Marqus 4
bīj bone vāle kī tamsīl
1phir īsā dubārā jhīl ke kināre tālīm dene lagā. aur itnī baṛī bhīṛ us ke pās jamā huī ki vah jhīl meṅ khaṛī ek kashtī meṅ baiṭh gayā. bāqī log jhīl ke kināre par khaṛe rahe. 2us ne unheṅ bahut sī bāteṅ tamsīloṅ meṅ sikhāīṅ. un meṅ se ek yah thī :
3“suno! ek kisān bīj bone ke liye niklā. 4jab bīj idhar udhar bikhar gayā to kuchh dāne rāste par gire aur parindoṅ ne ā kar unheṅ chug liyā. 5kuchh pathrīlī zamīn par gire jahāṅ miṭṭī kī kamī thī. vah jald ug āe kyūṅki miṭṭī gaharī nahīṅ thī. 6lekin jab sūraj niklā to paude jhulas gae aur chūṅki vah jaṛ na pakaṛ sake is liye sūkh gae. 7kuchh dāne ḵẖudrau kāṅṭedār paudoṅ ke darmiyān bhī gire. vahāṅ vah ugne to lage, lekin ḵẖudrau paudoṅ ne sāth sāth baṛh kar unheṅ phalne phūlne kī jagah na dī. chunāṅche vah bhī ḵẖatm ho gae aur phal na lā sake. 8lekin aise dāne bhī the jo zarḵẖez zamīn meṅ gire. vahāṅ vah phūṭ nikle aur baṛhte baṛhte tīs gunā, sāṭh gunā balki sau gunā tak phal lāe.”
9phir us ne kahā, “jo sun saktā hai vah sun le!”
tamsīloṅ kā maqsad
10jab vah akelā thā to jo log us ke ird-gird jamā the unhoṅ ne bārah shāgirdoṅ samet us se pūchhā ki is tamsīl kā kyā matlab hai? 11us ne javāb diyā, “tum ko to allāh kī bādshāhī kā bhed samajhne kī liyāqat dī gaī hai. lekin maiṅ is dāire se bāhar ke logoṅ ko har bāt samjhāne ke liye tamsīleṅ istemāl kartā hūṅ 12tāki pāk kalām pūrā ho jāe ki
‘vah apnī āṅkhoṅ se dekheṅge magar kuchh nahīṅ jāneṅge,
vah apne kānoṅ se suneṅge magar kuchh nahīṅ samjheṅge,
aisā na ho ki vah merī taraf rujū kareṅ
aur unheṅ muāf kar diyā jāe’.”
bīj bone vāle kī tamsīl kā matlab
13phir īsā ne un se kahā, “kyā tum yah tamsīl nahīṅ samajhte? to phir bāqī tamām tamsīleṅ kis tarah samajh pāoge? 14bīj bone vālā allāh kā kalām bo detā hai. 15rāste par girne vāle dāne vah log haiṅ jo kalām ko sunte to haiṅ, lekin phir iblīs fauran ā kar vah kalām chhīn letā hai jo un meṅ boyā gayā hai. 16pathrīlī zamīn par girne vāle dāne vah log haiṅ jo kalām sunte hī use ḵẖushī se qabūl to kar lete haiṅ, 17lekin vah jaṛ nahīṅ pakaṛte aur is liye ziyādā der tak qāim nahīṅ rahate. jūṅ hī vah kalām par īmān lāne ke bāis kisī musībat yā īzārasānī se dochār ho jāeṅ, to vah bargashtā ho jāte haiṅ. 18ḵẖudrau kāṅṭedār paudoṅ ke darmiyān gire hue dāne vah log haiṅ jo kalām sunte to haiṅ, 19lekin phir rozmarrā kī pareshāniyāṅ, daulat kā fareb aur dīgar chīzoṅ kā lālach kalām ko phalne phūlne nahīṅ dete. natīje meṅ vah phal lāne tak nahīṅ pahuṅchtā. 20is ke muqāble meṅ zarḵẖez zamīn meṅ gire hue dāne vah log haiṅ jo kalām sun kar use qabūl karte aur baṛhte baṛhte tīs gunā, sāṭh gunā balki sau gunā tak phal lāte haiṅ.”
koī charāġ ko bartan ke nīche nahīṅ chhupātā
21īsā ne bāt jārī rakhī aur kahā, “kyā charāġ ko is liye jalā kar lāyā jātā hai ki vah kisī bartan yā chārpāī ke nīche rakhā jāe? hargiz nahīṅ! use shamādān par rakhā jātā hai. 22kyūṅki jo kuchh bhī is vaqt poshīdā hai use āḵẖirkār zāhir ho jānā hai aur tamām bhedoṅ ko ek din khul jānā hai. 23agar koī sun sake to sun le.”
