1 Tavaareekh 14

daaood kee taraqqee

¹ek din soor kay baadshaah heeraam nay daaood kay paas vafad bheja. raaj aur badhaee bhee saath thay. un kay paas deodaar kee lakdee thee taaki daaood kay liyay mahel banaaen. ²yoon daaood nay jaan liya ki rabb nay mujhay israaeel ka baadshaah bana kar meree baadshaahee apnee qaum israaeel kee khaatir bahut sarfaraaz kar dee hai.

³yarooshalam men ja basnay kay baad daaood nay mazeed beeviyon say shaadee kee. nateejay men yarooshalam men us kay kaee betay-betiyaan paida huay. ⁴jo betay vahaan paida huay vah yah thay : sammooa, sobaab, naatan, sulemaan, ⁵ibhaar, ileesooa, ilfalat, ⁶nauja, nafaj, yafeea, ⁷ileesma, baal-yada aur ileefalat.

filistiyon par fatah

⁸jab filistiyon ko ittila milee ki daaood ko masah karkay israaeel ka baadshaah banaaya gaya hai to unhon nay apnay faujiyon ko israaeel men bhej diya taaki usay pakad len. jab daaood ko pata chal gaya to vah un ka muqaabla karnay kay liyay gaya. ⁹jab filistee israaeel men pahunch kar vaadee-ay-rafaaeem men phail gae ¹⁰to daaood nay rabb say darayaaft kiya, “kya main filistiyon par hamla karoon? kya too mujhay un par fatah bakhshega?” rabb nay javaab diya, “haan, un par hamla kar! main unhen teray qabzay men kar doonga.” ¹¹chunaanchay daaood apnay faujiyon ko lay kar baal-paraazeem gaya. vahaan us nay filistiyon ko shikast dee. baad men us nay gavaahee dee, “jitnay zor say band kay toot jaanay par paanee us say phoot nikalta hai utnay zor say aaj allaah meray vaseelay say dushman kee safon men say phoot nikla hai.” chunaanchay us jagah ka naam baal-paraazeem yaanee ‘phoot nikalnay ka maalik’ pad gaya. ¹²filistee apnay devtaaon ko chhod kar bhaag gaay, aur daaood nay unhen jala denay ka hukm diya.

¹³ek baar phir filistee a kar vaadee-ay-rafaaeem men phail gaay. ¹⁴is dafa jab daaood nay allaah say darayaaft kiya to us nay javaab diya, “is martaba un ka saamna mat karna balki un kay peechhay ja kar baka kay darakhton kay saamnay un par hamla kar. ¹⁵jab un darakhton kee chotiyon say qadmon kee chaap sunaaee day to khabardaar! yah is ka ishaara hoga ki allaah khud teray aagay aagay chal kar filistiyon ko maarnay kay liyay nikal aaya hai.” ¹⁶daaood nay aisa hee kiya aur nateejay men filistiyon ko shikast day kar jibaoon say lay kar jazar tak un ka taaqqub kiya.

¹⁷daaood kee shuharat tamaam mamaalik men phail gaee. rabb nay tamaam qaumon kay dilon men daaood ka khauf daal diya.