1 Tavaareekh 13

daaood ahd ka sandooq yarooshalam men laana chaahata hai

¹daaood nay tamaam afsaron say mashvra kiya. un men hazaar hazaar aur sau sau faujiyon par muqarrar afsar shaamil thay. ²phir us nay israaeel kee pooree jamaaat say kaha, “agar aap ko manzoor ho aur rabb hamaaray khuda kee marzee ho to aaen ham pooray mulk kay israaeelee bhaaiyon ko daavat den ki a kar hamaaray saath jama ho jaaen. vah imaam aur laavee bhee shareek hon jo apnay apnay shaheron aur charaagaahon men bastay hain. ³phir ham apnay khuda kay ahd ka sandooq dubaara apnay paas vaapas laaen, kyoonki saaool kay daur-ay-hukoomat men ham us kee fikr naheen kartay thay.”

⁴pooree jamaaat muttafiq huee, kyoonki yah mansooba sab ko durust laga. ⁵chunaanchay daaood nay pooray israaeel ko junoob men misr kay saihoor say lay kar shimaal men labo-hamaat tak bulaaya taaki sab mil kar allaah kay ahd ka sandooq qiryat-yaareem say yarooshalam lay jaaen. ⁶phir vah un kay saath yahoodaah kay baala yaanee qiryat-yaareem gaya taaki rabb khuda ka sandooq utha kar yarooshalam lay jaaen, vahee sandooq jis par rabb kay naam ka thappa laga hai aur jahaan vah sandooq kay oopar karoobee farishton kay darmiyaan takhtnasheen hai. ⁷qiryat-yaareem pahunch kar logon nay allaah kay sandooq ko abeendaab kay ghar say nikaal kar ek naee bailgaadee par rakh diya, aur uzza aur akhiyo usay yarooshalam kee taraf lay jaanay lagay. ⁸daaood aur tamaam israaeelee gaadee kay peechhay chal paday. sab allaah kay huzoor pooray zor say khushee manaanay lagay. jooneepar kee lakdee kay mukhtalif saaz bhee bajaaay ja rahay thay. fiza sitaaron, sarodon, dafon, jhaanjhon aur turmon kee aavaazon say goonj uthee.

⁹vah gandum gaahanay kee ek jagah par pahunch gaay jis kay maalik ka naam kaidoon tha. vahaan bail achaanak bekaaboo ho gaay. uzza nay jaldee say ahd ka sandooq pakad liya taaki vah gir na jaaay. ¹⁰usee lamhay rabb ka ghazab us par naazil hua, kyoonki us nay ahd kay sandooq ko chhoonay kee jur’at kee thee. vaheen allaah kay huzoor uzza gir kar halaak hua. ¹¹daaood ko bada ranj hua ki rabb ka ghazab uzza par yoon toot pada hai. us vaqt say us jagah ka naam paraz-uzza yaanee ‘uzza par toot padna’ hai.

¹²us din daaood ko allaah say khauf aaya. us nay socha, “main kis tarah allaah ka sandooq apnay paas pahuncha sakoonga?” ¹³chunaanchay us nay faisla kiya ki ham ahed ka sandooq yarooshalam naheen lay jaaengay balki usay obed-adom jaatee kay ghar men mahfooz rakhengay. ¹⁴vahaan vah teen maah tak pada raha. in teen maheenon kay dauraan rabb nay obed-adom kay gharaanay aur us kee pooree milkiyat ko barkat dee.