Mattee 9

do andhon kee shifaa

27jab eesa vahaan say ravaana hua to do andhay us kay peechhay chal kar chillaanay lagay, “ibn-ay-daaood, ham par rahem karen.”

28jab eesa kisee kay ghar men daakhil hua to vah us kay paas aaay. eesa nay un say poochha, “kya tumhaara eemaan hai ki main yah kar sakta hoon?”

unhon nay javaab diya, “jee, khudaavand.”

29phir us nay un kee aankhen chhoo kar kaha, “tumhaaray saath tumhaaray eemaan kay mutaabiq ho jaaay.” 30un kee aankhen bahaal ho gaeen aur eesa nay sakhtee say unhen kaha, “khabardaar, kisee ko bhee is ka pata na chalay!”

31lekin vah nikal kar pooray ilaaqay men us kee khabar phailaanay lagay.

goongay aadmee kee shifaa

32jab vah nikal rahay thay to ek goonga aadmee eesa kay paas laaya gaya jo kisee badruh kay qabzay men tha. 33jab badruh ko nikaala gaya to goonga bolnay laga. hujoom hairaan rah gaya. unhon nay kaha, “aisa kaam israaeel men kabhee naheen dekha gaya.”

34lekin fareesiyon nay kaha, “vah badroohon kay sardaar hee kee madad say badroohon ko nikaalta hai.”

Marqus 6

2sabat kay din vah ibaadatkhaanay men taaleem denay laga. beshatar log us kee baaten sun kar hairatzada huay. unhon nay poochha, “isay yah kahaan say haasil hua hai? yah hikmat jo isay milee hai, aur yah mojizay jo is kay haathon say hotay hain, yah kya hai? 3kya yah vah badhaee naheen hai jo mariyam ka beta hai aur jis kay bhaaee yaaqoob, yoosuf, yahoodaah aur shamaaoon hain? aur kya is kee bahenen yaheen naheen raheteen?” yoon unhon nay us say thokar kha kar usay qabool na kiya.

4eesa nay un say kaha, “nabee kee har jagah izzat hotee hai siva-ay-us kay vatnee shaher, us kay rishtedaaron aur us kay apnay khaandaan kay.”

5vahaan vah koee mojiza na kar saka. us nay sirf chand ek mareezon par haath rakh kar un ko shifa dee. 6aur vah un kee bay-etiqaadee kay sabab say bahut hairaan tha.

eesa baarah shaagirdon ko tableegh karnay bhejta hai

is kay baad eesa nay ird-gird kay ilaaqay men gaaon gaaon ja kar logon ko taaleem dee.7baarah shaagirdon ko bula kar vah unhen do do karkay mukhtalif jagahon par bhejnay laga. is kay liyay us nay unhen naapaak roohon ko nikaalnay ka ikhtiyaar day kar 8yah hidaayat kee, “safar par apnay saath kuchh na lena siva-ay-ek laathee kay. na rotee, na saamaan kay liyay koee baig, na kamarband men koee paisa, 9na ek say ziyaada soot. tum jootay pahen saktay ho. 10jis ghar men bhee daakhil ho us men us maqaam say chalay jaanay tak thahero. 11aur agar koee maqaam tum ko qabool na karay ya tumhaaree na sunay to phir ravaana hotay vaqt apnay paaon say gard jhaad do. yoon tum un kay khilaaf gavaahee dogay.”

Marqus 6

eesa 5000 afraad ko khaana khilaata hai

30rasool vaapas a kar eesa kay paas jama huay aur usay sab kuchh sunaanay lagay jo unhon nay kiya aur sikhaaya tha. 31is dauraan itnay log a aur ja rahay thay ki unhen khaana khaanay ka mauqa bhee na mila. is liyay eesa nay baarah shaagirdon say kaha, “aao, ham logon say alag ho kar kisee ghair’aabaad jagah jaaen aur aaraam karen.” 32chunaanchay vah kashtee par savaar ho kar kisee veeraan jagah chalay gaay.

33lekin bahut say logon nay unhen jaatay vaqt pahechaan liya. vah paidal chal kar tamaam shaheron say nikal aaay aur daud daud kar un say pahelay manzil-ay-maqsood tak pahunch gaay. 34jab eesa nay kashtee par say utar kar baday hujoom ko dekha to usay logon par taras aaya, kyoonki vah un bhedon kee maanind thay jin ka koee charvaaha na ho. vaheen vah unhen bahut see baaten sikhaanay laga.

