Looqa 4

eesa ko naasrat men radd kiya jaata hai

16ek din vah naasrat pahuncha jahaan vah parvaan chadha tha. vahaan bhee vah maamool kay mutaabiq sabat kay din maqaamee ibaadatkhaanay men ja kar kalaam-ay-muqaddas men say padhnay kay liyay khada ho gaya. 17usay yasaayaah nabee kee kitaab dee gaee to us nay toomaar ko khol kar yah havaala dhoond nikaala,

18“rabb ka rooh mujh par hai,

kyoonki us nay mujhay tel say masah karke

ghareebon ko khushkhabaree sunaanay ka ikhtiyaar diya hai.

us nay mujhay yah elaan karnay kay liyay bheja hai ki

qaidiyon ko rihaaee milegee

aur andhay dekhengay.

us nay mujhay bheja hai ki main kuchlay huon ko aazaad karaaoon

19aur rabb kee taraf say bahaalee kay saal ka elaan karoon.”

20yah kah kar eesa nay toomaar ko lapet kar ibaadatkhaanay kay mulaazim ko vaapas kar diya aur baith gaya. saaree jamaaat kee aankhen us par lagee theen. 21phir vah bol utha, “aaj allaah ka yah farmaan tumhaaray suntay hee poora ho gaya hai.”

Looqa 8

khidmatguzaar khavaateen eesa kay saath safar kartee hain

1is kay kuchh der baad eesa mukhtalif shaheron aur deehaaton men say guzar kar safar karnay laga. har jagah us nay allaah kee baadshaahee kay baaray men khushkhabaree sunaaee. us kay baarah shaagird us kay saath thay, 2neez kuchh khavaateen bhee jinhen us nay badroohon say rihaaee aur beemaariyon say shifa dee thee. in men say ek mariyam thee jo magdaleenee kahelaatee thee jis men say saat badruhen nikaalee gaee theen. 3phir yooanna jo khooza kee beevee thee (khooza herodes baadshaah ka ek afsar tha). soosanna aur deegar kaee khavaateen bhee theen jo apnay maalee vasaail say un kee khidmat kartee theen.

Marqus 4

beej bonay vaalay kee tamseel

1phir eesa dubaara jheel kay kinaaray taaleem denay laga. aur itnee badee bheed us kay paas jama huee ki vah jheel men khadee ek kashtee men baith gaya. baaqee log jheel kay kinaaray par khaday rahay. 2us nay unhen bahut see baaten tamseelon men sikhaaeen. un men say ek yah thee :

3“suno! ek kisaan beej bonay kay liyay nikla. 4jab beej idhar udhar bikhar gaya to kuchh daanay raastay par giray aur parindon nay a kar unhen chug liya. 5kuchh pathreelee zameen par giray jahaan mittee kee kamee thee. vah jald ug aaay kyoonki mittee gaheree naheen thee. 6lekin jab sooraj nikla to pauday jhulas gaay aur choonki vah jad na pakad sakay is liyay sookh gaay. 7kuchh daanay khudrau kaantedaar paudon kay darmiyaan bhee giray. vahaan vah ugnay to lagay, lekin khudrau paudon nay saath saath badh kar unhen phalnay phoolnay kee jagah na dee. chunaanchay vah bhee khatm ho gaay aur phal na la sakay. 8lekin aisay daanay bhee thay jo zarkhez zameen men giray. vahaan vah phoot niklay aur badhtay badhtay tees guna, saath guna balki sau guna tak phal laaay.”

