1 Tavaareekh 28

israaeel kay buzurgon kay saamnay daaood kee taqreer

¹daaood nay israaeel kay tamaam buzurgon ko yarooshalam bulaaya. in men qabeelon kay sarparast, faujee diveejhanon par muqarrar afsar, hazaar hazaar aur sau sau faujiyon par muqarrar afsar, shaahee milkiyat aur revdon kay inchaarj, baadshaah kay beton kee tarbiyat karnay vaalay afsar, darbaaree, mulk kay soorma aur baaqee tamaam saahib-ay-haisiyat shaamil thay.

²daaood baadshaah un kay saamnay khaday ho kar un say mukhaatib hua,

“meray bhaaiyo aur meree qaum, meree baat par dhyaan den! kaafee der say main ek aisa makaan taameer karna chaahata tha jis men rabb kay ahd ka sandooq mustaqil taur par rakha ja sakay. aakhir yah to hamaaray khuda kee chaukee hai. is maqsad say main tayyaariyaan karnay laga. ³lekin phir allaah mujh say hamkalaam hua, ‘meray naam kay liyay makaan banaana tera kaam naheen hai, kyoonki too nay jangjoo hotay huay bahut khoon bahaaya hai.’

⁴rabb israaeel kay khuda nay meray pooray khaandaan men say mujhay chun kar hamesha kay liyay israaeel ka baadshaah bana diya, kyoonki us kee marzee thee ki yahoodaah ka qabeela hukoomat karay. yahoodaah kay khaandaanon men say us nay meray baap kay khaandaan ko chun liya, aur isee khaandaan men say us nay mujhay pasand karkay pooray israaeel ka baadshaah bana diya. ⁵rabb nay mujhay bahut betay ata kiay hain. un men say us nay muqarrar kiya ki sulemaan meray baad takht par baith kar rabb kee ummat par hukoomat karay. ⁶rabb nay mujhay bataaya, ‘tera beta sulemaan hee mera ghar aur us kay sahen taameer karega. kyoonki main nay usay chun kar farmaaya hai ki vah mera beta hoga aur main us ka baap hoonga. ⁷agar vah aaj kee tarah aainda bhee meray ahkaam aur hidaayaat par amal karta rahay to main us kee baadshaahee abad tak qaaim rakhoonga.’

⁸ab meree hidaayat par dhyaan den, poora israaeel yaanee rabb kee jamaaat aur hamaara khuda is kay gavaah hain. rabb apnay khuda kay tamaam ahkaam kay taabay rahen! phir aainda bhee yah achchha mulk aap kee milkiyat aur hamesha tak aap kee aulaad kee mauroosee zameen rahega. ⁹ai sulemaan meray betay, apnay baap kay khuda ko tasleem karkay pooray dil-o-jaan aur khushee say us kee khidmat karen. kyoonki rabb tamaam dilon kee tahqeeq kar leta hai, aur vah hamaaray khayaalon kay tamaam mansoobon say vaaqif hai. us kay taalib rahen to aap usay pa lengay. lekin agar aap usay tark karen to vah aap ko hamesha kay liyay radd kar dega. ¹⁰yaad rahay, rabb nay aap ko is liyay chun liya hai ki aap us kay liyay muqaddas ghar taameer karen. mazboot rah kar is kaam men lagay rahen!”

rabb kay ghar ka naqshaa

¹¹phir daaood nay apnay betay sulemaan ko rabb kay ghar ka naqsha day diya jis men tamaam tafseelaat darj theen yaanee us kay baraamday, khazaanon kay kamray, baalaakhaanay, androonee kamray, vah muqaddastareen kamra jis men ahd kay sandooq ko us kay kaffaaray kay dhaknay samet rakhna tha, ¹²rabb kay ghar kay sahen, us kay ird-gird kay kamray aur vah kamray jin men rabb kay liyay makhsoos kiay gaay saamaan ko mahfooz rakhna tha.

daaood nay rooh kee hidaayat say yah poora naqsha tayyaar kiya tha. ¹³us nay rabb kay ghar kee khidmat kay liyay darkaar imaamon aur laaviyon kay gurohon ko bhee muqarrar kiya, aur saath saath rabb kay ghar men baaqee tamaam zimmaadaariyaan bhee. is kay ilaava us nay rabb kay ghar kee khidmat kay liyay darkaar tamaam saamaan kee faherist bhee tayyaar kee thee. ¹⁴us nay muqarrar kiya ki mukhtalif cheezon kay liyay kitna sona aur kitnee chaandee istemaal karnee hai. in men zail kee cheezen shaamil theen : ¹⁵sonay aur chaandee kay charaaghadaan aur un kay charaagh (mukhtalif charaaghadaanon kay vazan farq thay, kyoonki har ek ka vazan us kay maqsad par munhasir tha), ¹⁶sonay kee vah mezen jin par rabb kay liyay makhsoos rotiyaan rakhnee theen, chaandee kee mezen, ¹⁷khaalis sonay kay kaantay, chhidkaao kay katoray aur suraahee, sonay-chaandee kay piyaale ¹⁸aur bakhoor jalaanay kee qurbaangaah par mandha hua khaalis sona. daaood nay rabb kay rath ka naqsha bhee sulemaan kay havaalay kar diya, yaanee un karoobee farishton ka naqsha jo apnay paron ko phaila kar rabb kay ahd kay sandooq ko dhaamp detay hain.

¹⁹daaood nay kaha, “main nay yah tamaam tafseelaat vaisay hee qalamband kar dee hain jaisay rabb nay mujhay hikmat aur samajh ata kee hai.”

²⁰phir vah apnay betay sulemaan say mukhaatib hua, “mazboot aur diler hon! daren mat aur himmat mat haarna, kyoonki rabb khuda mera khuda aap kay saath hai. na vah aap ko chhodega, na tark karega balki rabb kay ghar kee takmeel tak aap kee madad karta rahega. ²¹khidmat kay liyay muqarrar imaamon aur laaviyon kay guroh bhee aap ka sahaara ban kar rabb kay ghar men apnee khidmat sar’anjaam dengay. taameer kay liyay jitnay bhee maahir kaareegaron kee zaroorat hai vah khidmat kay liyay tayyaar khaday hain. buzurgon say lay kar aam logon tak sab aap kee har hidaayat kee taameel karnay kay liyay mustaid hain.”