35jab din dhalnay laga to us kay shaagird us kay paas aaay aur kaha, “yah jagah veeraan hai aur din dhalnay laga hai. 36in ko rukhsat kar den taaki yah ird-gird kee bastiyon aur deehaaton men ja kar khaanay kay liyay kuchh khareed len.”

37lekin eesa nay unhen kaha, “tum khud inhen kuchh khaanay ko do.”

unhon nay poochha, “ham is kay liyay darkaar chaandee kay 200 sikkay kahaan say lay kar rotee khareednay jaaen aur inhen khilaaen?”

38us nay kaha, “tumhaaray paas kitnee rotiyaan hain? ja kar pata karo!”

unhon nay maaloom kiya. phir dubaara us kay paas a kar kahenay lagay, “hamaaray paas paanch rotiyaan aur do machhliyaan hain.”

39is par eesa nay unhen hidaayat dee, “tamaam logon ko gurohon men haree ghaas par bitha do.” 40chunaanchay log sau sau aur pachaas pachaas kee soorat men baith gaay. 41phir eesa nay un paanch rotiyon aur do machhliyon ko lay kar aasmaan kee taraf dekha aur shukrguzaaree kee dua kee. phir us nay rotiyon ko tod tod kar shaagirdon ko diya taaki vah logon men taqseem karen. us nay do machhliyon ko bhee tukday tukday karkay shaagirdon kay zareeay un men taqseem karvaaya. 42aur sab nay jee bhar kar khaaya. 43jab shaagirdon nay rotiyon aur machhliyon kay bachay huay tukday jama kiay to baarah tokray bhar gaay. 44khaanay vaalay mardon kee kul taadaad 5,000 thee.

eesa paanee par chalta hai

45is kay ain baad eesa nay apnay shaagirdon ko majboor kiya ki vah kashtee par savaar ho kar aagay niklen aur jheel kay paar kay shaher bait-saida jaaen. itnay men vah hujoom ko rukhsat karna chaahata tha. 46unhen khairbaad kahenay kay baad vah dua karnay kay liyay pahaad par chadh gaya. 47shaam kay vaqt shaagirdon kee kashtee jheel kay beech tak pahunch gaee thee jabki eesa khud khushkee par akela rah gaya tha. 48vahaan say us nay dekha ki shaagird kashtee ko khenay men badee jidd-o-jahd kar rahay hain, kyoonki hava un kay khilaaf chal rahee thee. taqreeban teen bajay raat kay vaqt eesa paanee par chaltay huay un kay paas aaya. vah un say aagay nikalna chaahata tha, 49lekin jab unhon nay usay jheel kee satah par chaltay huay dekha to sochnay lagay, “yah koee bhoot hai” aur cheekhen maarnay lagay. 50kyoonki sab nay usay dekh kar dahshat khaaee.

lekin eesa fauran un say mukhaatib ho kar bola, “hausla rakho! main hee hoon. mat ghabraao.”51phir vah un kay paas aaya aur kashtee men baith gaya. usee vaqt hava tham gaee. shaagird nihaayat hee hairatzada huay. 52kyoonki jab rotiyon ka mojiza kiya gaya tha to vah is ka matlab naheen samjhay thay balki un kay dil behiss ho gaay thay.

gannesarat men mareezon kee shifaa

53jheel ko paar karkay vah gannesarat shaher kay paas pahunch gaay aur langar daal diya. 54joon hee vah kashtee say utray logon nay eesa ko pahechaan liya. 55vah bhaag bhaag kar us pooray ilaaqay men say guzray aur mareezon ko chaarpaaiyon par utha utha kar vahaan lay aaay jahaan kaheen unhen khabar milee ki vah thahera hua hai. 56jahaan bhee vah gaya chaahay gaaon, shaher ya bastee men, vahaan logon nay beemaaron ko chaukon men rakh kar us say minnat kee ki vah kam az kam unhen apnay libaas kay daaman ko chhoonay day. aur jis nay bhee usay chhua usay shifa milee.

Looqa 7

beva ka beta zinda kiya jaata hai

11kuchh der kay baad eesa apnay shaagirdon kay saath naain shaher kay liyay ravaana hua. ek bada hujoom bhee saath chal raha tha. 12jab vah shaher kay darvaazay kay qareeb pahuncha to ek janaaza nikla. jo naujavaan faut hua tha us kee maan beva thee aur vah us ka iklauta beta tha. maan kay saath shaher kay bahut say log chal rahay thay. 13usay dekh kar khudaavand ko us par bada taras aaya. us nay us say kaha, “mat ro.” 14phir vah janaazay kay paas gaya aur usay chhua. usay uthaanay vaalay ruk gaay to eesa nay kaha, “ai naujavaan, main tujhay kaheta hoon ki uth!” 15murda uth baitha aur bolnay laga. eesa nay usay us kee maan kay sapurd kar diya.

