Paidāish 19

sadūm aur amūrā kī tabāhī

¹shām ke vaqt yah do farishte sadūm pahuṅche. lūt shahar ke darvāze par baiṭhā thā. jab us ne unheṅ dekhā to khaṛe ho kar un se milne gayā aur muṅh ke bal gir kar sijdā kiyā. ²us ne kahā, “sāhibo, apne bande ke ghar tashrīf lāeṅ tāki apne pāoṅ dho kar rāt ko ṭhahareṅ aur phir kal subah-savere uṭh kar apnā safar jārī rakheṅ.” unhoṅ ne kahā, “koī bāt nahīṅ, ham chauk meṅ rāt guzāreṅge.” ³lekin lūt ne unheṅ bahut majbūr kiyā, aur āḵẖirkār vah us ke sāth us ke ghar āe. us ne un ke liye khānā pakāyā aur beḵẖamīrī roṭī banāī. phir unhoṅ ne khānā khāyā.

⁴vah abhī sone ke liye leṭe nahīṅ the ki shahar ke javānoṅ se le kar būṛhoṅ tak tamām mardoṅ ne lūt ke ghar ko gher liyā. ⁵unhoṅ ne āvāz de kar lūt se kahā, “vah ādmī kahāṅ haiṅ jo rāt ke vaqt tere pās āe? un ko bāhar le ā tāki ham un ke sāth harāmkārī kareṅ.”

⁶lūt un se milne bāhar gayā. us ne apne pīchhe darvāzā band kar liyā ⁷aur kahā, “mere bhāiyo, aisā mat karo, aisī badkārī na karo. ⁸dekho, merī do kuṅvārī beṭiyāṅ haiṅ. unheṅ maiṅ tumhāre pās bāhar le ātā hūṅ. phir jo jī chāhe un ke sāth karo. lekin in ādmiyoṅ ko chhoṛ do, kyūṅki vah mere mehamān haiṅ.”

⁹unhoṅ ne kahā, “rāste se haṭ jā! dekho, yah shaḵẖs jab hamāre pās āyā thā to ajnabī thā, aur ab yah ham par hākim bannā chāhatā hai. ab tere sāth un se ziyādā burā sulūk kareṅge.” vah use majbūr karte karte darvāze ko toṛne ke liye āge baṛhe. ¹⁰lekin ain vaqt par andar ke ādmī lūt ko pakaṛ kar andar le āe, phir darvāzā dubārā band kar diyā. ¹¹unhoṅ ne chhoṭoṅ se le kar baṛoṅ tak bāhar ke tamām ādmiyoṅ ko aṅdhā kar diyā, aur vah darvāze ko ḍhūṅḍte ḍhūṅḍte thak gae.

¹²donoṅ ādmiyoṅ ne lūt se kahā, “kyā terā koī aur rishtedār is shahar meṅ rahatā hai, maslan koī dāmād yā beṭā-beṭī? sab ko sāth le kar yahāṅ se chalā jā, ¹³kyūṅki ham yah maqām tabāh karne ko haiṅ. is ke bāshindoṅ kī badī ke bāis logoṅ kī āheṅ buland ho kar rabb ke huzūr pahuṅch gaī haiṅ, is liye us ne hameṅ is ko tabāh karne ke liye bhejā hai.”

¹⁴lūt ghar se niklā aur apne dāmādoṅ se bāt kī jin kā us kī beṭiyoṅ ke sāth rishtā ho chukā thā. us ne kahā, “jaldī karo, is jagah se niklo, kyūṅki rabb is shahar ko tabāh karne ko hai.” lekin us ke dāmādoṅ ne ise mazāq hī samjhā.

¹⁵jab pau phaṭne lagī to donoṅ ādmiyoṅ ne lūt ko bahut samjhāyā aur kahā, “jaldī kar! apnī bīvī aur donoṅ beṭiyoṅ ko sāth le kar chalā jā, varnā jab shahar ko sazā dī jāegī to tū bhī halāk ho jāegā.” ¹⁶to bhī vah jhijaktā rahā. āḵẖirkār donoṅ ne lūt, us kī bīvī aur beṭiyoṅ ke hāth pakaṛ kar unheṅ shahar ke bāhar tak pahuṅchā diyā, kyūṅki rabb ko lūt par taras ātā thā.

¹⁷jūṅ hī vah unheṅ bāhar le āe un meṅ se ek ne kahā, “apnī jān bachā kar chalā jā. pīchhe muṛ kar na dekhnā. maidān meṅ kahīṅ na ṭhaharnā balki pahāṛoṅ meṅ panāh lenā, varnā tū halāk ho jāegā.”

