Marqus 5
eesa ek garaaseenee aadmee say badruhen nikaal deta hai
1phir vah jheel kay paar garaasa kay ilaaqay men pahunchay. 2jab eesa kashtee say utra to ek aadmee jo naapaak rooh kee girift men tha qabron men say nikal kar eesa ko mila. 3yah aadmee qabron men raheta aur is naubat tak pahunch gaya tha ki koee bhee usay baandh na sakta tha, chaahay usay zanjeeron say bhee baandha jaata. 4usay bahut dafa bediyon aur zanjeeron say baandha gaya tha, lekin jab bhee aisa hua to us nay zanjeeron ko tod kar bediyon ko tukday tukday kar diya tha. koee bhee usay kantrol naheen kar sakta tha. 5din raat vah cheekhen maar maar kar qabron aur pahaadee ilaaqay men ghoomta phirta aur apnay aap ko pattharon say zakhmee kar leta tha.
6eesa ko door say dekh kar vah dauda aur us kay saamnay munh kay bal gira. 7vah zor say cheekha, “ai eesa allaah t’aala kay farzand, mera aap kay saath kya vaasta hai? allaah kay naam men aap ko qasam deta hoon ki mujhay azaab men na daalen.” 8kyoonki eesa nay usay kaha tha, “ai naapaak rooh, aadmee men say nikal ja!”
9phir eesa nay poochha, “tera naam kya hai?”
us nay javaab diya, “lashkar, kyoonki ham bahut say hain.” 10aur vah baar baar minnat karta raha ki eesa unhen is ilaaqay say na nikaalay.
11us vaqt qareeb kee pahaadee par sooaron ka bada ghol char raha tha. 12badroohon nay eesa say iltimaas kee, “hamen sooaron men bhej den, hamen un men daakhil honay den.” 13us nay unhen ijaazat dee to badruhen us aadmee men say nikal kar sooaron men ja ghuseen. is par pooray ghol kay taqreeban 2,000 sooar bhaag bhaag kar pahaadee kee dhalaan par say utray aur jheel men jhapat kar doob maray.
14yah dekh kar sooaron kay gallaabaan bhaag gaay. unhon nay shaher aur deehaat men is baat ka charcha kiya to log yah maaloom karnay kay liyay ki kya hua hai apnee jagahon say nikal kar eesa kay paas aaay. 15us kay paas pahunchay to vah aadmee mila jis men pahelay badroohon ka lashkar tha. ab vah kapday pahenay vahaan baitha tha aur us kee zahenee haalat theek thee. yah dekh kar vah dar gaay. 16jinhon nay sab kuchh dekha tha unhon nay logon ko bataaya ki badruh-girifta aadmee aur sooaron kay saath kya hua hai.
17phir log eesa kee minnat karnay lagay ki vah un kay ilaaqay say chala jaaay.
18eesa kashtee par savaar honay laga to badroohon say aazaad kiay gaay aadmee nay us say iltimaas kee, “mujhay bhee apnay saath jaanay den.”
19lekin eesa nay usay saath jaanay na diya balki kaha, “apnay ghar vaapas chala ja aur apnay azeezon ko sab kuchh bata jo rabb nay teray liyay kiya hai, ki us nay tujh par kitna rahem kiya hai.”
20chunaanchay aadmee chala gaya aur dikpulis kay ilaaqay men logon ko bataanay laga ki eesa nay meray liyay kya kuchh kiya hai. aur sab hairatzada huay.
yaaeer kee betee aur beemaar aurat
21eesa nay kashtee men baithay jheel ko dubaara paar kiya. jab doosray kinaaray pahuncha to ek hujoom us kay gird jama ho gaya. vah abhee jheel kay paas hee thaa 22ki maqaamee ibaadatkhaanay ka ek raahanuma us kay paas aaya. us ka naam yaaeer tha. eesa ko dekh kar vah us kay paaon men gir gayaa 23aur bahut minnat karnay laga, “meree chhotee betee marnay vaalee hai, baraah-ay-karam a kar us par apnay haath rakhen taaki vah shifa pa kar zinda rahay.”