9phir us nay kaha, “jo sun sakta hai vah sun lay!”

tamseelon ka maqsad

10jab vah akela tha to jo log us kay ird-gird jama thay unhon nay baarah shaagirdon samet us say poochha ki is tamseel ka kya matlab hai? 11us nay javaab diya, “tum ko to allaah kee baadshaahee ka bhed samajhnay kee liyaaqat dee gaee hai. lekin main is daairay say baahar kay logon ko har baat samjhaanay kay liyay tamseelen istemaal karta hoon 12taaki paak kalaam poora ho jaaay ki

‘vah apnee aankhon say dekhengay magar kuchh naheen jaanengay,

vah apnay kaanon say sunengay magar kuchh naheen samjhengay,

aisa na ho ki vah meree taraf rujoo karen

aur unhen muaaf kar diya jaaay’.”

beej bonay vaalay kee tamseel ka matlab

13phir eesa nay un say kaha, “kya tum yah tamseel naheen samajhtay? to phir baaqee tamaam tamseelen kis tarah samajh paaogay? 14beej bonay vaala allaah ka kalaam bo deta hai. 15raastay par girnay vaalay daanay vah log hain jo kalaam ko suntay to hain, lekin phir iblees fauran a kar vah kalaam chheen leta hai jo un men boya gaya hai. 16pathreelee zameen par girnay vaalay daanay vah log hain jo kalaam suntay hee usay khushee say qabool to kar letay hain, 17lekin vah jad naheen pakadtay aur is liyay ziyaada der tak qaaim naheen rahetay. joon hee vah kalaam par eemaan laanay kay baais kisee museebat ya eezaarasaanee say dochaar ho jaaen, to vah bargashta ho jaatay hain. 18khudrau kaantedaar paudon kay darmiyaan giray huay daanay vah log hain jo kalaam suntay to hain, 19lekin phir rozmarra kee pareshaaniyaan, daulat ka fareb aur deegar cheezon ka laalach kalaam ko phalnay phoolnay naheen detay. nateejay men vah phal laanay tak naheen pahunchta. 20is kay muqaablay men zarkhez zameen men giray huay daanay vah log hain jo kalaam sun kar usay qabool kartay aur badhtay badhtay tees guna, saath guna balki sau guna tak phal laatay hain.”

Marqus 4

raaee kay daanay kee tamseel

30phir eesa nay kaha, “ham allaah kee baadshaahee ka muvaazna kis cheez say karen? ya ham kaun see tamseel say isay bayaan karen? 31vah raaee kay daanay kee maanind hai jo zameen men daala gaya ho. raaee beejon men sab say chhota daana hai 32lekin badhtay badhtay sabziyon men sab say bada ho jaata hai. us kee shaakhen itnee lambee ho jaatee hain ki parinday us kay saay men apnay ghonslay bana saktay hain.”

33eesa isee qism kee bahut see tamseelon kee madad say unhen kalaam yoon sunaata tha ki vah isay samajh saktay thay. 34haan, avaam ko vah sirf tamseelon kay zareeay sikhaata tha. lekin jab vah apnay shaagirdon kay saath akela hota to vah har baat kee tashreeh karta tha.

eesa aandhee ko thama deta hai

35us din jab shaam huee to eesa nay apnay shaagirdon say kaha, “aao, ham jheel kay paar chalen.” 36chunaanchay vah bheed ko rukhsat karkay usay lay kar chal paday. baaz aur kashtiyaan bhee saath gaeen. 37achaanak sakht aandhee aaee. laheren kashtee say takra kar usay paanee say bharnay lageen, 38lekin eesa abhee tak kashtee kay pichhlay hissay men apna sar gaddee par rakhay so raha tha. shaagirdon nay usay jaga kar kaha, “ustaad, kya aap ko parva naheen ki ham tabaah ho rahay hain?”

39vah jaag utha, aandhee ko daanta aur jheel say kaha, “khaamosh! chup kar!” is par aandhee tham gaee aur laheren bilkul saakit ho gaeen. 40phir eesa nay shaagirdon say poochha, “tum kyoon ghabraatay ho? kya tum abhee tak eemaan naheen rakhtay?” 41un par sakht khauf taaree ho gaya aur vah ek doosray say kahenay lagay, “aakhir yah kaun hai? hava aur jheel bhee us ka hukm maantee hain.”

