Mattī 7
auroṅ kā munsif bannā
1dūsroṅ kī adālat mat karnā, varnā tumhārī adālat bhī kī jāegī. 2kyūṅki jitnī saḵẖtī se tum dūsroṅ kā faislā karte ho utnī saḵẖtī se tumhārā bhī faislā kiyā jāegā. aur jis paimāne se tum nāpte ho usī paimāne se tum bhī nāpe jāoge. 3tū kyūṅ ġaur se apne bhāī kī āṅkh meṅ paṛe tinke par nazar kartā hai jabki tujhe vah shahatīr nazar nahīṅ ātā jo terī apnī āṅkh meṅ hai? 4tū kyūṅkar apne bhāī se kah saktā hai, ‘ṭhaharo, mujhe tumhārī āṅkh meṅ paṛā tinkā nikālne do,’ jabki terī apnī āṅkh meṅ shahatīr hai. 5riyākār! pahale apnī āṅkh ke shahatīr ko nikāl. tab hī tujhe bhāī kā tinkā sāf nazar āegā aur tū use acchhī tarah se dekh kar nikāl sakegā.
6kuttoṅ ko muqaddas ḵẖurāk mat khilānā aur sūaroṅ ke āge apne motī na phaiṅknā. aisā na ho ki vah unheṅ pāoṅ tale rauṅdeṅ aur muṛ kar tum ko phāṛ ḍāleṅ.
māṅgte rahanā
7māṅgte raho to tum ko diyā jāegā. ḍhūṅḍte raho to tum ko mil jāegā. khaṭkhaṭāte raho to tumhāre liye darvāzā khol diyā jāegā. 8kyūṅki jo bhī māṅgtā hai vah pātā hai, jo ḍhūṅḍtā hai use miltā hai, aur jo khaṭkhaṭātā hai us ke liye darvāzā khol diyā jātā hai. 9tum meṅ se kaun apne beṭe ko patthar degā agar vah roṭī māṅge? 10yā kaun use sāṁp degā agar vah machhlī māṅge? koī nahīṅ! 11jab tum bure hone ke bāvujūd itne samajhdār ho ki apne bacchoṅ ko acchhī chīzeṅ de sakte ho to phir kitnī ziyādā yaqīnī bāt hai ki tumhārā āsmānī bāp māṅgne vāloṅ ko acchhī chīzeṅ degā.
12har bāt meṅ dūsroṅ ke sāth vahī sulūk karo jo tum chāhate ho ki vah tumhāre sāth kareṅ. kyūṅki yahī sharīat aur nabiyoṅ kī tālīmāt kā lubb-e-lubāb hai.
taṅg darvāzā
13taṅg darvāze se dāḵẖil ho, kyūṅki halākat kī taraf le jāne vālā rāstā kushādā aur us kā darvāzā chauṛā hai. bahut se log us meṅ dāḵẖil ho jāte haiṅ. 14lekin zindagī kī taraf le jāne vālā rāstā taṅg hai aur us kā darvāzā chhoṭā. kam hī log use pāte haiṅ.
har daraḵẖt kā apnā phal hotā hai
15jhūṭe nabiyoṅ se ḵẖabardār raho! go vah bheṛoṅ kā bhes badal kar tumhāre pās āte haiṅ, lekin andar se vah ġāratagar bheṛie hote haiṅ. 16un kā phal dekh kar tum unheṅ pahachān loge. kyā ḵẖārdār jhāṛiyoṅ se aṅgūr toṛe jāte haiṅ yā ūṅṭakaṭāroṅ se anjīr? hargiz nahīṅ. 17isī tarah acchhā daraḵẖt acchhā phal lātā hai aur ḵẖarāb daraḵẖt ḵẖarāb phal. 18na acchhā daraḵẖt ḵẖarāb phal lā saktā hai, na ḵẖarāb daraḵẖt acchhā phal. 19jo bhī daraḵẖt acchhā phal nahīṅ lātā use kāṭ kar āg meṅ jhoṅkā jātā hai. 20yūṅ tum un kā phal dekh kar unheṅ pahachān loge.
sirf asal pairokār dāḵẖil hoṅge
21har ek jo mujhe ‘ḵẖudāvand, ḵẖudāvand’ kah kar pukārtā hai āsmān kī bādshāhī meṅ dāḵẖil na hogā. sirf vahī dāḵẖil hogā jo mere āsmānī bāp kī marzī par amal kartā hai. 22adālat ke din bahut se log mujh se kaheṅge, ‘ai ḵẖudāvand, ḵẖudāvand! kyā ham ne tere hī nām meṅ nubuvvat nahīṅ kī, tere hī nām se badruheṅ nahīṅ nikālīṅ, tere hī nām se mojize nahīṅ kie?’ 23us vaqt maiṅ un se sāf sāf kah dūṅgā, ‘merī kabhī tum se jān pahachān na thī. ai badkāro! mere sāmne se chale jāo.’
do qism ke makān
24lihāzā jo bhī merī yah bāteṅ sun kar un par amal kartā hai vah us samajhdār ādmī kī mānind hai jis ne apne makān kī bunyād chaṭān par rakhī. 25bārish hone lagī, sailāb āyā aur āṅdhī makān ko jhaṅjhoṛne lagī. lekin vah na girā, kyūṅki us kī bunyād chaṭān par rakhī gaī thī.
26lekin jo bhī merī yah bāteṅ sun kar un par amal nahīṅ kartā vah us ahamaq kī mānind hai jis ne apnā makān sahīh bunyād ḍāle baġair ret par tāmīr kiyā. 27jab bārish hone lagī, sailāb āyā aur āṅdhī makān ko jhaṅjhoṛne lagī to yah makān dhaṛām se gir gayā.”
īsā kā iḵẖtiyār
28jab īsā ne yah bāteṅ ḵẖatm kar līṅ to log us kī tālīm sun kar hakkā-bakkā rah gae, 29kyūṅki vah un ke ulmā kī tarah nahīṅ balki iḵẖtiyār ke sāth sikhātā thā.