Paidāish 23
sārā kī vafāt
1sārā 127 sāl kī umr meṅ habrūn meṅ intiqāl kar gaī. 2us zamāne meṅ habrūn kā nām qiryat-arbā thā, aur vah mulk-e-kan’ān meṅ thā. ibrāhīm ne us ke pās ā kar mātam kiyā. 3phir vah janāze ke pās se uṭhā aur hittiyoṅ se bāt kī. us ne kahā, 4“maiṅ āp ke darmiyān pardesī aur ġairshaharī kī haisiyat se rahatā hūṅ. mujhe qabr ke liye zamīn becheṅ tāki apnī bīvī ko apne ghar se le jā kar dafan kar sakūṅ.” 5-6 hittiyoṅ ne javāb diyā, “hamāre āqā, hamārī bāt suneṅ! āp hamāre darmiyān allāh ke raīs haiṅ. apnī bīvī ko hamārī behtarīn qabr meṅ dafan kareṅ. ham meṅ se koī nahīṅ jo āp se apnī qabr kā inkār karegā.”
7ibrāhīm uṭhā aur mulk ke bāshindoṅ yānī hittiyoṅ ke sāmne tāzīman jhuk gayā. 8us ne kahā, “agar āp is ke liye tayyār haiṅ ki maiṅ apnī bīvī ko apne ghar se le jā kar dafan karūṅto suhar ke beṭe ifron se merī sifārish kareṅ 9ki vah mujhe makfīlā kā ġār bech de. vah us kā hai aur us ke khet ke kināre par hai. maiṅ us kī pūrī qīmat dene ke liye tayyār hūṅ tāki āp ke darmiyān rahate hue mere pās qabr bhī ho.”
10ifron hittiyoṅ kī jamāat meṅ maujūd thā. ibrāhīm kī daraḵẖwāst par us ne un tamām hittiyoṅ ke sāmne jo shahar ke darvāze par jamā the javāb diyā, 11“nahīṅ, mere āqā! merī bāt suneṅ. maiṅ āp ko yah khet aur us meṅ maujūd ġār de detā hūṅ. sab jo hāzir haiṅ mere gavāh haiṅ, maiṅ yah āp ko detā hūṅ. apnī bīvī ko vahāṅ dafan kar deṅ.”
12ibrāhīm dubārā mulk ke bāshindoṅ ke sāmne adban jhuk gayā. 13us ne sab ke sāmne ifron se kahā, “meharbānī karke merī bāt par ġaur kareṅ. maiṅ khet kī pūrī qīmat adā karūṅgā. use qabūl kareṅ tāki vahāṅ apnī bīvī ko dafan kar sakūṅ.” 14-15 ifron ne javāb diyā, “mere āqā, suneṅ. is zamīn kī qīmat sirf 400 chāṅdī ke sikke hai. [a] taqrīban sāḍhe chār kilogrām chāṅdī. āp ke aur mere darmiyān yah kyā hai? apnī bīvī ko dafan kar deṅ.”
16ibrāhīm ne ifron kī matlūbā qīmat mān lī aur sab ke sāmne chāṅdī ke 400 sikke tol kar ifron ko de die. is ke liye us ne us vaqt ke rāij bāṭ istemāl kie. 17chunāṅche makfīlā meṅ ifron kī zamīn ibrāhīm kī milkiyat ho gaī. yah zamīn mamre ke mashriq meṅ thī. us meṅ khet, khet kā ġār aur khet kī hudūd meṅ maujūd tamām daraḵẖt shāmil the. 18hittiyoṅ kī pūrī jamāat ne jo shahar ke darvāze par jamā thī zamīn ke intiqāl kī tasdīq kī. 19phir ibrāhīm ne apnī bīvī sārā ko mulk-e-kan’ān ke us ġār meṅ dafan kiyā jo mamre yānī habrūn ke mashriq meṅ vāqe makfīlā ke khet meṅ thā. 20is tarīqe se yah khet aur us kā ġār hittiyoṅ se ibrāhīm ke nām par muntaqil kar diyā gayā tāki us ke pās qabr ho.