Ahabār 1

bhasm hone vālī qurbānī

¹rabb ne mulāqāt ke ḵẖaime meṅ se mūsā ko bulā kar kahā ²ki isrāīliyoṅ ko ittilā de,

“agar tum meṅ se koī rabb ko qurbānī pesh karnā chāhe to vah apne gāy-bailoṅ yā bheṛ-bakriyoṅ meṅ se jānvar chun le.

³agar vah apne gāy-bailoṅ meṅ se bhasm hone vālī qurbānī chaṛhānā chāhe to vah beaib bail chun kar use mulāqāt ke ḵẖaime ke darvāze par pesh kare tāki rabb use qabūl kare. ⁴qurbānī pesh karne vālā apnā hāth jānvar ke sar par rakhe to yah qurbānī maqbūl ho kar us kā kaffārā degī. ⁵qurbānī pesh karne vālā bail ko vahāṅ rabb ke sāmne zabah kare. phir hārūn ke beṭe jo imām haiṅ us kā ḵẖūn rabb ko pesh karke use darvāze par kī qurbāngāh ke chār pahalūoṅ par chhiṛkeṅ. ⁶is ke bād qurbānī pesh karne vālā khāl utār kar jānvar ke ṭukṛe ṭukṛe kare. ⁷imām qurbāngāh par āg lagā kar us par tartīb se lakṛiyāṅ chuneṅ. ⁸us par vah jānvar ke ṭukṛe sar aur charbī samet rakheṅ. ⁹lāzim hai ki qurbānī pesh karne vālā pahale jānvar kī aṅtaṛiyāṅ aur piṅḍaliyāṅ dhoe, phir imām pūre jānvar ko qurbāngāh par jalā de. is jalne vālī qurbānī kī ḵẖushbū rabb ko pasand hai.

¹⁰agar bhasm hone vālī qurbānī bheṛ-bakriyoṅ meṅ se chunī jāe to vah beaib nar ho. ¹¹pesh karne vālā use rabb ke sāmne qurbāngāh kī shimālī simt meṅ zabah kare. phir hārūn ke beṭe jo imām haiṅ us kā ḵẖūn qurbāngāh ke chār pahalūoṅ par chhiṛkeṅ. ¹²is ke bād pesh karne vālā jānvar ke ṭukṛe ṭukṛe kare aur imām yah ṭukṛe sar aur charbī samet qurbāngāh kī jaltī huī lakṛiyoṅ par tartīb se rakhe. ¹³lāzim hai ki qurbānī pesh karne vālā pahale jānvar kī aṅtaṛiyāṅ aur piṅḍaliyāṅ dhoe, phir imām pūre jānvar ko rabb ko pesh karke qurbāngāh par jalā de. is jalne vālī qurbānī kī ḵẖushbū rabb ko pasand hai.

¹⁴agar bhasm hone vālī qurbānī parindā ho to vah qumrī yā javān kabūtar ho. ¹⁵imām use qurbāngāh ke pās le āe aur us kā sar maroṛ kar qurbāngāh par jalā de. vah us kā ḵẖūn yūṅ nikalne de ki vah qurbāngāh kī ek taraf se nīche ṭapke. ¹⁶vah us kā poṭā aur jo us meṅ hai dūr karke qurbāngāh kī mashriqī simt meṅ phaiṅk de, vahāṅ jahāṅ rākh phaiṅkī jātī hai. ¹⁷use pesh karte vaqt imām us ke par pakaṛ kar parinde ko phāṛ ḍāle, lekin yūṅ ki vah bilkul ṭukṛe ṭukṛe na ho jāe. phir imām use qurbāngāh par jaltī huī lakṛiyoṅ par jalā de. is jalne vālī qurbānī kī ḵẖushbū rabb ko pasand hai.