1 Tavaareekh 12

saaool kay daur-ay-hakoomat men daaood kay pairokaar

¹zail kay aadmee siqlaaj men daaood kay saath mil gaay, us vaqt jab vah saaool bin qees say chhupa raheta tha. yah un faujiyon men say thay jo jang men daaood kay saath mil kar ladtay the ²aur behtareen teer’andaaz thay, kyoonki yah na sirf dahenay balki baaen haath say bhee mahaarat say teer aur falaakhan ka patthar chala saktay thay. in aadmiyon men say darj-ay-zail binyameen kay qabeelay aur saaool kay khaandaan say thay.

³un ka raahanuma akheeazar, phir yooaas (donon samaaaah jibiaatee kay betay thay), yazeeel aur falat (donon azmaavat kay betay thay), baraaka, yaahoo antotee, ⁴ismaayaah jibaoonee jo daaood kay 30 afsaron ka ek soorma aur leedar tha, yaramiyaah, yahezeeel, yoohanaan, yoozbad jadeeraatee, ⁵ilioozee, yareemot, baaliyaah, samariyaah aur safatiyaah kharoofee.

⁶qorah kay khaandaan men say ilqaana, yissiyaah, azrel, yooazar aur yasoobiaam daaood kay saath thay.

⁷in kay ilaava yarohaam jadooree kay betay yooeela aur zabadiyaah bhee thay.

⁸jad kay qabeelay say bhee kuchh bahaadur aur tajaribaakaar faujee saaool say alag ho kar daaood kay saath mil gaay jab vah registaan kay qilaay men tha. yah mard mahaarat say dhaal aur neza istemaal kar saktay thay. un kay chiharay sherbabar kay chiharon kee maanind thay, aur vah pahaadee ilaaqay men ghazaalon kee tarah tez chal saktay thay.

⁹un ka leedar azar zail kay das aadmiyon par muqarrar tha : abadiyaah, iliyaab, ¹⁰mismanna, yaramiyaah, ¹¹attee, ileeel, ¹²yoohanaan, ilzabad, ¹³yaramiyaah aur makbannee.

¹⁴jad kay yah mard sab aala faujee afsar ban gaay. un men say sab say kamzor aadmee sau aam faujiyon ka muqaabla kar sakta tha jabki sab say taaqatvar aadmee hazaar ka muqaabla kar sakta tha. ¹⁵in hee nay bahaar kay mausam men darya-ay-yardan ko paar kiya, jab vah kinaaron say baahar a gaya tha, aur mashriq aur maghrib kee vaadiyon ko band kar rakha.

¹⁶binyameen aur yahoodaah kay qabeelon kay kuchh mard daaood kay pahaadee qilaay men aaay. ¹⁷daaood baahar nikal kar un say milnay gaya aur poochha, “kya aap salaamatee say meray paas aaay hain? kya aap meree madad karna chaahatay hain? agar aisa hai to main aap ka achchha saathee rahoonga. lekin agar aap mujhay dushmanon kay havaalay karnay kay liyay aaay hain haalaanki mujh say koee bhee zulm naheen hua hai to hamaaray baapdaada ka khuda isay dekh kar aap ko saza day.”

¹⁸phir rooh-ul-quds 30 afsaron kay raahanuma amaasee par naazil hua, aur us nay kaha, “ai daaood, ham teray hee log hain. ai yassee kay betay, ham teray saath hain. salaamatee, salaamatee tujhay haasil ho, aur salaamatee unhen haasil ho jo teree madad kartay hain. kyoonki tera khuda teree madad karega.” yah sun kar daaood nay unhen qabool karkay apnay chhaapaamaar daston par muqarrar kiya.

¹⁹manassee kay qabeelay kay kuchh mard bhee saaool say alag ho kar daaood kay paas aaay. us vaqt vah filistiyon kay saath mil kar saaool say ladnay ja raha tha, lekin baad men usay maidaan-ay-jang men aanay kee ijaazat na milee. kyoonki filistee sardaaron nay aapas men mashvra karnay kay baad usay yah kah kar vaapas bhej diya ki khatra hai ki yah hamen maidaan-ay-jang men chhod kar apnay puraanay maalik saaool say dubaara mil jaaay. phir ham tabaah ho jaaengay.

