Marqus 10
talaaq kay baaray men taaleem
1phir eesa us jagah ko chhod kar yahoodiya kay ilaaqay men aur darya-ay-yardan kay paar chala gaya. vahaan bhee hujoom jama ho gaya. us nay unhen maamool kay mutaabiq taaleem dee.
Marqus 10
eesa chhotay bachchon ko barkat deta hai
13ek din log apnay chhotay bachchon ko eesa kay paas laaay taaki vah unhen chhuay. lekin shaagirdon nay un ko malaamat kee. 14yah dekh kar eesa naaraaz hua. us nay un say kaha, “bachchon ko meray paas aanay do aur unhen na roko, kyoonki allaah kee baadshaahee in jaisay logon ko haasil hai. 15main tum ko sachch bataata hoon, jo allaah kee baadshaahee ko bachchay kee tarah qabool na karay vah us men daakhil naheen hoga.” 16yah kah kar us nay unhen galay lagaaya aur apnay haath un par rakh kar unhen barkat dee.
ameer mushkil say baadshaahee men daakhil ho saktay hain
17jab eesa ravaana honay laga to ek aadmee daud kar us kay paas aaya aur us kay saamnay ghutnay tek kar poochha, “nek ustaad, main kya karoon taaki abdee zindagee meeraas men paaoon?”
18eesa nay poochha, “too mujhay nek kyoon kaheta hai? koee nek naheen siva-ay-ek kay aur vah hai allaah. 19too shareeat kay ahkaam say to vaaqif hai. qatl na karna, zina na karna, choree na karna, jhootee gavaahee na dena, dhoka na dena, apnay baap aur apnee maan kee izzat karna.”
20aadmee nay javaab diya, “ustaad, main nay javaanee say aaj tak in tamaam ahkaam kee pairvee kee hai.”
21eesa nay ghaur say us kee taraf dekha. us kay dil men us kay liyay piyaar ubhar aaya. vah bola, “ek kaam rah gaya hai. ja, apnee pooree jaaydaad farokht karkay paisay ghareebon men taqseem kar day. phir teray liyay aasmaan par khazaana jama ho jaaega. is kay baad a kar meray peechhay ho lay.” 22yah sun kar aadmee ka munh latak gaya aur vah maayoos ho kar chala gaya, kyoonki vah nihaayat daulatmand tha.
23eesa nay apnay ird-gird dekh kar shaagirdon say kaha, “daulatmandon kay liyay allaah kee baadshaahee men daakhil hona kitna mushkil hai!”
24shaagird us kay yah alfaaz sun kar hairaan huay. lekin eesa nay dubaara kaha, “bachcho! allaah kee baadshaahee men daakhil hona kitna mushkil hai. 25ameer kay allaah kee baadshaahee men daakhil honay kee nisbat ziyaada aasaan yah hai ki oont sooee kay naakay men say guzar jaaay.”
26is par shaagird mazeed hairatzada huay aur ek doosray say kahenay lagay, “phir kis ko najaat mil saktee hai?”
27eesa nay ghaur say un kee taraf dekh kar javaab diya, “yah insaan kay liyay to naamumkin hai, lekin allaah kay liyay naheen. us kay liyay sab kuchh mumkin hai.”
28phir patras bol utha, “ham to apna sab kuchh chhod kar aap kay peechhay ho liyay hain.”
29eesa nay javaab diya, “main tum ko sachch bataata hoon, jis nay bhee meree aur allaah kee khushkhabaree kee khaatir apnay ghar, bhaaiyon, bahenon, maan, baap, bachchon ya kheton ko chhod diya hai 30usay is zamaanay men eezaarasaanee kay saath saath sau guna ziyaada ghar, bhaaee, bahenen, maaen, bachchay aur khet mil jaaengay. aur aanay vaalay zamaanay men usay abdee zindagee milegee. 31lekin bahut say log jo ab avval hain us vaqt aakhir hongay aur jo ab aakhir hain vah avval hongay.”
eesa teesree dafa apnee maut ka zikr karta hai
32ab vah yarooshalam kee taraf badh rahay thay aur eesa un kay aagay aagay chal raha tha. shaagird hairatzada thay jabki un kay peechhay chalnay vaalay log sahemay huay thay. ek aur dafa baarah shaagirdon ko ek taraf lay ja kar eesa unhen vah kuchh bataanay laga jo us kay saath honay ko tha. 33us nay kaha, “ham yarooshalam kee taraf badh rahay hain. vahaan ibn-ay-aadam ko raahanuma imaamon aur shareeat kay ulma kay havaalay kar diya jaaega. vah us par saza-ay-maut ka fatwa day kar usay ghairyahoodiyon kay havaalay kar dengay, 34jo us ka mazaaq udaaengay, us par thookengay, us ko koday maarengay aur usay qatl karengay. lekin teen din kay baad vah jee uthega.”
