1 Tavaareekh 11

daaood pooray israaeel ka baadshaah ban jaata hai

¹us vaqt tamaam israaeel habroon men daaood kay paas aaya aur kaha, “ham aap hee kee qaum aur aap hee kay rishtedaar hain. ²maazee men bhee jab saaool baadshaah tha to aap hee faujee muhimmon men israaeel kee qiyaadat kartay rahay. aur rabb aap kay khuda nay aap say vaada bhee kiya hai ki too meree qaum israaeel ka charvaaha ban kar us par hukoomat karega.”

³jab israaeel kay tamaam buzurg habroon pahunchay to daaood baadshaah nay rabb kay huzoor un kay saath ahd baandha, aur unhon nay usay masah karkay israaeel ka baadshaah bana diya. yoon rabb ka samooel kee maarifat kiya hua vaada poora hua.

daaood yarooshalam par qabza karta hai

⁴baadshaah bannay kay baad daaood tamaam israaeeliyon kay saath yarooshalam gaya taaki us par hamla karay. us zamaanay men us ka naam yaboos tha, aur yaboosee us men bastay thay. ⁵daaood ko dekh kar yaboosiyon nay us say kaha, “aap hamaaray shaher men kabhee daakhil naheen ho paaengay!”

to bhee daaood nay siyyoon kay qilaay par qabza kar liya jo aajkal ‘daaood ka shaher’ kahelaata hai. ⁶yaboos par hamla karnay say pahelay daaood nay kaha tha, “jo bhee yaboosiyon par hamla karnay men raahanumaaee karay vah fauj ka kamaandar banega.” tab yoaab bin zarooyaah nay pahelay shaher par chadhaaee kee. chunaanchay usay kamaandar muqarrar kiya gaya.

⁷yarooshalam par fatah paanay kay baad daaood qilaay men rahenay laga. us nay usay ‘daaood ka shaher’ qaraar diyaa ⁸aur us kay ird-gird shaher ko badhaanay laga. daaood ka yah taameeree kaam ird-gird kay chabootaron say shuroo hua aur chaaron taraf phailta gaya jabki yoaab nay shaher ka baaqee hissa bahaal kar diya. ⁹yoon daaood zor pakadta gaya, kyoonki rabb-ul-afwaaj us kay saath tha.

daaood kay mashhoor faujee

¹⁰darj-ay-zail daaood kay soormaaon kee faherist hai. pooray israaeel kay saath unhon nay mazbootee say us kee baadshaahee kee himaayat karkay daaood ko rabb kay farmaan kay mutaabiq apna baadshaah bana diya.

¹¹jo teen afsar yoaab kay bhaaee abeeshai kay ain baad aatay thay un men yasoobiaam hakmoonee pahelay nambar par aata tha. ek baar us nay apnay nezay say 300 aadmiyon ko maar diya. ¹²in teen afsaron men say doosree jagah par ileeazar bin dodo bin akhoohee aata tha. ¹³yah fas-dammeem men daaood kay saath tha jab filistee vahaan ladnay kay liyay jama ho gaay thay. maidaan-ay-jang men jau ka khet tha, aur ladtay ladtay israaeelee filistiyon kay saamnay bhaagnay lagay. ¹⁴lekin ileeazar daaood kay saath khet kay beech men filistiyon ka muqaabla karta raha. filistiyon ko maartay maartay unhon nay khet ka difa karkay rabb kee madad say badee fatah paaee.

^15-16 ek aur jang kay dauraan daaood adullaam kay ghaar kay pahaadee qilaay men tha jabki filistee fauj nay vaadee-ay-rafaaeem men apnee lashkargaah lagaaee thee. un kay daston nay bait-lahem par bhee qabza kar liya tha. daaood kay tees aala afsaron men say teen us say milnay aaay. ¹⁷daaood ko shadeed piyaas lagee, aur vah kahenay laga, “kaun meray liyay bait-lahem kay darvaazay par kay hauz say kuchh paanee laaega?”

