Paidāish 1
duniyā kī taḵẖlīq kā pahalā din : raushnī
1ibtidā meṅ allāh ne āsmān aur zamīn ko banāyā. 2abhī tak zamīn vīrān aur ḵẖālī thī. vah gahare pānī se ḍhakī huī thī jis ke ūpar aṅdherā hī aṅdherā thā. allāh kā rūh pānī ke ūpar maṅḍlā rahā thā.
3phir allāh ne kahā, “raushnī ho jāe” to raushnī paidā ho gaī. 4allāh ne dekhā ki raushnī acchhī hai, aur us ne raushnī ko tārīkī se alag kar diyā. 5allāh ne raushnī ko din kā nām diyā aur tārīkī ko rāt kā. shām huī, phir subah. yūṅ pahalā din guzar gayā.
dūsrā din : āsmān
6allāh ne kahā, “pānī ke darmiyān ek aisā gumbad paidā ho jāe jis se nichlā pānī ūpar ke pānī se alag ho jāe.” 7aisā hī huā. allāh ne ek aisā gumbad banāyā jis se nichlā pānī ūpar ke pānī se alag ho gayā. 8allāh ne gumbad ko āsmān kā nām diyā. shām huī, phir subah. yūṅ dūsrā din guzar gayā.
tīsrā din : ḵẖushk zamīn aur paude
9allāh ne kahā, “jo pānī āsmān ke nīche hai vah ek jagah jamā ho jāe tāki dūsrī taraf ḵẖushk jagah nazar āe.” aisā hī huā. 10allāh ne ḵẖushk jagah ko zamīn kā nām diyā aur jamāshudā pānī ko samundar kā. aur allāh ne dekhā ki yah acchhā hai. 11phir us ne kahā, “zamīn hariyāval paidā kare, aise paude jo bīj rakhte hoṅ aur aise daraḵẖt jin ke phal apnī apnī qism ke bīj rakhte hoṅ.” aisā hī huā. 12zamīn ne hariyāval paidā kī, aise paude jo apnī apnī qism ke bīj rakhte aur aise daraḵẖt jin ke phal apnī apnī qism ke bīj rakhte the. allāh ne dekhā ki yah acchhā hai. 13shām huī, phir subah. yūṅ tīsrā din guzar gayā.
chauthā din : sūraj, chāṅd aur sitāre
14allāh ne kahā, “āsmān par raushniyāṅ paidā ho jāeṅ tāki din aur rāt meṅ imtiyāz ho aur isī tarah muḵẖtalif mausmoṅ, dinoṅ aur sāloṅ meṅ bhī. 15āsmān kī yah raushniyāṅ duniyā ko raushan kareṅ.” aisā hī huā. 16allāh ne do baṛī raushniyāṅ banāīṅ, sūraj jo baṛā thā din par hukūmat karne ko aur chāṅd jo chhoṭā thā rāt par. in ke ilāvā us ne sitāroṅ ko bhī banāyā. 17us ne unheṅ āsmān par rakhā tāki vah duniyā ko raushan kareṅ, 18din aur rāt par hukūmat kareṅ aur raushnī aur tārīkī meṅ imtiyāz paidā kareṅ. allāh ne dekhā ki yah acchhā hai. 19shām huī, phir subah. yūṅ chauthā din guzar gayā.
pāṅchvāṅ din : pānī aur havā ke jāndār
20allāh ne kahā, “pānī ābī jāndāroṅ se bhar jāe aur fizā meṅ parinde uṛte phireṅ.” 21allāh ne baṛe baṛe samundarī jānvar banāe, pānī kī tamām dīgar maḵẖlūqāt aur har qism ke par rakhne vāle jāndār bhī banāe. allāh ne dekhā ki yah acchhā hai. 22us ne unheṅ barkat dī aur kahā, “phalo phūlo aur tādād meṅ baṛhte jāo. samundar tum se bhar jāe. isī tarah parinde zamīn par tādād meṅ baṛh jāeṅ.” 23shām huī, phir subah. yūṅ pāṅchvāṅ din guzar gayā.
chhaṭā din : zamīn par chalne vāle jānvar aur insān
24allāh ne kahā, “zamīn har qism ke jāndār paidā kare : maveshī, reṅgne vāle aur jaṅglī jānvar.” aisā hī huā. 25allāh ne har qism ke maveshī, reṅgne vāle aur jaṅglī jānvar banāe. us ne dekhā ki yah acchhā hai.
26allāh ne kahā, “āo ab ham insān ko apnī sūrat par banāeṅ, vah ham se mushābahat rakhe. vah tamām jānvaroṅ par hukūmat kare, samundar kī machhliyoṅ par, havā ke parindoṅ par, maveshiyoṅ par, jaṅglī jānvaroṅ par aur zamīn par ke tamām reṅgne vāle jāndāroṅ par.” 27yūṅ allāh ne insān ko apnī sūrat par banāyā, allāh kī sūrat par. us ne unheṅ mard aur aurat banāyā. 28allāh ne unheṅ barkat dī aur kahā, “phalo phūlo aur tādād meṅ baṛhte jāo. duniyā tum se bhar jāe aur tum us par iḵẖtiyār rakho. samundar kī machhliyoṅ, havā ke parindoṅ aur zamīn par ke tamām reṅgne vāle jāndāroṅ par hukūmat karo.”
29allāh ne un se mazīd kahā, “tamām bījdār paude aur phaldār daraḵẖt tumhāre hī haiṅ. maiṅ unheṅ tum ko khāne ke liye detā hūṅ. 30is tarah maiṅ tamām jānvaroṅ ko khāne ke liye hariyālī detā hūṅ. jis meṅ bhī jān hai vah yah khā saktā hai, ḵẖwāh vah zamīn par chalne phirne vālā jānūvar, havā kā parindā yā zamīn par reṅgne vālā kyūṅ na ho.” aisā hī huā. 31allāh ne sab par nazar kī to dekhā ki vah bahut acchhā ban gayā hai. shām huī, phir subah. chhaṭā din guzar gayā.