Looqa 15

khoee huee bhed

1ab aisa tha ki tamaam taiks lenay vaalay aur gunaahgaar eesa kee baaten sunnay kay liyay us kay paas aatay thay. 2yah dekh kar fareesee aur shareeat kay aalim budbudaanay lagay, “yah aadmee gunaahgaaron ko khush’aamadeed kah kar un kay saath khaana khaata hai.” 3is par eesa nay unhen yah tamseel sunaaee,

4“farz karo ki tum men say kisee kee sau bheden hain. lekin ek gum ho jaatee hai. ab maalik kya karega? kya vah baaqee 99 bheden khulay maidaan men chhod kar gumshuda bhed ko dhoondnay naheen jaaega? zaroor jaaega, balki jab tak usay vah bhed mil na jaaay vah us kee talaash men rahega. 5phir vah khush ho kar usay apnay kandhon par utha lega. 6yoon chaltay chaltay vah apnay ghar pahunch jaaega aur vahaan apnay doston aur hamsaaiyon ko bula kar un say kahega, ‘meray saath khushee manaao! kyoonki mujhay apnee khoee huee bhed mil gaee hai.’ 7main tum ko bataata hoon ki aasmaan par bilkul isee tarah khushee manaaee jaaegee jab ek hee gunaahgaar tauba karega. aur yah khushee us khushee kee nisbat ziyaada hogee jo un 99 afraad kay baais manaaee jaaegee jinhen tauba karnay kee zaroorat hee naheen thee.

gumshuda sikkaa

8ya farz karo ki kisee aurat kay paas das sikkay hon lekin ek sikka gum ho jaaay. ab aurat kya karegee? kya vah charaagh jala kar aur ghar men jhaadoo day day kar badee ehatiyaat say sikkay ko talaash naheen karegee? zaroor karegee, balki vah us vaqt tak dhoondtee rahegee jab tak usay sikka mil na jaaay. 9jab usay sikka mil jaaega to vah apnee saheliyon aur hamsaaiyon ko bula kar un say kahegee, ‘meray saath khushee manaao! kyoonki mujhay apna gumshuda sikka mil gaya hai.’ 10main tum ko bataata hoon ki bilkul isee tarah allaah kay farishton kay saamnay khushee manaaee jaatee hai jab ek bhee gunaahgaar tauba karta hai.”

gumshuda betaa

11eesa nay apnee baat jaaree rakhee. “kisee aadmee kay do betay thay. 12in men say chhotay nay baap say kaha, ‘ai baap, meeraas ka mera hissa day den.’ is par baap nay donon men apnee milkiyat taqseem kar dee. 13thoday dinon kay baad chhota beta apna saara saamaan samet kar apnay saath kisee doordaraaz mulk men lay gaya. vahaan us nay ayyaashee men apna poora maal-o-mata uda diya. 14sab kuchh zaaay ho gaya to us mulk men sakht kaal pada. ab vah zarooratmand honay laga. 15nateejay men vah us mulk kay kisee baashinday kay haan ja pada jis nay usay sooaron ko charaanay kay liyay apnay kheton men bhej diya. 16vahaan vah apna pet un phaliyon say bharnay kee shadeed khwaahish rakhta tha jo sooar khaatay thay, lekin usay is kee bhee ijaazat na milee. 17phir vah hosh men aaya. vah kahenay laga, meray baap kay kitnay mazdooron ko kasrat say khaana milta hai jabki main yahaan bhooka mar raha hoon. 18main uth kar apnay baap kay paas vaapas chala jaaoonga aur us say kahoonga, ‘ai baap, main nay aasmaan ka aur aap ka gunaah kiya hai. 19ab main is laaiq naheen raha ki aap ka beta kahelaaoon. meharbaanee karkay mujhay apnay mazdooron men rakh len.’ 20phir vah uth kar apnay baap kay paas vaapas chala gaya.

lekin vah ghar say abhee door hee tha ki us kay baap nay usay dekh liya. usay taras aaya aur vah bhaag kar betay kay paas aaya aur galay laga kar usay bosa diya. 21betay nay kaha, ‘ai baap, main nay aasmaan ka aur aap ka gunaah kiya hai. ab main is laaiq naheen raha ki aap ka beta kahelaaoon.’ 22lekin baap nay apnay naukron ko bulaaya aur kaha, ‘jaldee karo, behtareen soot la kar isay pahenaao. is kay haath men angoothee aur paaon men jootay pahena do. 23phir mota-taaza bachhda la kar usay zabah karo taaki ham khaaen aur khushee manaaen, 24kyoonki yah mera beta murda tha ab zinda ho gaya hai, gum ho gaya tha ab mil gaya hai.’ is par vah khushee manaanay lagay.

