Looqa 24

eesa jee uthta hai

1itwaar kay din yah aurten apnay tayyaarshuda masaalay lay kar subah-saveray qabr par gaeen. 2vahaan pahunch kar unhon nay dekha ki qabr par ka patthar ek taraf ludhka hua hai. 3lekin jab vah qabr men gaeen to vahaan khudaavand eesa kee laash na paaee. 4vah abhee uljhan men vahaan khadee theen ki achaanak do mard un kay paas a khaday huay jin kay libaas bijlee kee tarah chamak rahay thay. 5aurten dahshat kha kar munh kay bal jhuk gaeen, lekin un mardon nay kaha, “tum kyoon zinda ko murdon men dhoond rahee ho? 6vah yahaan naheen hai, vah to jee utha hai. vah baat yaad karo jo us nay tum say us vaqt kahee jab vah galeel men tha. 7‘laazim hai ki ibn-ay-aadam ko gunaahgaaron kay havaalay kar diya jaaay, masloob kiya jaaay aur ki vah teesray din jee uthay’.”

8phir unhen yah baat yaad aaee. 9aur qabr say vaapas a kar unhon nay yah sab kuchh gyaarah rasoolon aur baaqee shaagirdon ko suna diya. 10mariyam magdaleenee, yooanna, yaaqoob kee maan mariyam aur chand ek aur aurten un men shaamil theen jinhon nay yah baaten rasoolon ko bataaeen. 11lekin un ko yah baaten betukee see lag rahee theen, is liyay unhen yaqeen na aaya.

Yoohanna 20

eesa apnay shaagirdon par zaahir hota hai

19us itwaar kee shaam ko shaagird jama thay. unhon nay darvaazon par taalay laga diay thay kyoonki vah yahoodiyon say dartay thay. achaanak eesa un kay darmiyaan a khada hua aur kaha, “tumhaaree salaamatee ho,” 20aur unhen apnay haathon aur paheloo ko dikhaaya. khudaavand ko dekh kar vah nihaayat khush huay.

Yoohanna 20

toma shak karta hai

24baarah shaagirdon men say toma jis ka laqab judvaan tha eesa kay aanay par maujood na tha. 25chunaanchay doosray shaagirdon nay usay bataaya, “ham nay khudaavand ko dekha hai!” lekin toma nay kaha, “mujhay yaqeen naheen aata. pahelay mujhay us kay haathon men keelon kay nishaan nazar aaen aur main un men apnee unglee daaloon, pahelay main apnay haath ko us kay paheloo kay zakhm men daaloon. phir hee mujhay yaqeen aaega.”

26ek hafta guzar gaya. shaagird dubaara makaan men jama thay. is martaba toma bhee saath tha. agarchi darvaazon par taalay lagay thay phir bhee eesa un kay darmiyaan a kar khada hua. us nay kaha, “tumhaaree salaamatee ho!” 27phir vah toma say mukhaatib hua, “apnee unglee ko meray haathon aur apnay haath ko meray paheloo kay zakhm men daal aur bay-etiqaad na ho balki eemaan rakh.”

28toma nay javaab men us say kaha, “ai meray khudaavand! ai meray khuda!”

29phir eesa nay usay bataaya, “kya too is liyay eemaan laaya hai ki too nay mujhay dekha hai? mubaarak hain vah jo mujhay dekhay baghair mujh par eemaan laatay hain.”

Mattee 28

eesa apnay shaagirdon par zaahir hota hai

16phir gyaarah shaagird galeel kay us pahaad kay paas pahunchay jahaan eesa nay unhen jaanay ko kaha tha. 17vahaan usay dekh kar unhon nay usay sijda kiya. lekin kuchh shak men pad gaay. 18phir eesa nay un kay paas a kar kaha, “aasmaan aur zameen ka kul ikhtiyaar mujhay day diya gaya hai. 19is liyay jaao, tamaam qaumon ko shaagird bana kar unhen baap, farzand aur rooh-ul-quds kay naam say baptisma do. 20aur unhen yah sikhaao ki vah un tamaam ahkaam kay mutaabiq zindagee guzaaren jo main nay tumhen diay hain. aur dekho, main duniya kay ikhtitaam tak hamesha tumhaaray saath hoon.”

Āmaal 1

8lekin tumhen rooh-ul-quds kee quvvat milegee jo tum par naazil hoga. phir tum yarooshalam, pooray yahoodiya aur saamriya balki duniya kee intiha tak meray gavaah hogay.” 9yah kah kar vah un kay dekhtay dekhtay utha liya gaya. aur ek baadal nay usay un kee nazron say ojhal kar diya.

10vah abhee aasmaan kee taraf dekh hee rahay thay ki achaanak do aadmee un kay paas a khaday huay. donon safed libaas pahenay huay thay. 11unhon nay kaha, “galeel kay mardo, aap kyoon khaday aasmaan kee taraf dekh rahay hain? yahee eesa jisay aap kay paas say aasmaan par uthaaya gaya hai usee tarah vaapas aaega jis tarah aap nay usay oopar jaatay huay dekha hai.”

Yoohanna 3

16kyoonki allaah nay duniya say itnee muhabbat rakhee ki us nay apnay iklautay farzand ko bakhsh diya, taaki jo bhee us par eemaan laaay halaak na ho balki abdee zindagee paaay. 17kyoonki allaah nay apnay farzand ko is liyay duniya men naheen bheja ki vah duniya ko mujrim thaheraaay balki is liyay ki vah usay najaat day.

Romiyon 10

9yaanee yah ki agar too apnay munh say iqraar karay ki eesa khudaavand hai aur dil say eemaan laaay ki allaah nay usay murdon men say zinda kar diya to tujhay najaat milegee. 10kyoonki jab ham dil say eemaan laatay hain to allaah hamen raastbaaz qaraar deta hai, aur jab ham apnay munh say iqraar kartay hain to hamen najaat miltee hai.