1 Tavaareekh 23

¹jab daaood umrraseeda tha to us nay apnay betay sulemaan ko israaeel ka baadshaah bana diya.

khidmat kay liyay laaviyon kay guroh

²daaood nay israaeel kay tamaam raahanumaaon ko imaamon aur laaviyon samet apnay paas bula liya. ³tamaam un laaviyon ko gina gaya jin kee umr tees saal ya is say zaaid thee. un kee kul taadaad 38,000 thee. ⁴inhen daaood nay mukhtalif zimmaadaariyaan saumpeen. 24,000 afraad rabb kay ghar kee taameer kay nigraan, 6,000 afsar aur qaazee, ⁵4,000 darbaan aur 4,000 aisay mooseeqaar ban gaay jinhen daaood kay banvaaay huay saazon ko baja kar rabb kee hamd-o-sana karnee thee.

⁶daaood nay laaviyon ko laavee kay teen beton jairson, qihaat aur miraaree kay mutaabiq teen gurohon men taqseem kiya.

⁷jairson kay do betay laadaan aur simaee thay. ⁸laadaan kay teen betay yaheeel, zaitaam aur yoel thay. ⁹simaee kay teen betay saloomeet, hazeeel aur haaraan thay. yah laadaan kay gharaanon kay sarbaraah thay. ^10-11 simaee kay chaar betay baday say lay kar chhotay tak yahet, zeeza, yaoos aur bareea thay. choonki yaoos aur bareea kay kam betay thay is liyay un kee aulaad mil kar khidmat kay lihaaz say ek hee khaandaan aur guroh kee haisiyat rakhtee thee.

¹²qihaat kay chaar betay amraam, izhaar , habroon aur uzzeeel thay. ¹³amraam kay do betay haaroon aur moosa thay. haaroon aur us kee aulaad ko alag kiya gaya taaki vah hamesha tak muqaddastareen cheezon ko makhsoos-o-muqaddas rakhen, rabb kay huzoor qurbaaniyaan pesh karen, us kee khidmat karen aur us kay naam say logon ko barkat den. ¹⁴mard-ay-khuda moosa kay beton ko baaqee laaviyon men shumaar kiya jaata tha. ¹⁵moosa kay do betay jairsom aur ileeazar thay. ¹⁶jairsom kay pahelauthay ka naam sabooel tha. ¹⁷ileeazar ka sirf ek beta rahebiyaah tha. lekin rahebiyaah kee beshumaar aulaad thee. ¹⁸izhaar kay pahelauthay ka naam saloomeet tha. ¹⁹habroon kay chaar betay baday say lay kar chhotay tak yariyaah, amariyaah, yahezeeel aur yaqamiaam thay. ²⁰uzzeeel ka pahelautha meekaah tha. doosray ka naam yissiyaah tha.

²¹miraaree kay do betay mahelee aur mooshee thay. mahelee kay do betay ileeazar aur qees thay. ²²jab ileeazar faut hua to us kee sirf betiyaan theen. in betiyon kee shaadee qees kay beton yaanee chachaazaad bhaaiyon say huee. ²³mooshee kay teen betay mahelee, idar aur yareemot thay.

²⁴gharaz yah laavee kay qabeelay kay khaandaan aur sarparast thay. har ek ko khaandaanee rajistar men darj kiya gaya tha. in men say jo rabb kay ghar men khidmat kartay thay har ek kee umr kam az kam 20 saal thee.

^25-27 kyoonki daaood nay marnay say pahelay pahelay hukm diya tha ki jitnay laaviyon kee umr kam az kam 20 saal hai, vah khidmat kay liyay rajistar men darj kiay jaaen. is naatay say us nay kaha tha,

“rabb israaeel kay khuda nay apnee qaum ko amn-o-amaan ata kiya hai, aur ab vah hamesha kay liyay yarooshalam men sukoonat karega. ab say laaviyon ko mulaaqaat ka khaima aur us ka saamaan utha kar jagah-ba-jagah lay jaanay kee zaroorat naheen rahee. ²⁸ab say vah imaamon kee madad karen jab yah rabb kay ghar men khidmat kartay hain. vah sahenon aur chhotay kamron ko sambhaalen aur dhyaan den ki rabb kay ghar kay liyay makhsoos-o-muqaddas kee gaee cheezen paak-saaf rahen. unhen allaah kay ghar men kaee aur zimmaadaariyaan bhee saumpee jaaen. ²⁹zail kee cheezen sambhaalna sirf un hee kee zimmaadaaree hai : makhsoos-o-muqaddas kee gaee rotiyaan, ghalla kee nazron kay liyay mustaamal maida, bekhameeree rotiyaan pakaanay aur goondhnay ka intizaam. laazim hai ki vahee tamaam lavaazimaat ko achchhee tarah tolen aur naapen. ³⁰har subah aur shaam ko un kay gulookaar rabb kee hamd-o-sana karen. ³¹jab bhee rabb ko bhasm honay vaalee qurbaaniyaan pesh kee jaaen to laavee madad karen, khwaah sabat ko, khwaah naay chaand kee eed ya kisee aur eed kay mauqay par ho. laazim hai ki vah rozaana muqarrara taadaad kay mutaabiq khidmat kay liyay haazir ho jaaen.”

³²is tarah laavee pahelay mulaaqaat kay khaimay men aur baad men rabb kay ghar men apnee khidmat sar’anjaam detay rahay. vah rabb kay ghar kee khidmat men apnay qabaailee bhaaiyon yaanee imaamon kee madad kartay thay.