25is dauraan baap ka bada beta khet men tha. ab vah ghar lauta. jab vah ghar kay qareeb pahuncha to andar say mooseeqee aur naachnay kee aavaazen sunaaee deen. 26us nay kisee naukar ko bula kar poochha, ‘yah kya ho raha hai?’ 27naukar nay javaab diya, ‘aap ka bhaaee a gaya hai aur aap kay baap nay mota-taaza bachhda zabah karvaaya hai, kyoonki usay apna beta saheeh-salaamat vaapas mil gaya hai.’

28yah sun kar bada beta ghussay hua aur andar jaanay say inkaar kar diya. phir baap ghar say nikal kar usay samjhaanay laga. 29lekin us nay javaab men apnay baap say kaha, ‘dekhen, main nay itnay saal aap kee khidmat men sakht mehanat-mashaqqat kee hai aur ek dafa bhee aap kee marzee kee khilaafvarzee naheen kee. to bhee aap nay mujhay is pooray arsay men ek chhota bakra bhee naheen diya ki usay zabah karkay apnay doston kay saath ziyaafat karta. 30lekin joon hee aap ka yah beta aaya jis nay aap kee daulat kasbiyon men uda dee, aap nay us kay liyay mota-taaza bachhda zabah karvaaya.’ 31baap nay javaab diya, ‘beta, aap to har vaqt meray paas rahay hain, aur jo kuchh mera hai vah aap hee ka hai. 32lekin ab zarooree tha ki ham jashn manaaen aur khush hon. kyoonki aap ka yah bhaaee jo murda tha ab zinda ho gaya hai, jo gum ho gaya tha ab mil gaya hai’.”

Looqa 18

fareesee aur taiks lenay vaalay kee tamseel

9baaz log maujood thay jo apnee raastbaazee par bharosa rakhtay aur doosron ko haqeer jaantay thay. unhen eesa nay yah tamseel sunaaee, 10“do aadmee bait-ul-muqaddas men dua karnay aaay. ek fareesee tha aur doosra taiks lenay vaala.

11fareesee khada ho kar yah dua karnay laga, ‘ai khuda, main tera shukr karta hoon ki main baaqee logon kee tarah naheen hoon. na main daakoo hoon, na beinsaaf, na zinaakaar. main is taiks lenay vaalay kee maanind bhee naheen hoon. 12main haftay men do martaba roza rakhta hoon aur tamaam aamdanee ka dasvaan hissa teray liyay makhsoos karta hoon.’

13lekin taiks lenay vaala door hee khada raha. us nay apnee aankhen aasmaan kee taraf uthaanay tak kee jur’at na kee balki apnee chhaatee peet peet kar kahenay laga, ‘ai khuda, mujh gunaahgaar par rahem kar!’ 14main tum ko bataata hoon ki jab donon apnay apnay ghar lautay to fareesee naheen balki yah aadmee allaah kay nazdeek raastbaaz thahera. kyoonki jo bhee apnay aap ko sarfaraaz karay usay past kiya jaaega aur jo apnay aap ko past karay usay sarfaraaz kiya jaaega.”

Marqus 10

andhay baratimaaee kee shifaa

46vah yareehoo pahunch gaay. us men say guzar kar eesa shaagirdon aur ek baday hujoom kay saath baahar nikalnay laga. vahaan ek andha bheek maangnay vaala raastay kay kinaaray baitha tha. us ka naam baratimaaee (timaaee ka beta) tha. 47jab us nay suna ki eesa naasree qareeb hee hai to vah chillaanay laga, “eesa ibn-ay-daaood, mujh par rahem karen!”