24chunaanchay eesa us kay saath chal pada. ek badee bheed us kay peechhay lag gaee aur log usay gher kar har taraf say dabaanay lagay.
25hujoom men ek aurat thee jo baarah saal say khoon bahenay kay marz say rihaaee na pa sakee thee. 26bahut daaktaron say apna ilaaj karva karva kar usay kaee tarah kee museebat jhelnee padee thee aur itnay men us kay tamaam paisay bhee kharch ho gaay thay. to bhee koee faaida na hua tha balki us kee haalat mazeed kharaab hotee gaee. 27eesa kay baaray men sun kar vah bheed men shaamil ho gaee thee. ab peechhay say a kar us nay us kay libaas ko chhua, 28kyoonki us nay socha, “agar main sirf us kay libaas ko hee chhoo loon to main shifa pa loongee.”
29khoon bahena fauran band ho gaya aur us nay apnay jism men mahsoos kiya ki mujhay is aziyatanaak haalat say rihaaee mil gaee hai. 30lekin usee lamhay eesa ko khud mahsoos hua ki mujh men say tavaanaaee niklee hai. us nay mud kar poochha, “kis nay meray kapdon ko chhua hai?”
31us kay shaagirdon nay javaab diya, “aap khud dekh rahay hain ki hujoom aap ko gher kar daba raha hai. to phir aap kis tarah poochh saktay hain ki kis nay mujhay chhua?”
32lekin eesa apnay chaaron taraf dekhta raha ki kis nay yah kiya hai. 33is par vah aurat yah jaan kar ki meray saath kya hua hai khauf kay maaray laraztee huee us kay paas aaee. vah us kay saamnay gir padee aur usay pooree haqeeqat khol kar bayaan kee. 34eesa nay us say kaha, “betee, teray eemaan nay tujhay bacha liya hai. salaamatee say ja aur apnee aziyatanaak haalat say bachee rah.”
35eesa nay yah baat abhee khatm naheen kee thee ki ibaadatkhaanay kay raahanuma yaaeer kay ghar kee taraf say kuchh log pahunchay aur kaha, “aap kee betee faut ho chukee hai, ab ustaad ko mazeed takleef denay kee kya zaroorat?”
36un kee yah baat nazar’andaaz karkay eesa nay yaaeer say kaha, “mat ghabraao, faqat eemaan rakho.” 37phir eesa nay hujoom ko rok liya aur sirf patras, yaaqoob aur us kay bhaaee yoohanna ko apnay saath jaanay kee ijaazat dee. 38jab ibaadatkhaanay kay raahanuma kay ghar pahunchay to vahaan badee afra-tafree nazar aaee. log khoob girya-o-zaaree kar rahay thay. 39undar ja kar eesa nay un say kaha, “yah kaisa shor-sharaaba hai? kyoon ro rahay ho? ladkee mar naheen gaee balki so rahee hai.”
40log hans kar us ka mazaaq udaanay lagay. lekin us nay sab ko baahar nikaal diya. phir sirf ladkee kay vaalidain aur apnay teen shaagirdon ko saath lay kar vah us kamray men daakhil hua jis men ladkee padee thee. 41us nay us ka haath pakad kar kaha, “talitha qoom!” is ka matlab hai, “chhotee ladkee, main tujhay hukm deta hoon ki jaag uth!”
42ladkee fauran uth kar chalnay phirnay lagee. us kee umr baarah saal thee. yah dekh kar log ghabra kar hairaan rah gaay. 43eesa nay unhen sanjeedgee say samjhaaya ki vah kisee ko bhee is kay baaray men na bataaen. phir us nay unhen kaha ki usay khaanay ko kuchh do.