Ḵẖurūj 22
milkiyat kī hifāzat
1jis ne koī bail yā bheṛ chorī karke use zabah kiyā yā bech ḍālā hai use har chorī ke bail ke ivz pāṅch bail aur har chorī kī bheṛ ke ivz chār bheṛeṅ vāpas karnā hai.
2ho saktā hai ki koī chor naqab lagā rahā ho aur log use pakaṛ kar yahāṅ tak mārte pīṭte raheṅ ki vah mar jāe. agar rāt ke vaqt aisā huā ho to vah us ke ḵẖūn ke zimmādār nahīṅ ṭhahar sakte. 3lekin agar sūraj ke tulū hone ke bād aisā huā ho to jis ne use mārā vah qātil ṭhaharegā.
chor ko har churāī huī chīz kā ivzānā denā hai. agar us ke pās dene ke liye kuchh na ho to use ġulām banā kar bechanā hai. jo paise use bechane ke ivz mileṅ vah churāī huī chīzoṅ ke badle meṅ die jāeṅ.
4agar chorī kā jānvar chor ke pās zindā pāyā jāe to use har jānvar ke ivz do dene paṛeṅge, chāhe vah bail, bheṛ, bakrī yā gadhā ho.
5ho saktā hai ki koī apne maveshī ko apne khet yā aṅgūr ke bāġ meṅ chhoṛ kar charne de aur hote hote vah kisī dūsre ke khet yā aṅgūr ke bāġ meṅ jā kar charne lage. aisī sūrat meṅ lāzim hai ki maveshī kā mālik nuqsān ke ivz apne aṅgūr ke bāġ aur khet kī behtarīn paidāvār meṅ se de.
6ho saktā hai ki kisī ne āg jalāī ho aur vah kāṅṭedār jhāṛiyoṅ ke zarīe paṛosī ke khet tak phail kar us ke anāj ke pūloṅ ko, us kī pakī huī fasal ko yā khet kī kisī aur paidāvār ko barbād kar de. aisī sūrat meṅ jis ne āg jalāī ho use us kī pūrī qīmat adā karnī hai.
7ho saktā hai ki kisī ne kuchh paise yā koī aur māl apne kisī vāqifkār ke sapurd kar diyā ho tāki vah use mahfūz rakhe. agar yah chīzeṅ us ke ghar se chorī ho jāeṅ aur bād meṅ chor ko pakṛā jāe to chor ko us kī dugnī qīmat adā karnī paṛegī. 8lekin agar chor pakṛā na jāe to lāzim hai ki us ghar kā mālik jis ke sapurd yah chīzeṅ kī gaī thīṅ allāh ke huzūr khaṛā ho tāki mālūm kiyā jāe ki us ne ḵẖud yah māl chorī kiyā hai yā nahīṅ.
9ho saktā hai ki do logoṅ kā āpas meṅ jhagṛā ho, aur donoṅ kisī chīz ke bāre meṅ dāvā karte hoṅ ki yah merī hai. agar koī qīmtī chīz ho maslan bail, gadhā, bheṛ, bakrī, kapṛe yā koī khoī huī chīz to muāmalā allāh ke huzūr lāyā jāe. jise allāh qusūrvār qarār de use dūsre ko zer-e-bahs chīz kī dugnī qīmat adā karnī hai.
10ho saktā hai ki kisī ne apnā koī gadhā, bail, bheṛ, bakrī yā koī aur jānvar kisī vāqifkār ke sapurd kar diyā tāki vah use mahfūz rakhe. vahāṅ jānvar mar jāe yā zaḵẖmī ho jāe, yā koī us par qabzā karke use us vaqt le jāe jab koī na dekh rahā ho. 11yah muāmalā yūṅ hal kiyā jāe ki jis ke sapurd jānvar kiyā gayā thā vah rabb ke huzūr qasam khā kar kahe ki maiṅ ne apne vāqifkār ke jānvar ke lālach meṅ yah kām nahīṅ kiyā. jānvar ke mālik ko yah qabūl karnā paṛegā, aur dūsre ko is ke badle kuchh nahīṅ denā hogā. 12lekin agar vāqaī jānvar ko chorī kiyā gayā hai to jis ke sapurd jānvar kiyā gayā thā use us kī qīmat adā karnī paṛegī. 13agar kisī jaṅglī jānvar ne use phāṛ ḍālā ho to vah sabūt ke taur par phāṛī huī lāsh ko le āe. phir use us kī qīmat adā nahīṅ karnī paṛegī.
