Paidāish 21
ishāq kī paidāish
1tab rabb ne sārā ke sāth vaisā hī kiyā jaisā us ne farmāyā thā. jo vādā us ne sārā ke bāre meṅ kiyā thā use us ne pūrā kiyā. 2vah hāmilā huī aur beṭā paidā huā. ain us vaqt būṛhe ibrāhīm ke hāṅ beṭā paidā huā jo allāh ne muqarrar karke use batāyā thā.
3ibrāhīm ne apne is beṭe kā nām ishāq yānī ‘vah haṅstā hai’ rakhā. 4jab ishāq āṭh din kā thā to ibrāhīm ne us kā ḵẖatnā karāyā, jis tarah allāh ne use hukm diyā thā. 5jab ishāq paidā huā us vaqt ibrāhīm 100 sāl kā thā. 6sārā ne kahā, “allāh ne mujhe haṅsāyā, aur har koī jo mere bāre meṅ yah sunegā haṅsegā. 7is se pahale kaun ibrāhīm se yah kahane kī jur’at kar saktā thā ki sārā apne bacchoṅ ko dūdh pilāegī? aur ab mere hāṅ beṭā paidā huā hai, agarchi ibrāhīm būṛhā ho gayā hai.”
8ishāq baṛā hotā gayā. jab us kā dūdh chhuṛāyā gayā to ibrāhīm ne us ke liye baṛī ziyāfat kī.
ibrāhīm hājirā aur ismāīl ko nikāl detā hai
9ek din sārā ne dekhā ki misrī lauṅḍī hājirā kā beṭā ismāīl ishāq kā mazāq uṛā rahā hai. 10us ne ibrāhīm se kahā, “is lauṅḍī aur us ke beṭe ko ghar se nikāl deṅ, kyūṅki vah mere beṭe ishāq ke sāth mīrās nahīṅ pāegā.”
11ibrāhīm ko yah bāt bahut burī lagī. āḵẖir ismāīl bhī us kā beṭā thā. 12lekin allāh ne us se kahā, “jo bāt sārā ne apnī lauṅḍī aur us ke beṭe ke bāre meṅ kahī hai vah tujhe burī na lage. sārā kī bāt mān le, kyūṅki terī nasal ishāq hī se qāim rahegī. 13lekin maiṅ ismāīl se bhī ek qaum banāūṅgā, kyūṅki vah terā beṭā hai.”
14ibrāhīm subah-savere uṭhā. us ne roṭī aur pānī kī mashk hājirā ke kaṅdhoṅ par rakh kar use laṛke ke sāth ghar se nikāl diyā. hājirā chalte chalte bair-sabā ke registān meṅ idhar udhar phirne lagī. 15phir pānī ḵẖatm ho gayā. hājirā laṛke ko kisī jhāṛī ke nīche chhoṛ kar 16koī 300 fuṭ dūr baiṭh gaī. kyūṅki us ne dil meṅ kahā, “maiṅ use marte nahīṅ dekh saktī.” vah vahāṅ baiṭh kar rone lagī.
17lekin allāh ne beṭe kī rotī huī āvāz sun lī. allāh ke farishte ne āsmān par se pukār kar hājirā se bāt kī, “hājirā, kyā bāt hai? mat ḍar, kyūṅki allāh ne laṛke kā jo vahāṅ paṛā hai ronā sun liyā hai. 18uṭh, laṛke ko uṭhā kar us kā hāth thām le, kyūṅki maiṅ us se ek baṛī qaum banāūṅgā.”
19phir allāh ne hājirā kī āṅkheṅ khol dīṅ, aur us kī nazar ek kueṅ par paṛī. vah vahāṅ gaī aur mashk ko pānī se bhar kar laṛke ko pilāyā.
20allāh laṛke ke sāth thā. vah javān huā aur tīr’andāz ban kar biyābān meṅ rahane lagā. 21jab vah fārān ke registān meṅ rahatā thā to us kī māṅ ne use ek misrī aurat se byāh diyā.
abīmlik ke sāth ahd
22un dinoṅ meṅ abīmlik aur us ke sipāhasālār fīkul ne ibrāhīm se kahā, “jo kuchh bhī āp karte haiṅ allāh āp ke sāth hai. 23ab mujh se allāh kī qasam khāeṅ ki āp mujhe aur merī āl-o-aulād ko dhokā nahīṅ deṅge. mujh par aur is mulk par jis meṅ āp pardesī haiṅ vahī meharbānī kareṅ jo maiṅ ne āp par kī hai.”
24ibrāhīm ne javāb diyā, “maiṅ qasam khātā hūṅ.” 25phir us ne abīmlik se shikāyat karte hue kahā, “āp ke bandoṅ ne hamāre ek kueṅ par qabzā kar liyā hai.” 26abīmlik ne kahā, “mujhe nahīṅ mālūm ki kis ne aisā kiyā hai. āp ne bhī mujhe nahīṅ batāyā. āj maiṅ pahalī dafā yah bāt sun rahā hūṅ.”
27tab ibrāhīm ne abīmlik ko bheṛ-bakriyāṅ aur gāy-bail die, aur donoṅ ne ek dūsre ke sāth ahd bāṅdhā. 28phir ibrāhīm ne bheṛ ke sāt mādā bacchoṅ ko alag kar liyā. 29abīmlik ne pūchhā, “āp ne yah kyūṅ kiyā?” 30ibrāhīm ne javāb diyā, “bheṛ ke in sāt bacchoṅ ko mujh se le leṅ. yah is ke gavāh hoṅ ki maiṅ ne is kueṅ ko khodā hai.” 31is liye us jagah kā nām bair-sabā yānī ‘qasam kā kuāṅ’ rakhā gayā, kyūṅki vahāṅ un donoṅ mardoṅ ne qasam khāī.
32yūṅ unhoṅ ne bair-sabā meṅ ek dūsre se ahd bāṅdhā. phir abīmlik aur fīkul filistiyoṅ ke mulk vāpas chale gae. 33is ke bād ibrāhīm ne bair-sabā meṅ jhāo kā daraḵẖt lagāyā. vahāṅ us ne rabb kā nām le kar us kī ibādat kī jo abdī ḵẖudā hai. 34ibrāhīm bahut arse tak filistiyoṅ ke mulk meṅ ābād rahā, lekin ajnabī kī haisiyat se.