Marqus 5
īsā ek garāsīnī ādmī se badruheṅ nikāl detā hai
1phir vah jhīl ke pār garāsā ke ilāqe meṅ pahuṅche. 2jab īsā kashtī se utrā to ek ādmī jo nāpāk rūh kī girift meṅ thā qabroṅ meṅ se nikal kar īsā ko milā. 3yah ādmī qabroṅ meṅ rahatā aur is naubat tak pahuṅch gayā thā ki koī bhī use bāṅdh na saktā thā, chāhe use zanjīroṅ se bhī bāṅdhā jātā. 4use bahut dafā beṛiyoṅ aur zanjīroṅ se bāṅdhā gayā thā, lekin jab bhī aisā huā to us ne zanjīroṅ ko toṛ kar beṛiyoṅ ko ṭukṛe ṭukṛe kar diyā thā. koī bhī use kaṅṭrol nahīṅ kar saktā thā. 5din rāt vah chīḵẖeṅ mār mār kar qabroṅ aur pahāṛī ilāqe meṅ ghūmtā phirtā aur apne āp ko pattharoṅ se zaḵẖmī kar letā thā.
6īsā ko dūr se dekh kar vah dauṛā aur us ke sāmne muṅh ke bal girā. 7vah zor se chīḵẖā, “ai īsā allāh t’ālā ke farzand, merā āp ke sāth kyā vāstā hai? allāh ke nām meṅ āp ko qasam detā hūṅ ki mujhe azāb meṅ na ḍāleṅ.” 8kyūṅki īsā ne use kahā thā, “ai nāpāk rūh, ādmī meṅ se nikal jā!”
9phir īsā ne pūchhā, “terā nām kyā hai?”
us ne javāb diyā, “lashkar, kyūṅki ham bahut se haiṅ.” 10aur vah bār bār minnat kartā rahā ki īsā unheṅ is ilāqe se na nikāle.
11us vaqt qarīb kī pahāṛī par sūaroṅ kā baṛā ġol char rahā thā. 12badrūhoṅ ne īsā se iltimās kī, “hameṅ sūaroṅ meṅ bhej deṅ, hameṅ un meṅ dāḵẖil hone deṅ.” 13us ne unheṅ ijāzat dī to badruheṅ us ādmī meṅ se nikal kar sūaroṅ meṅ jā ghusīṅ. is par pūre ġol ke taqrīban 2,000 sūar bhāg bhāg kar pahāṛī kī ḍhalān par se utre aur jhīl meṅ jhapaṭ kar ḍūb mare.
14yah dekh kar sūaroṅ ke gallābān bhāg gae. unhoṅ ne shahar aur dīhāt meṅ is bāt kā charchā kiyā to log yah mālūm karne ke liye ki kyā huā hai apnī jagahoṅ se nikal kar īsā ke pās āe. 15us ke pās pahuṅche to vah ādmī milā jis meṅ pahale badrūhoṅ kā lashkar thā. ab vah kapṛe pahane vahāṅ baiṭhā thā aur us kī zahanī hālat ṭhīk thī. yah dekh kar vah ḍar gae. 16jinhoṅ ne sab kuchh dekhā thā unhoṅ ne logoṅ ko batāyā ki badruh-giriftā ādmī aur sūaroṅ ke sāth kyā huā hai.
17phir log īsā kī minnat karne lage ki vah un ke ilāqe se chalā jāe.
18īsā kashtī par savār hone lagā to badrūhoṅ se āzād kie gae ādmī ne us se iltimās kī, “mujhe bhī apne sāth jāne deṅ.”
19lekin īsā ne use sāth jāne na diyā balki kahā, “apne ghar vāpas chalā jā aur apne azīzoṅ ko sab kuchh batā jo rabb ne tere liye kiyā hai, ki us ne tujh par kitnā raham kiyā hai.”
20chunāṅche ādmī chalā gayā aur dikpulis ke ilāqe meṅ logoṅ ko batāne lagā ki īsā ne mere liye kyā kuchh kiyā hai. aur sab hairatzadā hue.
yāīr kī beṭī aur bīmār aurat
21īsā ne kashtī meṅ baiṭhe jhīl ko dubārā pār kiyā. jab dūsre kināre pahuṅchā to ek hujūm us ke gird jamā ho gayā. vah abhī jhīl ke pās hī thā 22ki maqāmī ibādatḵẖāne kā ek rāhanumā us ke pās āyā. us kā nām yāīr thā. īsā ko dekh kar vah us ke pāoṅ meṅ gir gayā 23aur bahut minnat karne lagā, “merī chhoṭī beṭī marne vālī hai, barāh-e-karam ā kar us par apne hāth rakheṅ tāki vah shifā pā kar zindā rahe.”