48bahut say logon nay usay daant kar kaha, “khaamosh!” lekin vah mazeed oonchee aavaaz say pukaarta raha, “ibn-ay-daaood, mujh par rahem karen!”

49eesa ruk kar bola, “usay bulaao.”

chunaanchay unhon nay usay bula kar kaha, “hausla rakh. uth, vah tujhay bula raha hai.”

50baratimaaee nay apnee chaadar zameen par phaink dee aur uchhal kar eesa kay paas aaya.

51eesa nay poochha, “too kya chaahata hai ki main teray liyay karoon?”

us nay javaab diya, “ustaad, yah ki main dekh sakoon.”

52eesa nay kaha, “ja, teray eemaan nay tujhay bacha liya hai.”

Marqus 11

yarooshalam men eesa ka purjosh istiqbaal

1vah yarooshalam kay qareeb bait-fagay aur bait-aniyaah pahunchnay lagay. yah gaaon zaitoon kay pahaad par vaaqay thay. eesa nay apnay shaagirdon men say do ko bhejaa 2aur kaha, “saamnay vaalay gaaon men jaao. vahaan tum ek javaan gadha dekhogay. vah bandha hua hoga aur ab tak koee bhee us par savaar naheen hua hai. usay khol kar yahaan lay aao. 3agar koee poochhay ki yah kya kar rahay ho to usay bata dena, ‘khudaavand ko is kee zaroorat hai. vah jald hee isay vaapas bhej dengay’.”

4donon shaagird vahaan gaay to ek javaan gadha dekha jo baahar galee men kisee darvaazay kay saath bandha hua tha. jab vah us kee rassee kholnay lage 5to vahaan khaday kuchh logon nay poochha, “tum yah kya kar rahay ho? javaan gadhay ko kyoon khol rahay ho?”

6unhon nay javaab men vah kuchh bata diya jo eesa nay unhen kaha tha. is par logon nay unhen kholnay diya. 7vah javaan gadhay ko eesa kay paas lay aaay aur apnay kapday us par rakh diay. phir eesa us par savaar hua. 8jab vah chal pada to bahut say logon nay us kay aagay aagay raastay men apnay kapday bichha diay. baaz nay haree shaakhen bhee us kay aagay bichha deen jo unhon nay kheton kay darakhton say kaat lee theen. 9log eesa kay aagay aur peechhay chal rahay thay aur chilla chilla kar naaray laga rahay thay,

“hoshaanaa[a] hoshaana (ibraanee : meharbaanee karkay hamen bacha). yahaan is men hamd-o-sana ka unsur bhee paaya jaata hai.!

mubaarak hai vah jo rabb kay naam say aata hai.10mubaarak hai hamaaray baap daaood kee baadshaahee jo a rahee hai.

[a] hoshaana (ibraanee : meharbaanee karkay hamen bacha). yahaan is men hamd-o-sana ka unsur bhee paaya jaata hai.

Looqa 19

jo rabb kay naam say aata hai.

aasmaan par salaamatee ho aur bulandiyon par izzat-o-jalaal.”

39kuchh fareesee bheed men thay. unhon nay eesa say kaha, “ustaad, apnay shaagirdon ko samjhaaen.”

40us nay javaab diya, “main tumhen bataata hoon, agar yah chup ho jaaen to patthar pukaar uthengay.”

eesa shaher ko dekh kar ro padta hai

41jab vah yarooshalam kay qareeb pahuncha to shaher ko dekh kar ro padaa 42aur kaha, “kaash too bhee is din pahechaan letee ki teree salaamatee kis men hai. lekin ab yah baat teree aankhon say chhupee huee hai. 43kyoonki tujh par aisa vaqt aaega ki teray dushman teray ird-gird band baandh kar tera muhaasara karengay aur yoon tujhay chaaron taraf say gher kar tang karengay. 44vah tujhay teray bachchon samet zameen par patkengay aur teray andar ek bhee patthar doosray par naheen chhodengay. aur vajah yahee hogee ki too nay vah vaqt naheen pahechaana jab allaah nay teree najaat kay liyay tujh par nazar kee.”