Ḵẖurooj 22
milkiyat kee hifaazat
1jis nay koee bail ya bhed choree karkay usay zabah kiya ya bech daala hai usay har choree kay bail kay ivz paanch bail aur har choree kee bhed kay ivz chaar bheden vaapas karna hai.
2ho sakta hai ki koee chor naqab laga raha ho aur log usay pakad kar yahaan tak maartay peettay rahen ki vah mar jaaay. agar raat kay vaqt aisa hua ho to vah us kay khoon kay zimmaadaar naheen thaher saktay. 3lekin agar sooraj kay tuloo honay kay baad aisa hua ho to jis nay usay maara vah qaatil thaherega.
chor ko har churaaee huee cheez ka ivzaana dena hai. agar us kay paas denay kay liyay kuchh na ho to usay ghulaam bana kar bechana hai. jo paisay usay bechanay kay ivz milen vah churaaee huee cheezon kay badlay men diay jaaen.
4agar choree ka jaanvar chor kay paas zinda paaya jaaay to usay har jaanvar kay ivz do denay padengay, chaahay vah bail, bhed, bakree ya gadha ho.
5ho sakta hai ki koee apnay maveshee ko apnay khet ya angoor kay baagh men chhod kar charnay day aur hotay hotay vah kisee doosray kay khet ya angoor kay baagh men ja kar charnay lagay. aisee soorat men laazim hai ki maveshee ka maalik nuqsaan kay ivz apnay angoor kay baagh aur khet kee behtareen paidaavaar men say day.
6ho sakta hai ki kisee nay aag jalaaee ho aur vah kaantedaar jhaadiyon kay zareeay padosee kay khet tak phail kar us kay anaaj kay poolon ko, us kee pakee huee fasal ko ya khet kee kisee aur paidaavaar ko barbaad kar day. aisee soorat men jis nay aag jalaaee ho usay us kee pooree qeemat ada karnee hai.
7ho sakta hai ki kisee nay kuchh paisay ya koee aur maal apnay kisee vaaqifkaar kay sapurd kar diya ho taaki vah usay mahfooz rakhay. agar yah cheezen us kay ghar say choree ho jaaen aur baad men chor ko pakda jaaay to chor ko us kee dugnee qeemat ada karnee padegee. 8lekin agar chor pakda na jaaay to laazim hai ki us ghar ka maalik jis kay sapurd yah cheezen kee gaee theen allaah kay huzoor khada ho taaki maaloom kiya jaaay ki us nay khud yah maal choree kiya hai ya naheen.
9ho sakta hai ki do logon ka aapas men jhagda ho, aur donon kisee cheez kay baaray men daava kartay hon ki yah meree hai. agar koee qeemtee cheez ho maslan bail, gadha, bhed, bakree, kapday ya koee khoee huee cheez to muaamala allaah kay huzoor laaya jaaay. jisay allaah qusoorvaar qaraar day usay doosray ko zer-ay-bahs cheez kee dugnee qeemat ada karnee hai.
10ho sakta hai ki kisee nay apna koee gadha, bail, bhed, bakree ya koee aur jaanvar kisee vaaqifkaar kay sapurd kar diya taaki vah usay mahfooz rakhay. vahaan jaanvar mar jaaay ya zakhmee ho jaaay, ya koee us par qabza karkay usay us vaqt lay jaaay jab koee na dekh raha ho. 11yah muaamala yoon hal kiya jaaay ki jis kay sapurd jaanvar kiya gaya tha vah rabb kay huzoor qasam kha kar kahay ki main nay apnay vaaqifkaar kay jaanvar kay laalach men yah kaam naheen kiya. jaanvar kay maalik ko yah qabool karna padega, aur doosray ko is kay badlay kuchh naheen dena hoga. 12lekin agar vaaqaee jaanvar ko choree kiya gaya hai to jis kay sapurd jaanvar kiya gaya tha usay us kee qeemat ada karnee padegee. 13agar kisee janglee jaanvar nay usay phaad daala ho to vah saboot kay taur par phaadee huee laash ko lay aaay. phir usay us kee qeemat ada naheen karnee padegee.
14ho sakta hai ki koee apnay vaaqifkaar say ijaazat lay kar us ka jaanvar istemaal karay. agar jaanvar ko maalik kee ghairmaujoodgee men chot lagay ya vah mar jaaay to us shakhs ko jis kay paas jaanvar us vaqt tha us ka muaavaza dena padega. 15lekin agar jaanvar ka maalik us vaqt saath tha to doosray ko muaavaza denay kee zaroorat naheen hogee. agar us nay jaanvar ko kiraaay par liya ho to us ka nuqsaan kiraaay say poora ho jaaega.
ladkee ko varghalaanay ka jurm
16agar kisee kunvaaree kee mangnee naheen huee aur koee mard usay varghala kar us say hambistar ho jaaay to vah maher day kar us say shaadee karay. 17lekin agar ladkee ka baap us kee us mard kay saath shaadee karnay say inkaar karay, is soorat men bhee mard ko kunvaaree kay liyay muqarrara raqam denee padegee.
saza-ay-maut kay laaiq jaraaim
18jaadoogaranee ko jeenay na dena.
19jo shakhs kisee jaanvar kay saath jinsee taalluqaat rakhta ho usay saza-ay-maut dee jaaay.
20jo na sirf rabb ko qurbaaniyaan pesh karay balki deegar maaboodon ko bhee usay qaum say nikaal kar halaak kiya jaaay.
kamzoron kee hifaazat kay liyay ahkaam
21jo pardesee teray mulk men mehamaan hai usay na dabaana aur na us say bura sulook karna, kyoonki tum bhee misr men pardesee thay.
22kisee beva ya yateem say bura sulook na karna. 23agar too aisa karay aur vah chilla kar mujh say faryaad karen to main zaroor un kee sunoonga. 24main baday ghussay men a kar tumhen talvaar say maar daaloonga. phir tumhaaree beeviyaan khud bevaaen aur tumhaaray bachchay khud yateem ban jaaengay.
25agar too nay meree qaum kay kisee ghareeb ko qarz diya hai to us say sood na lena.
26agar tujhay kisee say us kee chaadar girvee kay taur par milee ho to usay sooraj doobnay say pahelay hee vaapas kar dena hai, 27kyoonki isee ko vah sonay kay liyay istemaal karta hai. varna vah kya cheez odh kar soega? agar too chaadar vaapas na karay aur vah shakhs chilla kar mujh say faryaad karay to main us kee sunoonga, kyoonki main meharbaan hoon.
allaah say mutaalliq faraaiz
28allaah ko na kosna, na apnee qaum kay kisee sardaar par laanat karna.
29mujhay vaqt par apnay khet aur kolhooon kee paidaavaar men say nazraanay pesh karna. apnay pahelauthay mujhay dena. 30apnay bailon, bhedon aur bakriyon kay pahelauthon ko bhee mujhay dena. jaanvar ka pahelautha pahelay saat din apnee maan kay saath rahay. aathven din vah mujhay diya jaaay.
31apnay aap ko meray liyay makhsoos-o-muqaddas rakhna. is liyay aisay jaanvar ka gosht mat khaana jisay kisee janglee jaanvar nay phaad daala hai. aisay gosht ko kutton ko khaanay dena.