1 Tavaareekh 20

rabba shaher par fatah

¹bahaar ka mausam a gaya, vah vaqt jab baadshaah jang kay liyay nikaltay hain. tab yoaab nay fauj lay kar ammoniyon ka mulk tabaah kar diya. ladtay ladtay vah rabba tak pahunch gaya aur us ka muhaasara karnay laga. lekin daaood khud yarooshalam men raha. phir yoaab nay rabba ko bhee shikast day kar khaak men mila diya. ²daaood nay hanoon baadshaah ka taaj us kay sar say utaar kar apnay sar par rakh liya. sonay kay is taaj ka vazan 34 kilograam tha, aur us men ek beshaqeemat jauhar jada hua tha. daaood nay shaher say bahut sa loota hua maal lay kar ³us kay baashindon ko ghulaam bana liya. unhen patthar kaatnay kee aariyaan, lohay kee kudaalen aur kulhaadiyaan dee gaeen taaki vah mazdooree karen. yahee sulook baaqee ammonee shaheron kay baashindon kay saath bhee kiya gaya. jang kay ikhtitaam par daaood pooree fauj kay saath yarooshalam laut aaya.

filistiyon say jang

⁴is kay baad israaeeliyon ko jazar kay qareeb filistiyon say ladna pada. vahaan sibbakee hoosaatee nay rafa deo kee aulaad men say ek aadmee ko maar daala jis ka naam saffee tha. yoon filistiyon ko taabay kar liya gaya. ⁵un say ek aur ladaaee kay dauraan ilhanaan bin yaaeer nay jaatee jaaloot kay bhaaee lahemee ko maut kay ghaat utaar diya. us ka neza khaddee kay shaheteer jaisa bada tha. ⁶ek aur dafa jaat kay paas ladaaee huee. filistiyon ka ek faujee jo rafa kee nasal ka tha bahut lamba tha. us kay haathon aur pairon kee chhah chhah ungaliyaan yaanee mil kar 24 ungaliyaan theen. ⁷jab vah israaeeliyon ka mazaaq udaanay laga to daaood kay bhaaee sim’a kay betay yoontan nay usay maar daala. ⁸jaat kay yah deo rafa kee aulaad thay, aur vah daaood aur us kay faujiyon kay haathon halaak huay.