sabat kay din ka khayaal rakhna. usay is tarah manaana ki vah makhsoos-o-muqaddas ho. 9haftay kay pahelay chhah din apna kaam-kaaj kar, 10lekin saatvaan din rabb teray khuda ka aaraam ka din hai. us din kisee tarah ka kaam na karna. na too, na tera beta, na teree betee, na tera naukar, na teree naukraanee aur na teray maveshee. jo pardesee teray darmiyaan raheta hai vah bhee kaam na karay. 11kyoonki rabb nay pahelay chhah din men aasmaan-o-zameen, samundar aur jo kuchh un men hai banaaya lekin saatven din aaraam kiya. is liyay rabb nay sabat kay din ko barkat day kar muqarrar kiya ki vah makhsoos aur muqaddas ho.
12apnay baap aur apnee maan kee izzat karna. phir too us mulk men jo rabb tera khuda tujhay denay vaala hai der tak jeeta rahega.
13qatl na karna.
14zina na karna.
15choree na karna.
16apnay padosee kay baaray men jhootee gavaahee na dena.
17apnay padosee kay ghar ka laalach na karna. na us kee beevee ka, na us kay naukar ka, na us kee naukraanee ka, na us kay bail aur na us kay gadhay ka balki us kee kisee bhee cheez ka laalach na karna.”
log ghabra jaatay hain
18jab baaqee tamaam logon nay baadal kee garaj aur narsingay kee aavaaz sunee aur bijlee kee chamak aur pahaad say uthtay huay dhuen ko dekha to vah khauf kay maaray kaampnay lagay aur pahaad say door khaday ho gaay. 19unhon nay moosa say kaha, “aap hee ham say baat karen to ham sunengay. lekin allaah ko ham say baat na karnay den varna ham mar jaaengay.”
20lekin moosa nay un say kaha, “mat daro, kyoonki rabb tumhen jaanchnay kay liyay aaya hai, taaki us ka khauf tumhaaree aankhon kay saamnay rahay aur tum gunaah na karo.” 21log door hee rahay jabki moosa us gaheree taareekee kay qareeb gaya jahaan allaah tha.