Looqa 9
pairvee kee sanjeedgee
57safar kartay kartay kisee nay raastay men eesa say kaha, “jahaan bhee aap jaaen main aap kay peechhay chalta rahoonga.”
58eesa nay javaab diya, “lomdiyaan apnay bhaton men aur parinday apnay ghonslon men aaraam kar saktay hain, lekin ibn-ay-aadam kay paas sar rakh kar aaraam karnay kee koee jagah naheen.”
59kisee aur say us nay kaha, “meray peechhay ho lay.”
lekin us aadmee nay kaha, “khudaavand, mujhay pahelay ja kar apnay baap ko dafan karnay kee ijaazat den.”
60lekin eesa nay javaab diya, “murdon ko apnay murday dafnaanay day. too ja kar allaah kee baadshaahee kee munaadee kar.”
61ek aur aadmee nay yah maazrat chaahee, “khudaavand, main zaroor aap kay peechhay ho loonga. lekin pahelay mujhay apnay ghar vaalon ko khairbaad kahenay den.”
62lekin eesa nay javaab diya, “jo bhee hal chalaatay huay peechhay kee taraf dekhay vah allaah kee baadshaahee kay laaiq naheen hai.”
Mattee 10
eesa aur us kay pairokaaron ko qabool karnay ka ajr
37jo apnay baap ya maan ko mujh say ziyaada piyaar karay vah meray laaiq naheen. jo apnay betay ya betee ko mujh say ziyaada piyaar karay vah meray laaiq naheen. 38jo apnee saleeb utha kar meray peechhay na ho lay vah meray laaiq naheen.
Looqa 10
nek saamree kee tamseel
25ek mauqay par shareeat ka ek aalim eesa ko phansaanay kee khaatir khada hua. us nay poochha, “ustaad, main kya kya karnay say meeraas men abdee zindagee pa sakta hoon?”
26eesa nay us say kaha, “shareeat men kya likha hai? too us men kya padhta hai?”
27aadmee nay javaab diya, “‘rabb apnay khuda say apnay pooray dil, apnee pooree jaan, apnee pooree taaqat aur apnay pooray zahen say piyaar karna.’ aur ‘apnay padosee say vaisee muhabbat rakhna jaisee too apnay aap say rakhta hai’.”
28eesa nay kaha, “too nay theek javaab diya. aisa hee kar to zinda rahega.”
29lekin aalim nay apnay aap ko durust saabit karnay kee gharaz say poochha, “to mera padosee kaun hai?”
30eesa nay javaab men kaha, “ek aadmee yarooshalam say yareehoo kee taraf ja raha tha ki vah daakuon kay haathon men pad gaya. unhon nay us kay kapday utaar kar usay khoob maara aur adhmua chhod kar chalay gaay. 31ittifaaq say ek imaam bhee usee raastay par yareehoo kee taraf chal raha tha. lekin jab us nay zakhmee aadmee ko dekha to raastay kee parlee taraf ho kar aagay nikal gaya. 32laavee qabeelay ka ek khaadim bhee vahaan say guzra. lekin vah bhee raastay kee parlee taraf say aagay nikal gaya. 33phir saamriya ka ek musaafir vahaan say guzra. jab us nay zakhmee aadmee ko dekha to usay us par taras aaya. 34vah us kay paas gaya aur us kay zakhmon par tel aur mai laga kar un par pattiyaan baandh deen. phir us ko apnay gadhay par bitha kar saraay tak lay gaya. vahaan us nay us kee mazeed dekh-bhaal kee. 35aglay din us nay chaandee kay do sikkay nikaal kar saraay kay maalik ko diay aur kaha, ‘is kee dekh-bhaal karna. agar kharcha is say badh kar hua to main vaapsee par ada kar doonga’.”
36phir eesa nay poochha, “ab tera kya khayaal hai, daakuon kee zad men aanay vaalay aadmee ka padosee kaun tha? imaam, laavee ya saamree?”