Marqus 5

yaaeer kee betee aur beemaar aurat

21eesa nay kashtee men baithay jheel ko dubaara paar kiya. jab doosray kinaaray pahuncha to ek hujoom us kay gird jama ho gaya. vah abhee jheel kay paas hee thaa 22ki maqaamee ibaadatkhaanay ka ek raahanuma us kay paas aaya. us ka naam yaaeer tha. eesa ko dekh kar vah us kay paaon men gir gayaa 23aur bahut minnat karnay laga, “meree chhotee betee marnay vaalee hai, baraah-ay-karam a kar us par apnay haath rakhen taaki vah shifa pa kar zinda rahay.”

24chunaanchay eesa us kay saath chal pada. ek badee bheed us kay peechhay lag gaee aur log usay gher kar har taraf say dabaanay lagay.

25hujoom men ek aurat thee jo baarah saal say khoon bahenay kay marz say rihaaee na pa sakee thee. 26bahut daaktaron say apna ilaaj karva karva kar usay kaee tarah kee museebat jhelnee padee thee aur itnay men us kay tamaam paisay bhee kharch ho gaay thay. to bhee koee faaida na hua tha balki us kee haalat mazeed kharaab hotee gaee. 27eesa kay baaray men sun kar vah bheed men shaamil ho gaee thee. ab peechhay say a kar us nay us kay libaas ko chhua, 28kyoonki us nay socha, “agar main sirf us kay libaas ko hee chhoo loon to main shifa pa loongee.”

29khoon bahena fauran band ho gaya aur us nay apnay jism men mahsoos kiya ki mujhay is aziyatanaak haalat say rihaaee mil gaee hai. 30lekin usee lamhay eesa ko khud mahsoos hua ki mujh men say tavaanaaee niklee hai. us nay mud kar poochha, “kis nay meray kapdon ko chhua hai?”

31us kay shaagirdon nay javaab diya, “aap khud dekh rahay hain ki hujoom aap ko gher kar daba raha hai. to phir aap kis tarah poochh saktay hain ki kis nay mujhay chhua?”

32lekin eesa apnay chaaron taraf dekhta raha ki kis nay yah kiya hai. 33is par vah aurat yah jaan kar ki meray saath kya hua hai khauf kay maaray laraztee huee us kay paas aaee. vah us kay saamnay gir padee aur usay pooree haqeeqat khol kar bayaan kee. 34eesa nay us say kaha, “betee, teray eemaan nay tujhay bacha liya hai. salaamatee say ja aur apnee aziyatanaak haalat say bachee rah.”

35eesa nay yah baat abhee khatm naheen kee thee ki ibaadatkhaanay kay raahanuma yaaeer kay ghar kee taraf say kuchh log pahunchay aur kaha, “aap kee betee faut ho chukee hai, ab ustaad ko mazeed takleef denay kee kya zaroorat?”

36un kee yah baat nazar’andaaz karkay eesa nay yaaeer say kaha, “mat ghabraao, faqat eemaan rakho.” 37phir eesa nay hujoom ko rok liya aur sirf patras, yaaqoob aur us kay bhaaee yoohanna ko apnay saath jaanay kee ijaazat dee. 38jab ibaadatkhaanay kay raahanuma kay ghar pahunchay to vahaan badee afra-tafree nazar aaee. log khoob girya-o-zaaree kar rahay thay. 39undar ja kar eesa nay un say kaha, “yah kaisa shor-sharaaba hai? kyoon ro rahay ho? ladkee mar naheen gaee balki so rahee hai.”

40log hans kar us ka mazaaq udaanay lagay. lekin us nay sab ko baahar nikaal diya. phir sirf ladkee kay vaalidain aur apnay teen shaagirdon ko saath lay kar vah us kamray men daakhil hua jis men ladkee padee thee. 41us nay us ka haath pakad kar kaha, “talitha qoom!” is ka matlab hai, “chhotee ladkee, main tujhay hukm deta hoon ki jaag uth!”

42ladkee fauran uth kar chalnay phirnay lagee. us kee umr baarah saal thee. yah dekh kar log ghabra kar hairaan rah gaay. 43eesa nay unhen sanjeedgee say samjhaaya ki vah kisee ko bhee is kay baaray men na bataaen. phir us nay unhen kaha ki usay khaanay ko kuchh do.