24chunāṅche īsā us ke sāth chal paṛā. ek baṛī bhīṛ us ke pīchhe lag gaī aur log use gher kar har taraf se dabāne lage.
25hujūm meṅ ek aurat thī jo bārah sāl se ḵẖūn bahane ke marz se rihāī na pā sakī thī. 26bahut ḍākṭaroṅ se apnā ilāj karvā karvā kar use kaī tarah kī musībat jhelnī paṛī thī aur itne meṅ us ke tamām paise bhī ḵẖarch ho gae the. to bhī koī fāidā na huā thā balki us kī hālat mazīd ḵẖarāb hotī gaī. 27īsā ke bāre meṅ sun kar vah bhīṛ meṅ shāmil ho gaī thī. ab pīchhe se ā kar us ne us ke libās ko chhuā, 28kyūṅki us ne sochā, “agar maiṅ sirf us ke libās ko hī chhū lūṅ to maiṅ shifā pā lūṅgī.”
29ḵẖūn bahanā fauran band ho gayā aur us ne apne jism meṅ mahsūs kiyā ki mujhe is aziyatanāk hālat se rihāī mil gaī hai. 30lekin usī lamhe īsā ko ḵẖud mahsūs huā ki mujh meṅ se tavānāī niklī hai. us ne muṛ kar pūchhā, “kis ne mere kapṛoṅ ko chhuā hai?”
31us ke shāgirdoṅ ne javāb diyā, “āp ḵẖud dekh rahe haiṅ ki hujūm āp ko gher kar dabā rahā hai. to phir āp kis tarah pūchh sakte haiṅ ki kis ne mujhe chhuā?”
32lekin īsā apne chāroṅ taraf dekhtā rahā ki kis ne yah kiyā hai. 33is par vah aurat yah jān kar ki mere sāth kyā huā hai ḵẖauf ke māre laraztī huī us ke pās āī. vah us ke sāmne gir paṛī aur use pūrī haqīqat khol kar bayān kī. 34īsā ne us se kahā, “beṭī, tere īmān ne tujhe bachā liyā hai. salāmatī se jā aur apnī aziyatanāk hālat se bachī rah.”
35īsā ne yah bāt abhī ḵẖatm nahīṅ kī thī ki ibādatḵẖāne ke rāhanumā yāīr ke ghar kī taraf se kuchh log pahuṅche aur kahā, “āp kī beṭī faut ho chukī hai, ab ustād ko mazīd taklīf dene kī kyā zarūrat?”
36un kī yah bāt nazar’andāz karke īsā ne yāīr se kahā, “mat ghabrāo, faqat īmān rakho.” 37phir īsā ne hujūm ko rok liyā aur sirf patras, yāqūb aur us ke bhāī yūhannā ko apne sāth jāne kī ijāzat dī. 38jab ibādatḵẖāne ke rāhanumā ke ghar pahuṅche to vahāṅ baṛī afrā-tafrī nazar āī. log ḵẖūb giryā-o-zārī kar rahe the. 39undar jā kar īsā ne un se kahā, “yah kaisā shor-sharābā hai? kyūṅ ro rahe ho? laṛkī mar nahīṅ gaī balki so rahī hai.”
40log haṅs kar us kā mazāq uṛāne lage. lekin us ne sab ko bāhar nikāl diyā. phir sirf laṛkī ke vālidain aur apne tīn shāgirdoṅ ko sāth le kar vah us kamre meṅ dāḵẖil huā jis meṅ laṛkī paṛī thī. 41us ne us kā hāth pakaṛ kar kahā, “talithā qūm!” is kā matlab hai, “chhoṭī laṛkī, maiṅ tujhe hukm detā hūṅ ki jāg uṭh!”
42laṛkī fauran uṭh kar chalne phirne lagī. us kī umr bārah sāl thī. yah dekh kar log ghabrā kar hairān rah gae. 43īsā ne unheṅ sanjīdgī se samjhāyā ki vah kisī ko bhī is ke bāre meṅ na batāeṅ. phir us ne unheṅ kahā ki use khāne ko kuchh do.