16yah dekh kar tamaam logon par khauf taaree ho gaya aur vah allaah kee tamjeed karkay kahenay lagay, “hamaaray darmiyaan ek bada nabee barpa hua hai. allaah nay apnee qaum par nazar kee hai.”

17aur eesa kay baaray men yah khabar pooray yahoodiya aur ird-gird kay ilaaqay men phail gaee.

Mattee 16

patras ka iqraar

13jab eesa qaisriya-filippee kay ilaaqay men pahuncha to us nay shaagirdon say poochha, “ibn-ay-aadam logon kay nazdeek kaun hai?”

14unhon nay javaab diya, “kuchh kahetay hain yaheya baptisma denay vaala, kuchh yah ki aap ilyaas nabee hain. kuchh yah bhee kahetay hain ki yaramiyaah ya nabiyon men say ek.”

15us nay poochha, “lekin tumhaaray nazdeek main kaun hoon?”

16patras nay javaab diya, “aap zinda khuda kay farzand maseeh hain.”

17eesa nay kaha, “shamaaoon bin yoonus, too mubaarak hai, kyoonki kisee insaan nay tujh par yah zaahir naheen kiya balki meray aasmaanee baap nay. 18main tujhay yah bhee bataata hoon ki too patras yaanee patthar hai, aur isee patthar par main apnee jamaaat ko taameer karoonga, aisee jamaaat jis par paataal kay darvaazay bhee ghaalib naheen aaengay. 19main tujhay aasmaan kee baadshaahee kee kunjiyaan day doonga. jo kuchh too zameen par baandhega vah aasmaan par bhee bandhega. aur jo kuchh too zameen par kholega vah aasmaan par bhee khulega.”

20phir eesa nay apnay shaagirdon ko hukm diya, “kisee ko bhee na bataao ki main maseeh hoon.”

Marqus 9

pahaad par eesa kee soorat badal jaatee hai

2chhah din kay baad eesa sirf patras, yaaqoob aur yoohanna ko apnay saath lay kar oonchay pahaad par chadh gaya. vahaan us kee shakl-o-soorat un kay saamnay badal gaee. 3us kay kapday chamaknay lagay aur nihaayat safed ho gaay. duniya men koee bhee dhobee kapday itnay safed naheen kar sakta. 4phir ilyaas aur moosa zaahir huay aur eesa say baat karnay lagay. 5patras bol utha, “ustaad, kitnee achchhee baat hai ki ham yahaan hain. aaen, ham teen jhompadiyaan banaaen, ek aap kay liyay, ek moosa kay liyay aur ek ilyaas kay liyay.” 6us nay yah is liyay kaha ki teenon shaagird sahemay huay thay aur vah naheen jaanta tha ki kya kahay.

7is par ek baadal a kar un par chha gaya aur baadal men say ek aavaaz sunaaee dee, “yah mera piyaara farzand hai. is kee suno.” 8achaanak moosa aur ilyaas ghaaib ho gaay. shaagirdon nay chaaron taraf dekha, lekin sirf eesa nazar aaya.

9vah pahaad say utarnay lagay to eesa nay unhen hukm diya, “jo kuchh tum nay dekha hai usay us vaqt tak kisee ko na bataana jab tak ki ibn-ay-aadam murdon men say jee na uthay.”

10chunaanchay unhon nay yah baat apnay tak mahdood rakhee. lekin vah kaee baar aapas men bahs karnay lagay ki murdon men say jee uthnay say kya muraad ho saktee hai. 11phir unhon nay us say poochha, “shareeat kay ulma kyoon kahetay hain ki maseeh kee aamad say pahelay ilyaas ka aana zarooree hai?”

12eesa nay javaab diya, “ilyaas to zaroor pahelay sab kuchh bahaal karnay kay liyay aaega. lekin kalaam-ay-muqaddas men ibn-ay-aadam kay baaray men yah kyoon likha hai ki usay bahut dukh uthaana aur haqeer samjha jaana hai? 13lekin main tum ko bataata hoon, ilyaas to a chuka hai aur unhon nay us kay saath jo chaaha kiya. yah bhee kalaam-ay-muqaddas kay mutaabiq hee hua hai.”

eesa ladkay men say badruh nikaalta hai

14jab vah baaqee shaagirdon kay paas vaapas pahunchay to unhon nay dekha ki un kay gird ek bada hujoom jama hai aur shareeat kay kuchh ulma un kay saath bahs kar rahay hain. 15eesa ko dekhtay hee logon nay badee bechainee say us kee taraf daud kar usay salaam kiya. 16us nay shaagirdon say savaal kiya, “tum un kay saath kis kay baaray men bahs kar rahay ho?”

