1 Salaateen 10

saba kee malika sulemaan say miltee hai

¹sulemaan kee shuharat saba kee malika tak pahunch gaee. jab us nay us kay baaray men suna aur yah bhee ki us nay rabb kay naam kay liyay kya kuchh kiya hai to vah sulemaan say milnay kay liyay ravaana huee taaki usay mushkil paheliyaan pesh karkay us kee daanishmandee jaanch lay. ²vah nihaayat baday qaafilay kay saath yarooshalam pahunchee jis kay oont balsaan, kasrat kay sonay aur qeemtee javaahir say laday huay thay.

malika kee sulemaan say mulaaqaat huee to us nay us say vah tamaam mushkil savaalaat poochhay jo us kay zahen men thay. ³sulemaan us kay har savaal ka javaab day saka. koee bhee baat itnee pecheeda naheen thee ki baadshaah us ka matlab malika ko bata na sakta. ⁴saba kee malika sulemaan kee vasee hikmat aur us kay naay mahel say bahut mut’assir huee. ⁵us nay baadshaah kee mezon par kay mukhtalif khaanay dekhay aur yah ki us kay afsar kis tarteeb say us par bithaaay jaatay thay. us nay bairon kee khidmat, un kee shaandaar vardiyon aur saaqiyon par bhee ghaur kiya. jab us nay in baaton kay ilaava bhasm honay vaalee vah qurbaaniyaan bhee dekheen jo sulemaan rabb kay ghar men chadhaata tha to malika hakka-bakka rah gaee.

⁶vah bol uthee, “vaaqaee, jo kuchh main nay apnay mulk men aap kay shaahakaaron aur hikmat kay baaray men suna tha vah durust hai. ⁷jab tak main nay khud a kar yah sab kuchh apnee aankhon say na dekha mujhay yaqeen naheen aata tha. balki haqeeqat men mujhay aap kay baaray men aadha bhee naheen bataaya gaya tha. aap kee hikmat aur daulat un riporton say kaheen ziyaada hai jo mujh tak pahunchee theen. ⁸aap kay log kitnay mubaarak hain! aap kay afsar kitnay mubaarak hain jo musalsal aap kay saamnay khaday rahetay aur aap kee daanish bharee baaten suntay hain! ⁹rabb aap kay khuda kee tamjeed ho jis nay aap ko pasand karkay israaeel kay takht par bithaaya hai. rabb israaeel say abdee muhabbat rakhta hai, isee liyay us nay aap ko baadshaah bana diya hai taaki insaaf aur raastbaazee qaaim rakhen.”

¹⁰phir malika nay sulemaan ko taqreeban 4,000 kilograam sona, bahut ziyaada balsaan aur javaahir diay. baad men kabhee bhee utna balsaan israaeel men naheen laaya gaya jitna us vaqt saba kee malika laaee.

¹¹heeraam kay jahaaz ofeer say na sirf sona laaay balki unhon nay qeemtee lakdee aur javaahir bhee badee miqdaar men israaeel tak pahunchaaay. ¹²jitnee qeemtee lakdee un dinon men dar’aamad huee utnee aaj tak kabhee yahoodaah men naheen laaee gaee. is lakdee say baadshaah nay rabb kay ghar aur apnay mahel kay liyay kataheray banvaaay. yah mooseeqaaron kay sarod aur sitaar banaanay kay liyay bhee istemaal huee.

¹³sulemaan baadshaah nay apnee taraf say saba kee malika ko bahut say tuhfay diay. neez, jo kuchh bhee malika chaahatee thee ya us nay maanga vah usay diya gaya. phir vah apnay naukar-chaakron aur afsaron kay hamraah apnay vatan vaapas chalee gaee.

sulemaan kee daulat aur shuharat

¹⁴jo sona sulemaan ko saalaana milta tha us ka vazan taqreeban 23,000 kilograam tha. ¹⁵is men vah taiks shaamil naheen thay jo usay saudaagaron, taajiron, arab baadshaahon aur zilaon kay afsaron say miltay thay.

^16-17 sulemaan baadshaah nay 200 badee aur 300 chhotee dhaalen banvaaeen. un par sona mandha gaya. har badee dhaal kay liyay taqreeban 7 kilograam sona istemaal hua aur har chhotee dhaal kay liyay taqreeban saadhay 3 kilograam. sulemaan nay unhen ‘lubnaan ka jangal’ naamee mahel men mahfooz rakha.

¹⁸in kay ilaava baadshaah nay haatheedaant say aaraasta ek bada takht banvaaya jis par khaalis sona chadhaaya gaya. ^19-20 takht kee pusht ka oopar ka hissa gol tha, aur us kay har baazoo kay saath sherbabar ka mujassma tha. takht kuchh ooncha tha, aur baadshaah chhah paaay vaalee seedhee par chadh kar us par baithta tha. daaeen aur baaeen taraf har paaay par sherbabar ka mujassma tha. is qism ka takht kisee aur saltanat men naheen paaya jaata tha.

²¹sulemaan kay tamaam piyaalay sonay kay thay, balki ‘lubnaan ka jangal’ naamee mahel men tamaam bartan khaalis sonay kay thay. koee bhee cheez chaandee kee naheen thee, kyoonki sulemaan kay zamaanay men chaandee kee koee qadar naheen thee. ²²baadshaah kay apnay baheree jahaaz thay jo heeraam kay jahaazon kay saath mil kar mukhtalif jagahon par jaatay thay. har teen saal kay baad vah sonay-chaandee, haatheedaant, bandaron aur moron say laday huay vaapas aatay thay.

²³sulemaan kee daulat aur hikmat duniya kay tamaam baadshaahon say kaheen ziyaada thee. ²⁴pooree duniya us say milnay kee koshish kartee rahee taaki vah hikmat sun lay jo allaah nay us kay dil men daal dee thee. ²⁵saal-ba-saal jo bhee sulemaan kay darbaar men aata vah koee na koee tuhfa laata. yoon usay sonay-chaandee kay bartan, qeemtee libaas, hathiyaar, balsaan, ghoday aur khachchar miltay rahay.

²⁶sulemaan kay 1,400 rath aur 12,000 ghoday thay. kuchh us nay rathon kay liyay makhsoos kiay gaay shaheron men aur kuchh yarooshalam men apnay paas rakhay. ²⁷baadshaah kee sargarmiyon kay baais chaandee patthar jaisee aam ho gaee aur deodaar kee qeemtee lakdee yahoodaah kay maghrib kay nishebee pahaadee ilaaqay kee anjeer-toot kee sastee lakdee jaisee aam ho gaee. ²⁸baadshaah apnay ghoday misr aur kooay yaanee kilikiya say dar’aamad karta tha. us kay taajir in jagahon par ja kar unhen khareed laatay thay. ²⁹baadshaah kay rath misr say dar’aamad hotay thay. har rath kee qeemat chaandee kay 600 sikkay aur har ghoday kee qeemat chaandee kay 150 sikkay thee. sulemaan kay taajir yah ghoday bar’aamad kartay huay tamaam hittee aur araamee baadshaahon tak bhee pahunchaatay thay.