²⁰jab daaood siqlaaj vaapas ja raha tha to manassee kay qabeelay kay darj-ay-zail afsar saaool say alag ho kar us kay saath ho liyay : adna, yoozbad, yadeeael, meekaael, yoozbad, ileehoo aur zillatee. manassee men har ek ko hazaar hazaar faujiyon par muqarrar kiya gaya tha. ²¹unhon nay lootnay vaalay amaaleeqee daston ko pakadnay men daaood kee madad kee, kyoonki vah sab diler aur qaabil faujee thay. sab us kee fauj men afsar ban gaay.

²²roz-ba-roz log daaood kee madad karnay kay liyay aatay rahay, aur hotay hotay us kee fauj allaah kee fauj jaisee badee ho gaee.

habroon men daaood kee fauj

²³darj-ay-zail un tamaam faujiyon kee faherist hai jo habroon men daaood kay paas aaay taaki usay saaool kee jagah baadshaah banaaen, jis tarah rabb nay hukm diya tha.

²⁴yahoodaah kay qabeelay kay dhaal aur nezay say les 6,800 mard thay.

²⁵shamaaoon kay qabeelay kay 7,100 tajaribaakaar faujee thay.

²⁶laavee kay qabeelay kay 4,600 mard thay. ²⁷un men haaroon kay khaandaan ka sarparast yahoyada bhee shaamil tha jis kay saath 3,700 aadmee thay. ²⁸sadoq naamee ek diler aur javaan faujee bhee shaamil tha. us kay saath us kay apnay khaandaan kay 22 afsar thay.

²⁹saaool kay qabeelay binyameen kay bhee 3,000 mard thay, lekin is qabeelay kay aksar faujee ab tak saaool kay khaandaan kay saath liptay rahay.

³⁰ifraaeem kay qabeelay kay 20,800 faujee thay. sab apnay khaandaanon men asar-o-rasookh rakhnay vaalay thay.

³¹manassee kay aadhay qabeelay kay 18,000 mard thay. unhen daaood ko baadshaah banaanay kay liyay chun liya gaya tha.

³²ishkaar kay qabeelay kay 200 afsar apnay daston kay saath thay. yah log vaqt kee zaroorat samajh kar jaantay thay ki israaeel ko kya karna hai.

³³zabooloon kay qabeelay kay 50,000 tajaribaakaar faujee thay. vah har hathiyaar say les aur pooree vafaadaaree say daaood kay liyay ladnay kay liyay tayyaar thay.

³⁴naftaalee kay qabeelay kay 1,000 afsar thay. un kay tahet dhaal aur nezay say musallah 37,000 aadmee thay.

³⁵daan kay qabeelay kay 28,600 mard thay jo sab ladnay kay liyay mustaid thay.

³⁶aashar kay qabeelay kay 40,000 mard thay jo sab ladnay kay liyay tayyaar thay.

³⁷darya-ay-yardan kay mashriq men aabaad qabeelon roobin, jad aur manassee kay aadhay hissay kay 1,20,000 mard thay. har ek har qism kay hathiyaar say les tha.

³⁸sab tarteeb say habroon aaay taaki pooray azam kay saath daaood ko pooray israaeel ka baadshaah banaaen. baaqee tamaam israaeelee bhee muttafiq thay ki daaood hamaara baadshaah ban jaaay. ³⁹yah faujee teen din tak daaood kay paas rahay jis dauraan un kay qabaailee bhaaee unhen khaanay-peenay kee cheezen muhayya kartay rahay. ⁴⁰qareeb kay rahenay vaalon nay bhee is men un kee madad kee. ishkaar, zabooloon aur naftaalee tak kay log apnay gadhon, oonton, khachcharon aur bailon par khaanay kee cheezen laad kar vahaan pahunchay. maida, anjeer aur kishmish kee tikkiyaan, mai, tel, bail aur bhed-bakriyaan badee miqdaar men habroon laaee gaeen, kyoonki tamaam israaeelee khushee mana rahay thay.