17hujoom men say ek aadmee nay javaab diya, “ustaad, main apnay betay ko aap kay paas laaya tha. vah aisee badruh kay qabzay men hai jo usay bolnay naheen detee. 18aur jab bhee vah us par ghaalib aatee hai vah usay zameen par patak detee hai. betay kay munh say jhaag nikalnay lagta aur vah daant peesnay lagta hai. phir us ka jism akad jaata hai. main nay aap kay shaagirdon say kaha to tha ki vah badruh ko nikaal den, lekin vah na nikaal sakay.”

19eesa nay un say kaha, “eemaan say khaalee nasal! main kab tak tumhaaray saath rahoon, kab tak tumhen bardaasht karoon? ladkay ko meray paas lay aao.” 20vah usay eesa kay paas lay aaay.

eesa ko dekhtay hee badruh ladkay ko jhanjhodnay lagee. vah zameen par gir gaya aur idhar udhar ludhaktay huay munh say jhaag nikaalnay laga.21eesa nay baap say poochha, “is kay saath kab say aisa ho raha hai?”

us nay javaab diya, “bachpan say.22bahut dafa us nay isay halaak karnay kee khaatir aag ya paanee men giraaya hai. agar aap kuchh kar saktay hain to taras kha kar hamaaree madad karen.”

23eesa nay poochha, “kya matlab, ‘agar aap kuchh kar saktay hain’? jo eemaan rakhta hai us kay liyay sab kuchh mumkin hai.”

24ladkay ka baap fauran chilla utha, “main eemaan rakhta hoon. meree bay-etiqaadee ka ilaaj karen.”

25eesa nay dekha ki bahut say log daud daud kar dekhnay a rahay hain, is liyay us nay naapaak rooh ko daanta, “ai goongee aur baheree badruh, main tujhay hukm deta hoon ki is men say nikal ja. kabhee bhee is men dubaara daakhil na hona!”

26is par badruh cheekh uthee aur ladkay ko shiddat say jhanjhod kar nikal gaee. ladka laash kee tarah zameen par pada raha, is liyay sab nay kaha, “vah mar gaya hai.” 27lekin eesa nay us ka haath pakad kar uthnay men us kee madad kee aur vah khada ho gaya.

28baad men jab eesa kisee ghar men ja kar apnay shaagirdon kay saath akela tha to unhon nay us say poochha, “ham badruh ko kyoon na nikaal sakay?”

29us nay javaab diya, “is qism kee badruh sirf dua say nikaalee ja saktee hai.”

eesa doosree dafa apnee maut ka zikr karta hai

30vahaan say nikal kar vah galeel men say guzray. eesa naheen chaahata tha ki kisee ko pata chalay ki vah kahaan hai, 31kyoonki vah apnay shaagirdon ko taaleem day raha tha. us nay un say kaha, “ibn-ay-aadam ko aadmiyon kay havaalay kar diya jaaega. vah usay qatl karengay, lekin teen din kay baad vah jee uthega.”

32lekin shaagird is ka matlab na samjhay aur vah eesa say is kay baaray men poochhnay say dartay bhee thay.

kaun sab say bada hai?

33chaltay chaltay vah kafarnahoom pahunchay. jab vah kisee ghar men thay to eesa nay shaagirdon say savaal kiya, “raastay men tum kis baat par bahs kar rahay thay?”

34lekin vah khaamosh rahay, kyoonki vah raastay men is par bahs kar rahay thay ki ham men say bada kaun hai? 35eesa baith gaya aur baarah shaagirdon ko bula kar kaha, “jo avval hona chaahata hai vah sab say aakhir men aaay aur sab ka khaadim ho.” 36phir us nay ek chhotay bachchay ko lay kar un kay darmiyaan khada kiya. usay galay laga kar us nay un say kaha, 37“jo meray naam men in bachchon men say kisee ko qabool karta hai vah mujhay hee qabool karta hai. aur jo mujhay qabool karta hai vah mujhay naheen balki usay qabool karta hai jis nay mujhay bheja hai.”