14ho saktā hai ki koī apne vāqifkār se ijāzat le kar us kā jānvar istemāl kare. agar jānvar ko mālik kī ġairmaujūdgī meṅ choṭ lage yā vah mar jāe to us shaḵẖs ko jis ke pās jānvar us vaqt thā us kā muāvazā denā paṛegā. 15lekin agar jānvar kā mālik us vaqt sāth thā to dūsre ko muāvazā dene kī zarūrat nahīṅ hogī. agar us ne jānvar ko kirāe par liyā ho to us kā nuqsān kirāe se pūrā ho jāegā.
laṛkī ko varġalāne kā jurm
16agar kisī kuṅvārī kī maṅgnī nahīṅ huī aur koī mard use varġalā kar us se hambistar ho jāe to vah mahar de kar us se shādī kare. 17lekin agar laṛkī kā bāp us kī us mard ke sāth shādī karne se inkār kare, is sūrat meṅ bhī mard ko kuṅvārī ke liye muqarrarā raqam denī paṛegī.
sazā-e-maut ke lāiq jarāim
18jādūgaranī ko jīne na denā.
19jo shaḵẖs kisī jānvar ke sāth jinsī tālluqāt rakhtā ho use sazā-e-maut dī jāe.
20jo na sirf rabb ko qurbāniyāṅ pesh kare balki dīgar mābūdoṅ ko bhī use qaum se nikāl kar halāk kiyā jāe.
kamzoroṅ kī hifāzat ke liye ahkām
21jo pardesī tere mulk meṅ mehamān hai use na dabānā aur na us se burā sulūk karnā, kyūṅki tum bhī misr meṅ pardesī the.
22kisī bevā yā yatīm se burā sulūk na karnā. 23agar tū aisā kare aur vah chillā kar mujh se faryād kareṅ to maiṅ zarūr un kī sunūṅgā. 24maiṅ baṛe ġusse meṅ ā kar tumheṅ talvār se mār ḍālūṅgā. phir tumhārī bīviyāṅ ḵẖud bevāeṅ aur tumhāre bacche ḵẖud yatīm ban jāeṅge.
25agar tū ne merī qaum ke kisī ġarīb ko qarz diyā hai to us se sūd na lenā.
26agar tujhe kisī se us kī chādar girvī ke taur par milī ho to use sūraj ḍūbne se pahale hī vāpas kar denā hai, 27kyūṅki isī ko vah sone ke liye istemāl kartā hai. varnā vah kyā chīz oṛh kar soegā? agar tū chādar vāpas na kare aur vah shaḵẖs chillā kar mujh se faryād kare to maiṅ us kī sunūṅgā, kyūṅki maiṅ meharbān hūṅ.
allāh se mutālliq farāiz
28allāh ko na kosnā, na apnī qaum ke kisī sardār par lānat karnā.
29mujhe vaqt par apne khet aur kolhūoṅ kī paidāvār meṅ se nazrāne pesh karnā. apne pahalauṭhe mujhe denā. 30apne bailoṅ, bheṛoṅ aur bakriyoṅ ke pahalauṭhoṅ ko bhī mujhe denā. jānvar kā pahalauṭhā pahale sāt din apnī māṅ ke sāth rahe. āṭhveṅ din vah mujhe diyā jāe.
31apne āp ko mere liye maḵẖsūs-o-muqaddas rakhnā. is liye aise jānvar kā gosht mat khānā jise kisī jaṅglī jānvar ne phāṛ ḍālā hai. aise gosht ko kuttoṅ ko khāne denā.