Paidāish 4
qābīl aur hābīl
1ādam havvā se hambistar huā to un kā pahalā beṭā qābīl paidā huā. havvā ne kahā, “rabb kī madad se maiṅ ne ek mard hāsil kiyā hai.” 2bād meṅ qābīl kā bhāī hābīl paidā huā. hābīl bheṛ-bakriyoṅ kā charvāhā ban gayā jabki qābīl khetībāṛī karne lagā.
pahalā qatl
3kuchh der ke bād qābīl ne rabb ko apnī fasloṅ meṅ se kuchh pesh kiyā. 4hābīl ne bhī nazrānā pesh kiyā, lekin us ne apnī bheṛ-bakriyoṅ ke kuchh pahalauṭhe un kī charbī samet chaṛhāe. hābīl kā nazrānā rabb ko pasand āyā, 5magar qābīl kā nazrānā manzūr na huā. yah dekh kar qābīl baṛe ġusse meṅ ā gayā, aur us kā muṅh bigaṛ gayā. 6rabb ne pūchhā, “tū ġusse meṅ kyūṅ ā gayā hai? terā muṅh kyūṅ laṭkā huā hai? 7kyā agar tū acchhī nīyat rakhtā hai to apnī nazar uṭhā kar merī taraf nahīṅ dekh sakegā? lekin agar acchhī nīyat nahīṅ rakhtā to ḵẖabardār! gunāh darvāze par dabkā baiṭhā hai aur tujhe chāhatā hai. lekin terā farz hai ki us par ġālib āe.”
8ek din qābīl ne apne bhāī se kahā, “āo, ham bāhar khule maidān meṅ chaleṅ.” aur jab vah khule maidān meṅ the to qābīl ne apne bhāī hābīl par hamlā karke use mār ḍālā.
9tab rabb ne qābīl se pūchhā, “terā bhāī hābīl kahāṅ hai?” qābīl ne javāb diyā, “mujhe kyā patā! kyā apne bhāī kī dekh-bhāl karnā merī zimmādārī hai?” 10rabb ne kahā, “tū ne kyā kiyā hai? tere bhāī kā ḵẖūn zamīn meṅ se pukār kar mujh se faryād kar rahā hai. 11is liye tujh par lānat hai aur zamīn ne tujhe radd kiyā hai, kyūṅki zamīn ko muṅh khol kar tere hāth se qatl kie hue bhāī kā ḵẖūn pīnā paṛā. 12ab se jab tū khetībāṛī karegā to zamīn apnī paidāvār dene se inkār karegī. tū mafrūr ho kar mārā mārā phiregā.” 13qābīl ne kahā, “merī sazā nihāyat saḵẖt hai. maiṅ ise bardāsht nahīṅ kar pāūṅgā. 14āj tū mujhe zamīn kī satah se bhagā rahā hai aur mujhe tere huzūr se bhī chhup jānā hai. maiṅ mafrūr kī haisiyat se mārā mārā phirtā rahūṅgā, is liye jis ko bhī patā chalegā ki maiṅ kahāṅ hūṅ vah mujhe qatl kar ḍālegā.” 15lekin rabb ne us se kahā, “hargiz nahīṅ. jo qābīl ko qatl kare us se sāt gunā badlā liyā jāegā.” phir rabb ne us par ek nishān lagāyā tāki jo bhī qābīl ko dekhe vah use qatl na kar de. 16is ke bād qābīl rabb ke huzūr se chalā gayā aur adan ke mashriq kī taraf nod ke ilāqe meṅ jā basā.
qābīl kā ḵẖāndān
17qābīl kī bīvī hāmilā huī. beṭā paidā huā jis kā nām hanūk rakhā gayā. qābīl ne ek shahar tāmīr kiyā aur apne beṭe kī ḵẖushī meṅ us kā nām hanūk rakhā. 18hanūk kā beṭā īrād thā, īrād kā beṭā mahūyāel, mahūyāel kā beṭā matūsāel aur matūsāel kā beṭā lamak thā. 19lamak matūsāel kī do bīviyāṅ thīṅ, adā aur zillā. 20adā kā beṭā yābal thā. us kī nasal ke log ḵẖaimoṅ meṅ rahate aur maveshī pālte the. 21yābal kā bhāī yūbal thā. us kī nasal ke log sarod [a] lafzī tarjumā : chaṅg. chūṅki yah sāz barr-e-saġīr meṅ kam hī istemāl hotā hai, is liye mutarjamīn ne is kī jagah lafz “sarod” istemāl kiyā hai. aur bāṅsrī bajāte the. 22zillā ke bhī beṭā paidā huā jis kā nām tūbal-qābīl thā. vah lohār thā. us kī nasal ke log pītal aur lohe kī chīzeṅ banāte the. tūbal-qābīl kī bahan kā nām nāmā thā. 23ek din lamak ne apnī bīviyoṅ se kahā, “adā aur zillā, merī bāt suno! lamak kī bīviyo, mere alfāz par ġaur karo! 24ek ādmī ne mujhe zaḵẖmī kiyā to maiṅ ne use mār ḍālā. ek laṛke ne mere choṭ lagāī to maiṅ ne use qatl kar diyā. jo qābīl ko qatl kare us se sāt gunā badlā liyā jāegā, lekin jo lamak ko qatl kare us se satattar gunā badlā liyā jāegā.”
set aur anūs
25ādam aur havvā kā ek aur beṭā paidā huā. havvā ne us kā nām set rakh kar kahā, “allāh ne mujhe hābīl kī jagah jise qābīl ne qatl kiyā ek aur beṭā baḵẖshā hai.” 26set ke hāṅ bhī beṭā paidā huā. us ne us kā nām anūs rakhā.
un dinoṅ meṅ log rabb kā nām le kar ibādat karne lage.