Ahabaar 4

gunaah kee qurbaanee

¹rabb nay moosa say kaha, ²“israaeeliyon ko bataana ki jo bhee ghairiraadee taur par gunaah karkay rabb kay kisee hukm ko today vah yah karay :

imaam kay liyay gunaah kee qurbaanee

³agar imaam-ay-aazam gunaah karay aur nateejay men pooree qaum qusoorvaar thaheray to phir vah rabb ko ek beaib javaan bail lay kar gunaah kee qurbaanee kay taur par pesh karay. ⁴vah javaan bail ko mulaaqaat kay khaimay kay darvaazay kay paas lay aaay aur apna haath us kay sar par rakh kar usay rabb kay saamnay zabah karay. ⁵phir vah jaanvar kay khoon men say kuchh lay kar khaimay men jaaay. ⁶vahaan vah apnee unglee us men daal kar usay saat baar rabb kay saamnay yaanee muqaddastareen kamray kay parday par chhidkay. ⁷phir vah khaimay kay andar kee us qurbaangaah kay chaaron seengon par khoon lagaaay jis par bakhoor jalaaya jaata hai. baaqee khoon vah baahar khaimay kay darvaazay par kee us qurbaangaah kay paaay par undelay jis par jaanvar jalaaay jaatay hain. ⁸javaan bail kee saaree charbee, antadiyon par kee saaree charbee, ⁹gurday us charbee samet jo un par aur kamar kay qareeb hotee hai aur jodkalejee ko gurdon kay saath hee alag karna hai. ¹⁰yah bilkul usee tarah kiya jaaay jis tarah us bail kay saath kiya gaya jo salaamatee kee qurbaanee kay liyay pesh kiya jaata hai. imaam yah sab kuchh us qurbaangaah par jala day jis par jaanvar jalaaay jaatay hain. ¹¹lekin vah us kee khaal, us ka saara gosht, sar aur pindaliyaan, antadiyaan aur un ka gobar ¹²khaimaagaah kay baahar lay jaaay. yah cheezen us paak jagah par jahaan qurbaaniyon kee raakh phainkee jaatee hai lakdiyon par rakh kar jala denee hain.

qaum kay liyay gunaah kee qurbaanee

¹³agar israaeel kee pooree jamaaat nay ghairiraadee taur par gunaah karkay rabb kay kisee hukm say tajaavuz kiya hai aur jamaaat ko maaloom naheen tha to bhee vah qusoorvaar hai. ¹⁴jab logon ko pata lagay ki ham nay gunaah kiya hai to jamaaat mulaaqaat kay khaimay kay paas ek javaan bail lay aaay aur usay gunaah kee qurbaanee kay taur par pesh karay. ¹⁵jamaaat kay buzurg rabb kay saamnay apnay haath us kay sar par rakhen, aur vah vaheen zabah kiya jaaay. ¹⁶phir imaam-ay-aazam jaanvar kay khoon men say kuchh lay kar mulaaqaat kay khaimay men jaaay. ¹⁷vahaan vah apnee unglee us men daal kar usay saat baar rabb kay saamnay yaanee muqaddastareen kamray kay parday par chhidkay. ¹⁸phir vah khaimay kay andar kee us qurbaangaah kay chaaron seengon par khoon lagaaay jis par bakhoor jalaaya jaata hai. baaqee khoon vah baahar khaimay kay darvaazay kee us qurbaangaah kay paaay par undelay jis par jaanvar jalaaay jaatay hain. ¹⁹is kay baad vah us kee tamaam charbee nikaal kar qurbaangaah par jala day. ²⁰us bail kay saath vah sab kuchh karay jo usay apnay zaatee ghairiraadee gunaah kay liyay karna hota hai. yoon vah logon ka kaffaara dega aur unhen muaafee mil jaaegee. ²¹aakhir men vah bail ko khaimaagaah kay baahar lay ja kar us tarah jala day jis tarah usay apnay liyay bail ko jala dena hota hai. yah jamaaat ka gunaah door karnay kee qurbaanee hai.

qaum kay raahanuma kay liyay gunaah kee qurbaanee

²²agar koee sardaar ghairiraadee taur par gunaah karkay rabb kay kisee hukm say tajaavuz karay aur yoon qusoorvaar thaheray to ²³jab bhee usay pata lagay ki mujh say gunaah hua hai to vah qurbaanee kay liyay ek beaib bakra lay aaay. ²⁴vah apna haath bakray kay sar par rakh kar usay vahaan zabah karay jahaan bhasm honay vaalee qurbaaniyaan zabah kee jaatee hain. yah gunaah kee qurbaanee hai. ²⁵imaam apnee unglee khoon men daal kar usay us qurbaangaah kay chaaron seengon par lagaaay jis par jaanvar jalaaay jaatay hain. baaqee khoon vah qurbaangaah kay paaay par undelay. ²⁶phir vah us kee saaree charbee qurbaangaah par us tarah jala day jis tarah vah salaamatee kee qurbaaniyon kee charbee jala deta hai. yoon imaam us aadmee ka kaffaara dega aur usay muaafee haasil ho jaaegee.

aam logon kay liyay gunaah kee qurbaanee

²⁷agar koee aam shakhs ghairiraadee taur par gunaah karkay rabb kay kisee hukm say tajaavuz karay aur yoon qusoorvaar thaheray to ²⁸jab bhee usay pata lagay ki mujh say gunaah hua hai to vah qurbaanee kay liyay ek beaib bakree lay aaay. ²⁹vah apna haath bakree kay sar par rakh kar usay vahaan zabah karay jahaan bhasm honay vaalee qurbaaniyaan zabah kee jaatee hain. ³⁰imaam apnee unglee khoon men daal kar usay us qurbaangaah kay chaaron seengon par lagaaay jis par jaanvar jalaaay jaatay hain. baaqee khoon vah qurbaangaah kay paaay par undelay. ³¹phir vah us kee saaree charbee us tarah nikaalay jis tarah vah salaamatee kee qurbaaniyon kee charbee nikaalta hai. is kay baad vah usay qurbaangaah par jala day. aisee qurbaanee kee khushboo rabb ko pasand hai. yoon imaam us aadmee ka kaffaara dega aur usay muaafee haasil ho jaaegee.

³²agar vah gunaah kee qurbaanee kay liyay bhed ka bachcha laana chaahay to vah beaib maada ho. ³³vah apna haath us kay sar par rakh kar usay vahaan zabah karay jahaan bhasm honay vaalee qurbaaniyaan zabah kee jaatee hain. ³⁴imaam apnee unglee khoon men daal kar usay us qurbaangaah kay chaaron seengon par lagaaay jis par jaanvar jalaaay jaatay hain. baaqee khoon vah qurbaangaah kay paaay par undelay. ³⁵phir vah us kee tamaam charbee us tarah nikaalay jis tarah salaamatee kee qurbaanee kay liyay zabah kiay gaay javaan mendhay kee charbee nikaalee jaatee hai. is kay baad imaam charbee ko qurbaangaah par un qurbaaniyon samet jala day jo rabb kay liyay jalaaee jaatee hain. yoon imaam us aadmee ka kaffaara dega aur usay muaafee mil jaaegee.