1 Tavaareekh 17

rabb daaood kay liyay abdee baadshaahee ka vaada karta hai

¹daaood baadshaah salaamatee say apnay mahel men rahenay laga. ek din us nay naatan nabee say baat kee, “dekhen, main yahaan deodaar kay mahel men raheta hoon jabki rabb kay ahd ka sandooq ab tak tamboo men pada hai. yah munaasib naheen!” ²naatan nay baadshaah kee hausalaaafzaaee kee, “jo kuchh bhee aap karna chaahatay hain vah karen. allaah aap kay saath hai.”

rabb daaood kay liyay abdee baadshaahee ka vaada karta hai

³lekin usee raat allaah naatan say hamkalaam hua, ⁴“meray khaadim daaood kay paas ja kar usay bata day ki rabb farmaata hai, ‘too meree rihaaish kay liyay makaan taameer naheen karega. ⁵aaj tak main kisee makaan men naheen raha. jab say main israaeeliyon ko misr say nikaal laaya us vaqt say main khaimay men rah kar jagah-ba-jagah phirta raha hoon. ⁶jis dauraan main tamaam israaeeliyon kay saath idhar udhar phirta raha kya main nay israaeel kay un raahanumaaon say kabhee is naatay say shikaayat kee jinhen main nay apnee qaum kee gallaabaanee karnay ka hukm diya tha? kya main nay un men say kisee say kaha ki tum nay meray liyay deodaar ka ghar kyoon naheen banaaya?’

⁷chunaanchay meray khaadim daaood ko bata day, ‘rab-ul-afwaaj farmaata hai ki main hee nay tujhay charaagaah men bhedon kee gallaabaanee karnay say faarigh karkay apnee qaum israaeel ka baadshaah bana diya hai. ⁸jahaan bhee too nay qadam rakha vahaan main teray saath raha hoon. teray dekhtay dekhtay main nay teray tamaam dushmanon ko halaak kar diya hai. ab main tera naam sarfaraaz kar doonga, vah duniya kay sab say azeem aadmiyon kay naamon kay baraabar hee hoga. ⁹aur main apnee qaum israaeel kay liyay ek vatan muhayya karoonga, pauday kee tarah unhen yoon laga doonga ki vah jad pakad kar mahfooz rahengay aur kabhee bechain naheen hongay. bedeen qaumen unhen us tarah naheen dabaaengee jis tarah maazee men kiya kartee theen, ¹⁰us vaqt say jab main qaum par qaazee muqarrar karta tha. main teray dushmanon ko khaak men mila doonga. aaj main farmaata hoon ki rabb hee teray liyay ghar banaaega. ¹¹jab too boodha ho kar kooch kar jaaega aur apnay baapdaada say ja milega to main teree jagah teray beton men say ek ko takht par bitha doonga. us kee baadshaahee ko main mazboot bana doonga. ¹²vahee meray liyay ghar taameer karega, aur main us ka takht abad tak qaaim rakhoonga. ¹³main us ka baap hoonga aur vah mera beta hoga. meree nazar-ay-karam saaool par na rahee, lekin main kabhee naheen honay doonga ki vah teray betay say door ho jaaay. ¹⁴main usay apnay gharaanay aur apnee baadshaahee par hamesha qaaim rakhoonga, us ka takht hamesha mazboot rahega’.”

daaood kee shukrguzaaree

¹⁵naatan nay daaood kay paas ja kar usay sab kuchh sunaaya jo rabb nay usay roya men bataaya tha. ¹⁶tab daaood ahd kay sandooq kay paas gaya aur rabb kay huzoor baith kar dua karnay laga,

“ai rabb khuda, main kaun hoon aur mera khaandaan kya haisiyat rakhta hai ki too nay mujhay yahaan tak pahunchaaya hai? ¹⁷aur ab ai allaah, too mujhay aur bhee ziyaada ata karnay ko hai, kyoonki too nay apnay khaadim kay gharaanay kay mustaqbil kay baaray men bhee vaada kiya hai. ai rabb khuda, too nay yoon mujh par nigaah daalee hai goya ki main koee bahut ahem banda hoon. ^18-19 lekin main mazeed kya kahoon jab too nay yoon apnay khaadim kee izzat kee hai? ai rabb, too to apnay khaadim ko jaanta hai. too nay apnay khaadim kee khaatir aur apnee marzee kay mutaabiq yah azeem kaam karkay in azeem vaadon kee ittila dee hai.

²⁰ai rabb, tujh jaisa koee naheen hai. ham nay apnay kaanon say sun liya hai ki teray siva koee aur khuda naheen hai. ²¹duniya men kaun see qaum teree ummat israaeel kee maanind hai? too nay isee ek qaum ka fidya day kar usay ghulaamee say chhudaaya aur apnee qaum bana liya. too nay israaeel kay vaastay baday aur haibtanaak kaam karkay apnay naam kee shuharat phaila dee. hamen misr say riha karkay too nay qaumon ko hamaaray aagay say nikaal diya. ²²ai rabb, too israaeel ko hamesha kay liyay apnee qaum bana kar un ka khuda ban gaya hai.

²³chunaanchay ai rabb, jo baat too nay apnay khaadim aur us kay gharaanay kay baaray men kee hai usay abad tak qaaim rakh aur apna vaada poora kar. ²⁴tab vah mazboot rahega aur tera naam abad tak mashhoor rahega. phir log tasleem karengay ki israaeel ka khuda rabb-ul-afwaaj vaaqaee israaeel ka khuda hai, aur teray khaadim daaood ka gharaana bhee abad tak teray huzoor qaaim rahega. ²⁵ai meray khuda, too nay apnay khaadim kay kaan ko is baat kay liyay khol diya hai. too hee nay farmaaya, ‘main teray liyay ghar taameer karoonga.’ sirf isee liyay teray khaadim nay yoon tujh say dua karnay kee jur’at kee hai. ²⁶ai rabb, too hee khuda hai. too nay apnay khaadim say in achchhee cheezon ka vaada kiya hai. ²⁷ab too apnay khaadim kay gharaanay ko barkat denay par raazee ho gaya hai taaki vah hamesha tak teray saamnay qaaim rahay. kyoonki too hee nay usay barkat dee hai, is liyay vah abad tak mubaarak rahega.”