¹⁸yah sun kar teenon afsar filistiyon kee lashkargaah par hamla karkay us men ghus gaay aur ladtay ladtay bait-lahem kay hauz tak pahunch gaay. us say kuchh paanee bhar kar vah usay daaood kay paas lay aaay. lekin us nay peenay say inkaar kar diya balki usay qurbaanee kay taur par undel kar rabb ko pesh kiyaa ¹⁹aur bola, “allaah na karay ki main yah paanee piyoon. agar aisa karta to un aadmiyon ka khoon peeta jo apnee jaan par khel kar paanee laaay hain.” is liyay vah usay peena naheen chaahata tha. yah in teen soormaaon kay zabardast kaamon kee ek misaal hai.

^20-21 yoaab ka bhaaee abeeshai mazkoora teen soormaaon par muqarrar tha. ek dafa us nay apnay nezay say 300 aadmiyon ko maar daala. teenon kee nisbat us kee ziyaada izzat kee jaatee thee, lekin vah khud in men gina naheen jaata tha.

²²binaayaah bin yahoyada bhee zabardast faujee tha. vah qabziel ka rahenay vaala tha, aur us nay bahut dafa apnee mardaangee dikhaaee. moaab kay do baday soorma us kay haathon halaak huay. ek baar jab bahut barf pad gaee to us nay ek hauz men utar kar ek sherbabar ko maar daala jo us men gir gaya tha. ²³ek aur mauqay par us ka vaasta ek misree say pada jis ka qad saadhay saat fut tha. misree kay haath men khaddee kay shaheteer jaisa bada neza tha jabki us kay apnay paas sirf laathee thee. lekin binaayaah nay us par hamla karkay us kay haath say neza chheen liya aur usay us kay apnay hathiyaar say maar daala. ²⁴aisee bahaaduree dikhaanay kee bina par binaayaah bin yahoyada mazkoora teen aadmiyon kay baraabar mashhoor hua. ²⁵tees afsaron kay deegar mardon kee nisbat us kee ziyaada izzat kee jaatee thee, lekin vah mazkoora teen aadmiyon men gina naheen jaata tha. daaood nay usay apnay muhaafizon par muqarrar kiya.

²⁶zail kay aadmee baadshaah kay soormaaon men shaamil thay.

yoaab ka bhaaee asaahel, bait-lahem ka ilhanaan bin dodo, ²⁷sammot haroree, khalis faloonee, ²⁸taqooa ka eera bin aqqees, antot ka abeeazar, ²⁹sibbakee hoosaatee, eelee akhoohee, ³⁰maheree natoofaatee, halid bin baana natoofaatee, ³¹binymeenee shaher jibia ka ittee bin reebee, binaayaah fir’aatonee ³²nahelay-jaas ka hooree, abeeel arbaatee, ³³azmaavat baheroomee, iliyahba saalboonee, ³⁴hasheem jizoonee kay betay, yoontan bin shajee haraaree, ³⁵akheeaam bin sakaar haraaree, ileefal bin oor, ³⁶hifar makeeraatee, akhiyaah faloonee, ³⁷hasro karmilee, naaree bin azbee, ³⁸naatan ka bhaaee yoel, mibkhaar bin haajiree, ³⁹silaq ammonee, yoaab bin zarooyaah ka silaahabardaar naheree bairotee, ⁴⁰eera itree, jareeb itree, ⁴¹ooriyaah hittee, zabad bin akhlee, ⁴²adeena bin seeza (roobin kay qabeelay ka yah sardaar 30 faujiyon par muqarrar tha), ⁴³hanaan bin maaka, yoosfat mitnee, ⁴⁴uzziyaah astraatee, khootaam aroeeree kay betay sama aur yaeeel, ⁴⁵yadeeael bin simree, us ka bhaaee yookha teesee, ⁴⁶ileeel mahaavee, ilnaam kay betay yareebee aur yoosaaviyaah, yitma moaabee, ⁴⁷ileeel, obed aur yaaseeel mazobaaee.