1 Tavaareekh 10

saaool aur aps kay beton kee maut

¹jilbooa kay pahaadee silsilay par filistiyon aur israaeeliyon kay darmiyaan jang chhid gaee. ladtay ladtay israaeelee faraar honay lagay, lekin bahut log vaheen shaheed ho gaay.

²phir filistee saaool aur us kay beton yoontan, abeendaab aur malkeeshooa kay paas ja pahunchay. teenon betay halaak ho gaay, ³jabki ladaaee saaool kay ird-gird urooj tak pahunch gaee. phir vah teer’andaazon ka nishaana ban kar zakhmee ho gaya. ⁴us nay apnay silaahabardaar ko hukm diya, “apnee talvaar miyaan say khainch kar mujhay maar daal! varna yah naamakhtoon mujhay beizzat karengay.” lekin silaahabardaar nay inkaar kiya, kyoonki vah bahut dara hua tha. aakhir men saaool apnee talvaar lay kar khud us par gir gaya.

⁵jab silaahabardaar nay dekha ki mera maalik mar gaya hai to vah bhee apnee talvaar par gir kar mar gaya. ⁶yoon us din saaool, us kay teen betay aur us ka tamaam gharaana halaak ho gaay. ⁷jab maidaan-ay-yazrael kay israaeeliyon ko khabar milee ki israaeelee fauj bhaag gaee aur saaool apnay beton samet maara gaya hai to vah apnay shaheron ko chhod kar bhaag niklay, aur filistee chhoday huay shaheron par qabza karkay un men basnay lagay.

⁸aglay din filistee laashon ko lootnay kay liyay dubaara maidaan-ay-jang men a gaay. jab unhen jilbooa kay pahaadee silsilay par saaool aur us kay teenon betay murda mile ⁹to unhon nay saaool ka sar kaat kar us ka ziraabaktar utaar liya aur qaasidon ko apnay pooray mulk men bhej kar apnay buton aur apnee qaum ko fatah kee ittila dee. ¹⁰saaool ka ziraabaktar unhon nay apnay devtaaon kay mandir men mahfooz kar liya aur us kay sar ko dajoon devta kay mandir men latka diya.

¹¹jab yabees-jiliaad kay baashindon ko khabar milee ki filistiyon nay saaool kee laash kay saath kya kuchh kiya hai ¹²to shaher kay tamaam ladnay kay qaabil aadmee bait-shaan kay liyay ravaana huay. vahaan pahunch kar vah saaool aur us kay beton kee laashon ko utaar kar yabees lay gaay jahaan unhon nay un kee haddiyon ko yabees kay baday darakht kay saay men dafnaaya. unhon nay roza rakh kar pooray haftay tak un ka maatam kiya.

¹³saaool ko is liyay maara gaya ki vah rabb ka vafaadaar na raha. us nay us kee hidaayaat par amal na kiya, yahaan tak ki us nay murdon kee rooh say raabita karnay vaalee jaadoogaranee say mashvra kiya, ¹⁴haalaanki usay rabb say darayaaft karna chaahiay tha. yahee vajah hai ki rabb nay usay saza-ay-maut day kar saltanat ko daaood bin yassee kay havaalay kar diya.