Mattī 3

yahayā baptismā dene vāle kī ḵẖidmat

1un dinoṅ meṅ yahayā baptismā dene vālā āyā aur yahūdiyā ke registān meṅ elān karne lagā, 2“taubā karo, kyūṅki āsmān kī bādshāhī qarīb ā gaī hai.” 3yahayā vahī hai jis ke bāre meṅ yasāyāh nabī ne farmāyā, ‘registān meṅ ek āvāz pukār rahī hai, rabb kī rāh tayyār karo! us ke rāste sīdhe banāo.’

4yahayā ūṅṭoṅ ke bāloṅ kā libās pahane aur kamar par chamṛe kā paṭkā bāṅdhe rahatā thā. ḵẖurāk ke taur par vah ṭiḍḍiyāṅ aur jaṅglī shahad khātā thā. 5log yarūshalam, pūre yahūdiyā aur daryā-e-yardan ke pūre ilāqe se nikal kar us ke pās āe. 6aur apne gunāhoṅ ko taslīm karke unhoṅ ne daryā-e- yardan meṅ yahayā se baptismā liyā.

7bahut se farīsī aur sadūqī bhī vahāṅ āe jahāṅ vah baptismā de rahā thā. unheṅ dekh kar us ne kahā, “ai zaharīle sāṁp ke baccho! kis ne tumheṅ āne vāle ġazab se bachne kī hidāyat kī? 8apnī zindagī se zāhir karo ki tum ne vāqaī taubā kī hai. 9yah ḵẖayāl mat karo ki ham to bach jāeṅge kyūṅki ibrāhīm hamārā bāp hai. maiṅ tum ko batātā hūṅ ki allāh in pattharoṅ se bhī ibrāhīm ke liye aulād paidā kar saktā hai. 10ab to adālat kī kulhāṛī daraḵẖtoṅ kī jaṛoṅ par rakhī huī hai. har daraḵẖt jo acchhā phal na lāe kāṭā aur āg meṅ jhoṅkā jāegā. 11maiṅ to tum taubā karne vāloṅ ko pānī se baptismā detā hūṅ, lekin ek āne vālā hai jo mujh se baṛā hai. maiṅ us ke jūtoṅ ko uṭhāne ke bhī lāiq nahīṅ. vah tumheṅ rūh-ul-quds aur āg se baptismā degā. 12vah hāth meṅ chhāj pakṛe hue anāj ko bhūse se alag karne ke liye tayyār khaṛā hai. vah gāhane kī jagah bilkul sāf karke anāj ko apne godām meṅ jamā karegā. lekin bhūse ko vah aisī āg meṅ jhoṅkegā jo bujhne kī nahīṅ.”

īsā kā baptismā

13phir īsā galīl se daryā-e-yardan ke kināre āyā tāki yahayā se baptismā le. 14lekin yahayā ne use rokne kī koshish karke kahā, “mujhe to āp se baptismā lene kī zarūrat hai, to phir āp mere pās kyūṅ āe haiṅ?”

15īsā ne javāb diyā, “ab hone hī de, kyūṅki munāsib hai ki ham yah karte hue allāh kī rāst marzī pūrī kareṅ [a] lafzī tarjumā : ham tamām rāstbāzī pūrī kareṅ. .” is par yahayā mān gayā.

16baptismā lene par īsā fauran pānī se niklā. usī lamhe āsmān khul gayā aur us ne allāh ke rūh ko dekhā jo kabūtar kī tarah utar kar us par ṭhahar gayā. 17sāth sāth āsmān se ek āvāz sunāī dī, “yah merā piyārā farzand hai, is se maiṅ ḵẖush hūṅ.”

[a] lafzī tarjumā : ham tamām rāstbāzī pūrī kareṅ.