Yashāyāh 52

zanjīroṅ ko toṛ!

1ai siyyūn, uṭh, jāg uṭh! apnī tāqat se mulabbas ho jā! ai muqaddas shahar yarūshalam, apne shāndār kapṛe se ārāstā ho jā! āindā kabhī bhī ġairmaḵẖtūn yā nāpāk shaḵẖs tujh meṅ dāḵẖil nahīṅ hogā. 2ai yarūshalam, apne āp se gard jhāṛkar khaṛī ho jā aur taḵẖt par baiṭh jā. ai giriftār kī huī siyyūn beṭī, apnī gardan kī zanjīroṅ ko khol kar un se āzād ho jā! 3kyūṅki rabb farmātā hai, “tumheṅ muft meṅ bechā gayā, aur ab tumheṅ paise die baġair chhuṛāyā jāegā.”

4kyūṅki rabb qādir-e-mutlaq farmātā hai, “qadīm zamāne meṅ merī qaum misr chalī gaī tāki vahāṅ pardes meṅ rahe. bād meṅ asūr ne bilāvajah us par zulm kiyā hai.” 5rabb farmātā hai, “ab jo ziyādtī merī qaum se ho rahī hai us kā mere sāth kyā vāstā hai?” rabb farmātā hai, “merī qaum to muft meṅ chhīn lī gaī hai, aur us par hukūmat karne vāle sheḵẖī mār kar pūrā din mere nām par kufr bakte haiṅ. 6chunāṅche merī qaum mere nām ko jān legī, us din vah pahachān legī ki maiṅ hī vahī hūṅ jo farmātā hai, ‘maiṅ hāzir hūṅ’!”

7us ke qadam kitne piyāre haiṅ jo pahāṛoṅ par chalte hue ḵẖushḵẖabarī sunātā hai. kyūṅki vah amn-o-amān, ḵẖushī kā paiġām aur najāt kā elān karegā, vah siyyūn se kahegā, “terā ḵẖudā bādshāh hai!” 8sun! tere paharedār āvāz buland kar rahe haiṅ, vah mil kar ḵẖushī ke nāre lagā rahe haiṅ. kyūṅki jab rabb koh-e-siyyūn par vāpas āegā to vah apnī āṅkhoṅ se is kā mushāhadā kareṅge.

9ai yarūshalam ke khaṅḍarāt, shādiyānā bajāo, ḵẖushī ke gīt gāo! kyūṅki rabb ne apnī qaum ko tasallī dī hai, us ne ivzānā de kar yarūshalam ko chhuṛāyā hai. 10rabb apnī muqaddas qudrat tamām aqvām par zāhir karegā, duniyā kī intihā tak sab hamāre ḵẖudā kī najāt dekheṅge.

11jāo, chale jāo! vahāṅ se nikal jāo! kisī bhī nāpāk chīz ko na chhūnā. jo rabb kā sāmān uṭhāe chal rahe haiṅ vah vahāṅ se nikal kar pāk-sāf raheṅ. 12lekin lāzim nahīṅ ki tum bhāg kar ravānā ho jāo. tumheṅ achānak farār hone kī zarūrat nahīṅ hogī, kyūṅki rabb tumhāre āge bhī chalegā aur tumhāre pīchhe bhī. yūṅ isrāīl kā ḵẖudā donoṅ taraf se tumhārī hifāzat karegā.

rabb kā paiġambar hamāre gunāhoṅ ko uṭhāegā

13dekho, merā ḵẖādim kāmyāb hogā. vah sarbuland, mumtāz aur bahut sarfarāz hogā. 14tujhe dekh kar bahutoṅ ke roṅgṭe khaṛe ho gae. kyūṅki us kī shakl itnī ḵẖarāb thī, us kī sūrat kisī bhī insān se kahīṅ ziyādā bigṛī huī thī. 15lekin ab bahut sī qaumeṅ use dekh kar hakkā-bakkā ho jāeṅgī, bādshāh dam-ba-ḵẖud rah jāeṅge. kyūṅki jo kuchh unheṅ nahīṅ batāyā gayā use vah dekheṅge, aur jo kuchh unhoṅ ne nahīṅ sunā us kī unheṅ samajh āegī.