1 Tavaareekh 29
rabb kay ghar kee taameer kay liyay nazraane
1phir daaood dubaara pooree jamaaat say mukhaatib hua, “allaah nay meray betay sulemaan ko chun kar muqarrar kiya hai ki vah agla baadshaah banay. lekin vah abhee javaan aur naatajaribaakaar hai, aur yah taameeree kaam bahut vasee hai. usay to yah mahel insaan kay liyay naheen banaana hai balki rabb hamaaray khuda kay liyay. 2main pooree jaanfishaanee say apnay khuda kay ghar kee taameer kay liyay saamaan jama kar chuka hoon. is men sona-chaandee, peetal, loha, lakdee, aqeeq-ay-ahmar [a] charanelian , mukhtalif jaday huay javaahir aur pachcheekaaree kay mukhtalif patthar badee miqdaar men shaamil hain. 3aur choonki mujh men apnay khuda ka ghar banaanay kay liyay bojh hai is liyay main nay in cheezon kay ilaava apnay zaatee khazaanon say bhee sona aur chaandee dee hai 4yaanee taqreeban 1,00,000 kilograam khaalis sona aur 235 kilograam khaalis chaandee. main chaahata hoon ki yah kamron kee deevaaron par chadhaaee jaaay. 5kuchh kaareegaron kay baaqee kaamon kay liyay bhee istemaal ho sakta hai. ab main aap say poochhta hoon, aaj kaun meree tarah khushee say rabb kay kaam kay liyay kuchh denay ko tayyaar hai?”
6yah sun kar vahaan haazir khaandaanee sarparaston, qabeelon kay buzurgon, hazaar hazaar aur sau sau faujiyon par muqarrar afsaron aur baadshaah kay aala sarkaaree afsaron nay khushee say kaam kay liyay hadiay diay. 7us din rabb kay ghar kay liyay taqreeban 1,70,000 kilograam sona, sonay kay 10,000 sikkay, 3,40,000 kilograam chaandee, 6,10,000 kilograam peetal aur 34,00,000 kilograam loha jama hua. 8jis kay paas javaahir thay us nay unhen yaheeel jairsonee kay havaalay kar diya jo khazaanchee tha aur jis nay unhen rabb kay ghar kay khazaanay men mahfooz kar liya. 9pooree qaum is faraakhdilee ko dekh kar khush huee, kyoonki sab nay dilee khushee aur fayyaazee say apnay hadiay rabb ko pesh kiay. daaood baadshaah bhee nihaayat khush hua.
daaood kee duaa
10is kay baad daaood nay pooree jamaaat kay saamnay rabb kee tamjeed karkay kaha,
“ai rabb hamaaray baap israaeel kay khuda, azal say abad tak teree hamd ho. 11ai rabb, azmat, qudrat, jalaal aur shaan-o-shaukat teray hee hain, kyoonki jo kuchh bhee aasmaan aur zameen men hai vah tera hee hai. ai rabb, saltanat teray haath men hai, aur too tamaam cheezon par sarfaraaz hai. 12daulat aur izzat tujh say miltee hai, aur too sab par hukmaraan hai. teray haath men taaqat aur qudrat hai, aur har insaan ko too hee taaqatvar aur mazboot bana sakta hai. 13ai hamaaray khuda, yah dekh kar ham teree sitaaish aur teray jalaalee naam kee taareef kartay hain.
14meree aur meree qaum kee kya haisiyat hai ki ham itnee fayyaazee say yah cheezen day sakay? aakhir hamaaree tamaam milkiyat teree taraf say hai. jo kuchh bhee ham nay tujhay day diya vah hamen teray haath say mila hai. 15apnay baapdaada kee tarah ham bhee teray nazdeek pardesee aur ghairshaheree hain. duniya men hamaaree zindagee saay kee tarah aarizee hai, aur maut say bachnay kee koee ummeed naheen. 16ai rabb hamaaray khuda, ham nay yah saara taameeree saamaan is liyay ikattha kiya hai ki teray muqaddas naam kay liyay ghar banaaya jaaay. lekin haqeeqat men yah sab kuchh pahelay say teray haath say haasil hua hai. yah pahelay say tera hee hai. 17ai meray khuda, main jaanta hoon ki too insaan ka dil jaanch leta hai, ki diyaanatdaaree tujhay pasand hai. jo kuchh bhee main nay diya hai vah main nay khushee say aur achchhee neeyat say diya hai. ab mujhay yah dekh kar khushee hai ki yahaan haazir teree qaum nay bhee itnee fayyaazee say tujhay hadiay diay hain.
18ai rabb hamaaray baapdaada ibraaheem, ishaaq aur israaeel kay khuda, guzaarish hai ki too hamesha tak apnee qaum kay dilon men aisee hee tadap qaaim rakh. ata kar ki un kay dil teray saath liptay rahen. 19meray betay sulemaan kee bhee madad kar taaki vah pooray dil-o-jaan say teray ahkaam aur hidaayaat par amal karay aur us mahel ko takmeel tak pahuncha sakay jis kay liyay main nay tayyaariyaan kee hain.”
20phir daaood nay pooree jamaaat say kaha, “aaen, rabb apnay khuda kee sitaaish karen!” chunaanchay sab rabb apnay baapdaada kay khuda kee tamjeed karkay rabb aur baadshaah kay saamnay munh kay bal jhuk gaay.
21aglay din tamaam israaeel kay liyay bhasm honay vaalee bahut see qurbaaniyaan un kee mai kee nazron samet rabb ko pesh kee gaeen. is kay liyay 1,000 javaan bailon, 1,000 mendhon aur 1,000 bhed kay bachchon ko chadhaaya gaya. saath saath zabah kee beshumaar qurbaaniyaan bhee pesh kee gaeen. 22us din unhon nay rabb kay huzoor khaatay-peetay huay badee khushee manaaee. phir unhon nay dubaara is kee tasdeeq kee ki daaood ka beta sulemaan hamaara baadshaah hai. tel say usay masah karkay unhon nay usay rabb kay huzoor baadshaah aur sadoq ko imaam qaraar diya.
sulemaan kee zabardast hukoomat
23yoon sulemaan apnay baap daaood kee jagah rabb kay takht par baith gaya. usay kaamyaabee haasil huee, aur tamaam israaeel us kay taabay raha. 24tamaam aala afsar, baday baday faujee aur daaood kay baaqee beton nay bhee apnee taabedaaree ka izhaar kiya. 25israaeel kay dekhtay dekhtay rabb nay sulemaan ko bahut sarfaraaz kiya. us nay us kee saltanat ko aisee shaan-o-shaukat say navaaza jo maazee men israaeel kay kisee bhee baadshaah ko haasil naheen huee thee.
daaood kee vafaat
26-27 daaood bin yassee kul 40 saal tak israaeel ka baadshaah raha, 7 saal habroon men aur 33 saal yarooshalam men. 28vah bahut umrraseeda aur umr, daulat aur izzat say aasooda ho kar intiqaal kar gaya. phir sulemaan takhtnasheen hua.
29baaqee jo kuchh daaood kee hukoomat kay dauraan hua vah teenon kitaabon ‘samooel ghaibbeen kee taareekh,’ ‘naatan nabee kee taareekh’ aur ‘jaad ghaibbeen kee taareekh’ men darj hai. 30in men us kee hukoomat aur asar-o-rasookh kee tafseelaat bayaan kee gaee hain, neez vah kuchh jo us kay saath, israaeel kay saath aur gird-o-navaah kay mamaalik kay saath hua.