Ahabār 4
gunāh kī qurbānī
1rabb ne mūsā se kahā, 2“isrāīliyoṅ ko batānā ki jo bhī ġairirādī taur par gunāh karke rabb ke kisī hukm ko toṛe vah yah kare :
imām ke liye gunāh kī qurbānī
3agar imām-e-āzam gunāh kare aur natīje meṅ pūrī qaum qusūrvār ṭhahare to phir vah rabb ko ek beaib javān bail le kar gunāh kī qurbānī ke taur par pesh kare. 4vah javān bail ko mulāqāt ke ḵẖaime ke darvāze ke pās le āe aur apnā hāth us ke sar par rakh kar use rabb ke sāmne zabah kare. 5phir vah jānvar ke ḵẖūn meṅ se kuchh le kar ḵẖaime meṅ jāe. 6vahāṅ vah apnī uṅglī us meṅ ḍāl kar use sāt bār rabb ke sāmne yānī muqaddastarīn kamre ke parde par chhiṛke. 7phir vah ḵẖaime ke andar kī us qurbāngāh ke chāroṅ sīṅgoṅ par ḵẖūn lagāe jis par baḵẖūr jalāyā jātā hai. bāqī ḵẖūn vah bāhar ḵẖaime ke darvāze par kī us qurbāngāh ke pāe par uṅḍele jis par jānvar jalāe jāte haiṅ. 8javān bail kī sārī charbī, aṅtaṛiyoṅ par kī sārī charbī, 9gurde us charbī samet jo un par aur kamar ke qarīb hotī hai aur joṛkalejī ko gurdoṅ ke sāth hī alag karnā hai. 10yah bilkul usī tarah kiyā jāe jis tarah us bail ke sāth kiyā gayā jo salāmatī kī qurbānī ke liye pesh kiyā jātā hai. imām yah sab kuchh us qurbāngāh par jalā de jis par jānvar jalāe jāte haiṅ. 11lekin vah us kī khāl, us kā sārā gosht, sar aur piṅḍaliyāṅ, aṅtaṛiyāṅ aur un kā gobar 12ḵẖaimāgāh ke bāhar le jāe. yah chīzeṅ us pāk jagah par jahāṅ qurbāniyoṅ kī rākh phaiṅkī jātī hai lakṛiyoṅ par rakh kar jalā denī haiṅ.
qaum ke liye gunāh kī qurbānī
13agar isrāīl kī pūrī jamāat ne ġairirādī taur par gunāh karke rabb ke kisī hukm se tajāvuz kiyā hai aur jamāat ko mālūm nahīṅ thā to bhī vah qusūrvār hai. 14jab logoṅ ko patā lage ki ham ne gunāh kiyā hai to jamāat mulāqāt ke ḵẖaime ke pās ek javān bail le āe aur use gunāh kī qurbānī ke taur par pesh kare. 15jamāat ke buzurg rabb ke sāmne apne hāth us ke sar par rakheṅ, aur vah vahīṅ zabah kiyā jāe. 16phir imām-e-āzam jānvar ke ḵẖūn meṅ se kuchh le kar mulāqāt ke ḵẖaime meṅ jāe. 17vahāṅ vah apnī uṅglī us meṅ ḍāl kar use sāt bār rabb ke sāmne yānī muqaddastarīn kamre ke parde par chhiṛke. 18phir vah ḵẖaime ke andar kī us qurbāngāh ke chāroṅ sīṅgoṅ par ḵẖūn lagāe jis par baḵẖūr jalāyā jātā hai. bāqī ḵẖūn vah bāhar ḵẖaime ke darvāze kī us qurbāngāh ke pāe par uṅḍele jis par jānvar jalāe jāte haiṅ. 19is ke bād vah us kī tamām charbī nikāl kar qurbāngāh par jalā de. 20us bail ke sāth vah sab kuchh kare jo use apne zātī ġairirādī gunāh ke liye karnā hotā hai. yūṅ vah logoṅ kā kaffārā degā aur unheṅ muāfī mil jāegī. 21āḵẖir meṅ vah bail ko ḵẖaimāgāh ke bāhar le jā kar us tarah jalā de jis tarah use apne liye bail ko jalā denā hotā hai. yah jamāat kā gunāh dūr karne kī qurbānī hai.
qaum ke rāhanumā ke liye gunāh kī qurbānī
22agar koī sardār ġairirādī taur par gunāh karke rabb ke kisī hukm se tajāvuz kare aur yūṅ qusūrvār ṭhahare to 23jab bhī use patā lage ki mujh se gunāh huā hai to vah qurbānī ke liye ek beaib bakrā le āe. 24vah apnā hāth bakre ke sar par rakh kar use vahāṅ zabah kare jahāṅ bhasm hone vālī qurbāniyāṅ zabah kī jātī haiṅ. yah gunāh kī qurbānī hai. 25imām apnī uṅglī ḵẖūn meṅ ḍāl kar use us qurbāngāh ke chāroṅ sīṅgoṅ par lagāe jis par jānvar jalāe jāte haiṅ. bāqī ḵẖūn vah qurbāngāh ke pāe par uṅḍele. 26phir vah us kī sārī charbī qurbāngāh par us tarah jalā de jis tarah vah salāmatī kī qurbāniyoṅ kī charbī jalā detā hai. yūṅ imām us ādmī kā kaffārā degā aur use muāfī hāsil ho jāegī.
ām logoṅ ke liye gunāh kī qurbānī
27agar koī ām shaḵẖs ġairirādī taur par gunāh karke rabb ke kisī hukm se tajāvuz kare aur yūṅ qusūrvār ṭhahare to 28jab bhī use patā lage ki mujh se gunāh huā hai to vah qurbānī ke liye ek beaib bakrī le āe. 29vah apnā hāth bakrī ke sar par rakh kar use vahāṅ zabah kare jahāṅ bhasm hone vālī qurbāniyāṅ zabah kī jātī haiṅ. 30imām apnī uṅglī ḵẖūn meṅ ḍāl kar use us qurbāngāh ke chāroṅ sīṅgoṅ par lagāe jis par jānvar jalāe jāte haiṅ. bāqī ḵẖūn vah qurbāngāh ke pāe par uṅḍele. 31phir vah us kī sārī charbī us tarah nikāle jis tarah vah salāmatī kī qurbāniyoṅ kī charbī nikāltā hai. is ke bād vah use qurbāngāh par jalā de. aisī qurbānī kī ḵẖushbū rabb ko pasand hai. yūṅ imām us ādmī kā kaffārā degā aur use muāfī hāsil ho jāegī.
32agar vah gunāh kī qurbānī ke liye bheṛ kā bacchā lānā chāhe to vah beaib mādā ho. 33vah apnā hāth us ke sar par rakh kar use vahāṅ zabah kare jahāṅ bhasm hone vālī qurbāniyāṅ zabah kī jātī haiṅ. 34imām apnī uṅglī ḵẖūn meṅ ḍāl kar use us qurbāngāh ke chāroṅ sīṅgoṅ par lagāe jis par jānvar jalāe jāte haiṅ. bāqī ḵẖūn vah qurbāngāh ke pāe par uṅḍele. 35phir vah us kī tamām charbī us tarah nikāle jis tarah salāmatī kī qurbānī ke liye zabah kie gae javān meṅḍhe kī charbī nikālī jātī hai. is ke bād imām charbī ko qurbāngāh par un qurbāniyoṅ samet jalā de jo rabb ke liye jalāī jātī haiṅ. yūṅ imām us ādmī kā kaffārā degā aur use muāfī mil jāegī.