¹⁸lekin lūt ne un se kahā, “nahīṅ mere āqā, aisā na ho. ¹⁹tere bande ko terī nazar-e-karam hāsil huī hai aur tū ne merī jān bachāne meṅ bahut meharbānī kar dikhāī hai. lekin maiṅ pahāṛoṅ meṅ panāh nahīṅ le saktā. vahāṅ pahuṅchne se pahale yah musībat mujh par ān paṛegī aur maiṅ halāk ho jāūṅgā. ²⁰dekh, qarīb hī ek chhoṭā qasbā hai. vah itnā nazdīk hai ki maiṅ us taraf hijrat kar saktā hūṅ. mujhe vahāṅ panāh lene de. vah chhoṭā hī hai, nā? phir merī jān bachegī.”

²¹us ne kahā, “chalo, ṭhīk hai. terī yah daraḵẖwāst bhī manzūr hai. maiṅ yah qasbā tabāh nahīṅ karūṅgā. ²²lekin bhāg kar vahāṅ panāh le, kyūṅki jab tak tū vahāṅ pahuṅch na jāe maiṅ kuchh nahīṅ kar saktā.” is liye qasbe kā nām zuġar yānī chhoṭā hai.

²³jab lūt zuġar pahuṅchā to sūraj niklā huā thā. ²⁴tab rabb ne āsmān se sadūm aur amūrā par gaṅdhak aur āg barsāī. ²⁵yūṅ us ne us pūre maidān ko us ke shaharoṅ, bāshindoṅ aur tamām hariyālī samet tabāh kar diyā. ²⁶lekin farār hote vaqt lūt kī bīvī ne pīchhe muṛ kar dekhā to vah fauran namak kā satūn ban gaī.

²⁷ibrāhīm subah-savere uṭh kar us jagah vāpas āyā jahāṅ vah kal rabb ke sāmne khaṛā huā thā. ²⁸jab us ne nīche sadūm, amūrā aur pūrī vādī kī taraf nazar kī to vahāṅ se bhaṭṭe kā sā dhuāṅ uṭh rahā thā.

²⁹yūṅ allāh ne ibrāhīm ko yād kiyā jab us ne us maidān ke shahar tabāh kie. kyūṅki us ne unheṅ tabāh karne se pahale lūt ko jo un meṅ ābād thā vahāṅ se nikāl lāyā.

lūt aur us kī beṭiyāṅ

³⁰lūt aur us kī beṭiyāṅ ziyādā der tak zuġar meṅ na ṭhahare. vah ravānā ho kar pahāṛoṅ meṅ ābād hue, kyūṅki lūt zuġar meṅ rahane se ḍartā thā. vahāṅ unhoṅ ne ek ġār ko apnā ghar banā liyā.

³¹ek din baṛī beṭī ne chhoṭī se kahā, “abbū būṛhā hai aur yahāṅ koī mard hai nahīṅ jis ke zarīe hamāre bacche paidā ho sakeṅ. ³²āo, ham abbū ko mai pilāeṅ. jab vah nashe meṅ dhut ho to ham us ke sāth hambistar ho kar apne liye aulād paidā kareṅ tāki hamārī nasal qāim rahe.”

³³us rāt unhoṅ ne apne bāp ko mai pilāī. jab vah nashe meṅ thā to baṛī beṭī andar jā kar us ke sāth hambistar huī. chūṅki lūt hosh meṅ nahīṅ thā is liye use kuchh bhī mālūm na huā. ³⁴agle din baṛī bahan ne chhoṭī bahan se kahā, “pichhlī rāt maiṅ abbū se hambistar huī. āo, āj rāt ko ham use dubārā mai pilāeṅ. jab vah nashe meṅ dhut ho to tum us ke sāth hambistar ho kar apne liye aulād paidā karnā tāki hamārī nasal qāim rahe.” ³⁵chunāṅche unhoṅ ne us rāt bhī apne bāp ko mai pilāī. jab vah nashe meṅ thā to chhoṭī beṭī uṭh kar us ke sāth hambistar huī. is bār bhī vah hosh meṅ nahīṅ thā, is liye use kuchh bhī mālūm na huā.

³⁶yūṅ lūt kī beṭiyāṅ apne bāp se ummīd se huīṅ. ³⁷baṛī beṭī ke hāṅ beṭā paidā huā. us ne us kā nām moāb rakhā. us se moābī nikle haiṅ. ³⁸chhoṭī beṭī ke hāṅ bhī beṭā paidā huā. us ne us kā nām bin-ammī rakhā. us se ammonī nikle haiṅ.