1 Tavaareekh 16

¹allaah ka sandooq us tamboo kay darmiyaan men rakha gaya jo daaood nay us kay liyay lagvaaya tha. phir unhon nay allaah kay huzoor bhasm honay vaalee aur salaamatee kee qurbaaniyaan pesh keen. ²is kay baad daaood nay qaum ko rabb kay naam say barkat day kar ³har israaeelee mard aur aurat ko ek rotee, khajoor kee ek tikkee aur kishmish kee ek tikkee day dee. ⁴us nay kuchh laaviyon ko rabb kay sandooq kay saamnay khidmat karnay kee zimmaadaaree dee. unhen rabb israaeel kay khuda kee tamjeed aur hamd-o-sana karnee thee. ⁵un ka sarbaraah aasaf jhaanjh bajaata tha. us ka naaib zakariyaah tha. phir yaeeel, sameeraamot, yaheeel, mattitiyaah, iliyaab, binaayaah, obed-adom aur yaeeel thay jo sitaar aur sarod bajaatay thay. ⁶binaayaah aur yahezeeel imaamon kee zimmaadaaree allaah kay ahd kay sandooq kay saamnay turam bajaana thee.

shukr ka geet

⁷us din daaood nay pahelee dafa aasaf aur us kay saathee laaviyon kay havaalay zail ka geet karkay unhen rabb kee sitaaish karnay kee zimmaadaaree dee.

⁸“rabb ka shukr karo aur us ka naam pukaaro! aqvaam men us kay kaamon ka elaan karo.

⁹saaz baja kar us kee madahsaraaee karo. us kay tamaam ajaaib kay baaray men logon ko bataao.

¹⁰us kay muqaddas naam par fakhar karo. rabb kay taalib dil say khush hon.

¹¹rabb aur us kee qudrat kee darayaaft karo, har vaqt us kay chiharay kay taalib raho.

¹²jo mojizay us nay kiay unhen yaad karo. us kay ilaahee nishaan aur us kay munh kay faislay duharaatay raho.

¹³tum jo us kay khaadim israaeel kee aulaad aur yaaqoob kay farzand ho, jo us kay barguzeeda log ho, tumhen sab kuchh yaad rahay!

¹⁴vahee rabb hamaara khuda hai, vahee pooree duniya kee adaalat karta hai.

¹⁵vah hamesha apnay ahd ka khayaal rakhta hai, us kalaam ka jo us nay hazaar pushton kay liyay farmaaya tha.

¹⁶yah vah ahd hai jo us nay ibraaheem say baandha, vah vaada jo us nay qasam kha kar ishaaq say kiya tha.

¹⁷us nay usay yaaqoob kay liyay qaaim kiya taaki vah us kay mutaabiq zindagee guzaaray, us nay tasdeeq kee ki yah mera israaeel say abdee ahd hai.

¹⁸saath saath us nay farmaaya, ‘main tujhay mulk-ay-kan’aan doonga. yah teree meeraas ka hissa hoga.’

¹⁹us vaqt vah taadaad men kam aur thoday hee thay balki mulk men ajnabee hee thay.

²⁰ab tak vah mukhtalif qaumon aur saltanaton men ghoomtay phirtay thay.

²¹lekin allaah nay un par kisee ko zulm karnay na diya, aur un kee khaatir us nay baadshaahon ko daanta,

²²‘meray masah kiay huay khaadimon ko mat chhedna, meray nabiyon ko nuqsaan mat pahunchaana.’

²³ai pooree duniya, rabb kee tamjeed men geet ga! roz-ba-roz us kee najaat kee khushkhabaree suna.

²⁴qaumon men us ka jalaal aur tamaam ummaton men us kay ajaaib bayaan karo.

²⁵kyoonki rabb azeem aur sitaaish kay bahut laaiq hai. vah tamaam maaboodon say maheeb hai.

²⁶kyoonki deegar qaumon kay tamaam maabood but hee hain jabki rabb nay aasmaan ko banaaya.

²⁷us kay huzoor shaan-o-shaukat, us kee sukoonatgaah men qudrat aur jalaal hai.

²⁸ai qaumon kay qabeelo, rabb kee tamjeed karo, rabb kay jalaal aur qudrat kee sitaaish karo.

²⁹rabb kay naam ko jalaal do. qurbaanee lay kar us kay huzoor aao. muqaddas libaas say aaraasta ho kar rabb ko sijda karo.

³⁰pooree duniya us kay saamnay laraz uthay. yaqeenan duniya mazbootee say qaaim hai aur naheen dagmagaaegee.

³¹aasmaan shaadmaan ho, aur zameen jashn manaaay. qaumon men kaha jaaay ki rabb baadshaah hai.

³²samundar aur jo kuchh us men hai khushee say garaj uthay, maidaan aur jo kuchh us men hai baagh baagh ho.

³³phir jangal kay darakht rabb kay saamnay shaadiyaana bajaaengay, kyoonki vah a raha hai, vah zameen kee adaalat karnay a raha hai.

³⁴rabb ka shukr karo, kyoonki vah bhala hai, aur us kee shafqat abdee hai.

³⁵us say iltimaas karo, ‘ai hamaaree najaat kay khuda, hamen bacha! hamen jama karkay deegar qaumon kay haath say chhuda. tab hee ham teray muqaddas naam kee sitaaish karengay aur teray qaabil-ay-taareef kaamon par fakhar karengay.’

³⁶azal say abad tak rabb, israaeel kay khuda kee hamd ho!”

tab pooree qaum nay “aameen” aur “rabb kee hamd ho” kaha.

laaviyon kee zimmaadaariyaan

³⁷daaood nay aasaf aur us kay saathee laaviyon ko rabb kay ahd kay sandooq kay saamnay chhod kar kaha, “aainda yahaan baaqaaidagee say rozaana kee zarooree khidmat kartay jaaen.”

³⁸is guroh men obed-adom aur mazeed 68 laavee shaamil thay. obed-adom bin yadootoon aur hoosa darbaan ban gaay.

³⁹lekin sadoq imaam aur us kay saathee imaamon ko daaood nay rabb kee us sukoonatgaah kay paas chhod diya jo jibaoon kee pahaadee par thee. ⁴⁰kyoonki laazim tha ki vah vahaan har subah aur shaam ko bhasm honay vaalee qurbaaniyaan pesh karen aur baaqee tamaam hidaayaat par amal karen jo rabb kee taraf say israaeel kay liyay shareeat men bayaan kee gaee hain. ⁴¹daaood nay haimaan, yadootoon aur mazeed kuchh cheeda laaviyon ko bhee jibaoon men un kay paas chhod diya. vahaan un kee khaas zimmaadaaree rabb kee hamd-o-sana karna thee, kyoonki us kee shafqat abdee hai. ⁴²un kay paas turam, jhaanjh aur baaqee aisay saaz thay jo allaah kee taareef men gaaay jaanay vaalay geeton kay saath bajaaay jaatay thay. yadootoon kay beton ko darbaan banaaya gaya.

⁴³jashn kay baad sab log apnay apnay ghar chalay gaay. daaood bhee apnay ghar lauta taaki apnay khaandaan ko barkat day kar salaam karay.