24us ne un se yah bhī kahā, “is par dhyān do ki tum kyā sunte ho. jis hisāb se tum dūsroṅ ko dete ho usī hisāb se tum ko bhī diyā jāegā balki tum ko us se baṛh kar milegā. 25kyūṅki jise kuchh hāsil huā hai use aur bhī diyā jāegā, jabki jise kuchh hāsil nahīṅ huā us se vah thoṛā bahut bhī chhīn liyā jāegā jo use hāsil hai.”
ḵẖud-ba-ḵẖud ugne vāle bīj kī tamsīl
26phir īsā ne kahā, “allāh kī bādshāhī yūṅ samajh lo : ek kisān zamīn meṅ bīj bikher detā hai. 27yah bīj phūṭ kar din rāt ugtā rahatā hai, ḵẖwāh kisān so rahā yā jāg rahā ho. use mālūm nahīṅ ki yah kyūṅkar hotā hai. 28zamīn ḵẖud-ba-ḵẖud anāj kī fasal paidā kartī hai. pahale patte nikalte haiṅ, phir bāleṅ nazar āne lagtī haiṅ aur āḵẖir meṅ dāne paidā ho jāte haiṅ. 29aur jūṅ hī anāj kī fasal pak jātī hai kisān ā kar darāntī se use kāṭ letā hai, kyūṅki fasal kī kaṭāī kā vaqt ā chukā hotā hai.”
rāī ke dāne kī tamsīl
30phir īsā ne kahā, “ham allāh kī bādshāhī kā muvāznā kis chīz se kareṅ? yā ham kaun sī tamsīl se ise bayān kareṅ? 31vah rāī ke dāne kī mānind hai jo zamīn meṅ ḍālā gayā ho. rāī bījoṅ meṅ sab se chhoṭā dānā hai 32lekin baṛhte baṛhte sabziyoṅ meṅ sab se baṛā ho jātā hai. us kī shāḵẖeṅ itnī lambī ho jātī haiṅ ki parinde us ke sāy meṅ apne ghoṅsle banā sakte haiṅ.”
33īsā isī qism kī bahut sī tamsīloṅ kī madad se unheṅ kalām yūṅ sunātā thā ki vah ise samajh sakte the. 34hāṅ, avām ko vah sirf tamsīloṅ ke zarīe sikhātā thā. lekin jab vah apne shāgirdoṅ ke sāth akelā hotā to vah har bāt kī tashrīh kartā thā.
īsā āṅdhī ko thamā detā hai
35us din jab shām huī to īsā ne apne shāgirdoṅ se kahā, “āo, ham jhīl ke pār chaleṅ.” 36chunāṅche vah bhīṛ ko ruḵẖsat karke use le kar chal paṛe. bāz aur kashtiyāṅ bhī sāth gaīṅ. 37achānak saḵẖt āṅdhī āī. lahareṅ kashtī se ṭakrā kar use pānī se bharne lagīṅ, 38lekin īsā abhī tak kashtī ke pichhle hisse meṅ apnā sar gaddī par rakhe so rahā thā. shāgirdoṅ ne use jagā kar kahā, “ustād, kyā āp ko parvā nahīṅ ki ham tabāh ho rahe haiṅ?”
39vah jāg uṭhā, āṅdhī ko ḍāṅṭā aur jhīl se kahā, “ḵẖāmosh! chup kar!” is par āṅdhī tham gaī aur lahareṅ bilkul sākit ho gaīṅ. 40phir īsā ne shāgirdoṅ se pūchhā, “tum kyūṅ ghabrāte ho? kyā tum abhī tak īmān nahīṅ rakhte?” 41un par saḵẖt ḵẖauf tārī ho gayā aur vah ek dūsre se kahane lage, “āḵẖir yah kaun hai? havā aur jhīl bhī us kā hukm māntī haiṅ.”