1 Tavaareekh 22

¹is liyay daaood nay faisla kiya, “rabb hamaaray khuda ka ghar gaahanay kee is jagah par hoga, aur yahaan vah qurbaangaah bhee hogee jis par israaeel kay liyay bhasm honay vaalee qurbaanee jalaaee jaatee hai.”

daaood rabb ka ghar banaanay kee tayyaariyaan karta hai

²chunaanchay us nay israaeel men rahenay vaalay pardesiyon ko bula kar unhen allaah kay ghar kay liyay darkaar taraashay huay patthar tayyaar karnay kee zimmaadaaree dee. ³is kay ilaava daaood nay darvaazon kay kivaadon kee keelon aur kadon kay liyay lohay kay baday dher lagaaay. saath saath itna peetal ikattha kiya gaya ki aakhirkaar usay tola na ja saka. ⁴isee tarah deodaar kee bahut ziyaada lakdee yarooshalam laaee gaee. saida aur soor kay baashindon nay usay daaood tak pahunchaaya. ⁵yah saamaan jama karnay kay peechhay daaood kee yah soch thee, “mera beta sulemaan javaan hai, aur us ka abhee itna tajriba naheen hai, haalaanki jo ghar rabb kay liyay banvaana hai usay itna bada aur shaandaar honay kee zaroorat hai ki tamaam duniya hakka-bakka rah kar us kee taareef karay. is liyay main khud jahaan tak ho sakay usay banvaanay kee tayyaariyaan karoonga.” yahee vajah thee ki daaood nay apnee maut say pahelay itna saamaan jama karaaya.

daaood sulemaan ko rabb ka ghar banvaanay kee zimmaadaaree deta hai

⁶phir daaood nay apnay betay sulemaan ko bula kar usay rabb israaeel kay khuda kay liyay sukoonatgaah banvaanay kee zimmaadaaree day kar ⁷kaha, “meray betay, main khud rabb apnay khuda kay naam kay liyay ghar banaana chaahata tha. ⁸lekin mujhay ijaazat naheen milee, kyoonki rabb mujh say hamkalaam hua, ‘too nay shadeed qism kee jangen lad kar beshumaar logon ko maar diya hai. naheen, too meray naam kay liyay ghar taameer naheen karega, kyoonki meray dekhtay dekhtay too bahut khoonrezee ka sabab bana hai. ⁹lekin teray ek beta paida hoga jo amnapasand hoga. usay main amn-o-amaan muhayya karoonga, usay chaaron taraf kay dushmanon say ladna naheen padega. us ka naam sulemaan hoga, aur us kee hukoomat kay dauraan main israaeel ko amn-o-amaan ata karoonga. ¹⁰vahee meray naam kay liyay ghar banaaega. vah mera beta hoga aur main us ka baap hoonga. aur main israaeel par us kee baadshaahee ka takht hamesha tak qaaim rakhoonga’.”

¹¹daaood nay baat jaaree rakh kar kaha, “meray betay, rabb aap kay saath ho taaki aap ko kaamyaabee haasil ho aur aap rabb apnay khuda ka ghar us kay vaaday kay mutaabiq taameer kar saken. ¹²aap ko israaeel par muqarrar kartay vaqt rabb aap ko hikmat aur samajh ata karay taaki aap rabb apnay khuda kee shareeat par amal kar saken. ¹³agar aap ehatiyaat say un hidaayaat aur ahkaam par amal karen jo rabb nay moosa kee maarifat israaeel ko day diay to aap ko zaroor kaamyaabee haasil hogee. mazboot aur diler hon. daren mat aur himmat na haaren. ¹⁴dekhen, main nay badee jidd-o-jahd kay saath rabb kay ghar kay liyay sonay kay 34,00,000 kilograam aur chaandee kay 3,40,00,000 kilograam tayyaar kar rakhay hain. is kay ilaava main nay itna peetal aur loha ikattha kiya ki usay tola naheen ja sakta, neez lakdee aur patthar ka dher lagaaya, agarchi aap aur bhee jama karengay. ¹⁵aap kee madad karnay vaalay kaareegar bahut hain. un men patthar ko taraashnay vaalay, raaj, badhaee aur aisay kaareegar shaamil hain jo mahaarat say har qism kee cheez bana saktay hain, ¹⁶khwaah vah sonay, chaandee, peetal ya lohay kee kyoon na ho. beshumaar aisay log tayyaar khaday hain. ab kaam shuroo karen, aur rabb aap kay saath ho!”

¹⁷phir daaood nay israaeel kay tamaam raahanumaaon ko apnay betay sulemaan kee madad karnay ka hukm diya. ¹⁸us nay un say kaha, “rabb aap ka khuda aap kay saath hai. us nay aap ko padosee qaumon say mahfooz rakh kar amn-o-amaan ata kiya hai. mulk kay baashindon ko us nay meray havaalay kar diya, aur ab yah mulk rabb aur us kee qaum kay taabay ho gaya hai. ¹⁹ab dil-o-jaan say rabb apnay khuda kay taalib rahen. rabb apnay khuda kay maqdis kee taameer shuroo karen taaki aap jaldee say ahd ka sandooq aur muqaddas khaimay kay saamaan ko us ghar men la saken jo rabb kay naam kee taazeem men taameer hoga.”