37aalim nay javaab diya, “vah jis nay us par rahem kiya.”
eesa nay kaha, “bilkul theek. ab too bhee ja kar aisa hee kar.”
eesa mariyam aur martha kay ghar jaata hai
38phir eesa shaagirdon kay saath aagay nikla. chaltay chaltay vah ek gaaon men pahuncha. vahaan kee ek aurat banaam martha nay usay apnay ghar men khush’aamadeed kaha. 39martha kee ek bahen thee jis ka naam mariyam tha. vah khudaavand kay paaon men baith kar us kee baaten sunnay lagee 40jabki martha mehamaanon kee khidmat kartay kartay thak gaee. aakhirkaar vah eesa kay paas a kar kahenay lagee, “khudaavand, kya aap ko parva naheen ki meree bahen nay mehamaanon kee khidmat ka poora intizaam mujh par chhod diya hai? us say kahen ki vah meree madad karay.”
41lekin khudaavand eesa nay javaab men kaha, “martha, martha, too bahut see fikron aur pareshaaniyon men pad gaee hai. 42lekin ek baat zarooree hai. mariyam nay behatar hissa chun liya hai aur yah us say chheena naheen jaaega.”
Looqa 11
dua kis tarah karnee hai
1ek din eesa kaheen dua kar raha tha. jab vah faarigh hua to us kay kisee shaagird nay kaha, “khudaavand, hamen dua karna sikhaaen, jis tarah yaheya nay bhee apnay shaagirdon ko dua karnay kee taaleem dee.”
2eesa nay kaha, “dua kartay vaqt yoon kahena,
ai baap,
tera naam muqaddas maana jaaay.
teree baadshaahee aaay.
3har roz hamen hamaaree roz kee rotee day.
4hamaaray gunaahon ko muaaf kar.
Looqa 13
sabat kay din kubdee aurat kee shifaa
10sabat kay din eesa kisee ibaadatkhaanay men taaleem day raha tha. 11vahaan ek aurat thee jo 18 saal say badruh kay baais beemaar thee. vah kubdee ho gaee thee aur seedhee khadee honay kay bilkul qaabil na thee. 12jab eesa nay usay dekha to pukaar kar kaha, “ai aurat, too apnee beemaaree say chhoot gaee hai!” 13us nay apnay haath us par rakhay to vah fauran seedhee khadee ho kar allaah kee tamjeed karnay lagee.
14lekin ibaadatkhaanay ka raahanuma naaraaz hua kyoonki eesa nay sabat kay din shifa dee thee. us nay logon say kaha, “haftay kay chhah din kaam karnay kay liyay hotay hain. is liyay itwaar say lay kar jumaay tak shifa paanay kay liyay aao, na ki sabat kay din.”
15khudaavand nay javaab men us say kaha, “tum kitnay riyaakaar ho! kya tum men say har koee sabat kay din apnay bail ya gadhay ko khol kar usay thaan say baahar naheen lay jaata taaki usay paanee pilaaay? 16ab is aurat ko dekho jo ibraaheem kee betee hai aur jo 18 saal say iblees kay bandhan men thee. jab tum sabat kay din apnay jaanvaron kee madad kartay ho to kya yah theek naheen ki aurat ko is bandhan say rihaaee dilaaee jaatee, chaahay yah kaam sabat kay din hee kyoon na kiya jaaay?” 17eesa kay is javaab say us kay mukhaalif sharminda ho gaay. lekin aam log us kay in tamaam shaandaar kaamon say khush huay.
Looqa 13
tang darvaazaa
22eesa taaleem detay detay mukhtalif shaheron aur deehaaton men say guzra. ab us ka rukh yarooshalam hee kee taraf tha.
Looqa 13
yarooshalam par afsos
31us vaqt kuchh fareesee eesa kay paas a kar us say kahenay lagay, “is maqaam ko chhod kar kaheen aur chalay jaaen, kyoonki herodes aap ko qatl karnay ka iraada rakhta hai.”
Looqa 14
shaagird honay kee qeemat
25ek bada hujoom eesa kay saath chal raha tha. un kee taraf mud kar us nay kaha, 26“agar koee meray paas a kar apnay baap, maan, beevee, bachchon, bhaaiyon, bahenon balki apnay aap say bhee dushmanee na rakhay to vah mera shaagird naheen ho sakta. 27aur jo apnee saleeb utha kar meray peechhay na ho lay vah mera shaagird naheen ho sakta.