1 Salaateen 11

sulemaan rabb say door ho jaata hai

¹lekin sulemaan bahut see ghairmulkee khavaateen say muhabbat karta tha. firaaun kee betee kay ilaava us kee shaadee moaabee, ammonee, adomee, saidaanee aur hittee aurton say huee. ²in qaumon kay baaray men rabb nay israaeeliyon ko hukm diya tha, “na tum in kay gharon men jaao aur na yah tumhaaray gharon men aaen, varna yah tumhaaray dil apnay devtaaon kee taraf maail kar dengay.” to bhee sulemaan baday piyaar say apnee in beeviyon say lipta raha. ³us kee shaahee khaandaanon say taalluq rakhnay vaalee 700 beeviyaan aur 300 daashtaaen theen. in aurton nay aakhirkaar us ka dil rabb say door kar diya. ⁴jab vah boodha ho gaya to unhon nay us ka dil deegar maaboodon kee taraf maail kar diya. yoon vah budhaapay men apnay baap daaood kee tarah pooray dil say rabb ka vafaadaar na rahaa ⁵balki saidaaniyon kee devee astaaraat aur ammoniyon kay devta milkoom kee pooja karnay laga. ⁶gharaz us nay aisa kaam kiya jo rabb ko naapsand tha. vah vafaadaaree na rahee jis say us kay baap daaood nay rabb kee khidmat kee thee.

⁷yarooshalam kay mashriq men sulemaan nay ek pahaadee par do mandir banaaay, ek moaab kay ghinaunay devta kamos kay liyay aur ek ammon kay ghinaunay devta malik yaanee milkoom kay liyay. ⁸aisay mandir us nay apnee tamaam ghairmulkee beeviyon kay liyay taameer kiay taaki vah apnay devtaaon ko bakhoor aur zabah kee qurbaaniyaan pesh kar saken.

⁹rabb ko sulemaan par bada ghussa aaya, kyoonki vah israaeel kay khuda say door ho gaya tha, haalaanki rabb us par do baar zaahir hua tha. ¹⁰go us nay usay deegar maaboodon kee pooja karnay say saaf mana kiya tha to bhee sulemaan nay us ka hukm na maana. ¹¹is liyay rabb nay us say kaha, “choonki too meray ahd aur ahkaam kay mutaabiq zindagee naheen guzaarta, is liyay main baadshaahee ko tujh say chheen kar teray kisee afsar ko doonga. yah baat yaqeenee hai. ¹²lekin teray baap daaood kee khaatir main yah teray jeetay jee naheen karoonga balki baadshaahee ko teray betay hee say chheenoonga. ¹³aur main pooree mamlakat us kay haath say naheen loonga balki apnay khaadim daaood aur apnay chunay huay shaher yarooshalam kee khaatir us kay liyay ek qabeela chhod doonga.”

sulemaan kay dushman hadad aur razoon

¹⁴phir rabb nay adom kay shaahee khaandaan men say ek aadmee banaam hadad ko barpa kiya jo sulemaan ka sakht mukhaalif ban gaya. ¹⁵vah yoon sulemaan ka dushman ban gaya ki chand saal pahelay jab daaood nay adom ko shikast dee to us ka faujee kamaandar yoaab maidaan-ay-jang men padee tamaam israaeelee laashon ko dafnaanay kay liyay adom aaya. jahaan bhee gaya vahaan us nay har adomee mard ko maar daala. ¹⁶vah chhah maah tak apnay faujiyon kay saath har jagah phira aur tamaam adomee mardon ko maarta gaya. ¹⁷hadad us vaqt bach gaya aur apnay baap kay chand ek sarkaaree afsaron kay saath faraar ho kar misr men panaah lay saka.

¹⁸raastay men unhen dasht-ay-faaraan kay mulk-ay-midiyaan say guzarna pada. vahaan vah mazeed kuchh aadmiyon ko jama kar sakay aur safar kartay kartay misr pahunch gaay. hadad misr kay baadshaah firaaun kay paas gaya to us nay usay ghar, kuchh zameen aur khuraak muhayya kee. ¹⁹hadad firaaun ko itna pasand aaya ki us nay us kee shaadee apnee beevee malika tahfanees kee bahen kay saath karaaee. ²⁰is bahen kay beta paida hua jis ka naam janoobat rakha gaya. tahfanees nay usay shaahee mahel men paala jahaan vah firaaun kay beton kay saath parvaan chadha.

²¹ek din hadad ko khabar milee ki daaood aur us ka kamaandar yoaab faut ho gaay hain. tab us nay firaaun say ijaazat maangee, “main apnay mulk laut jaana chaahata hoon, baraah-ay-karam mujhay jaanay den.” ²²firaaun nay etiraaz kiya, “yahaan kya kamee hai ki tum apnay mulk vaapas jaana chaahatay ho?” hadad nay javaab diya, “main kisee bhee cheez say maheroom naheen raha, lekin phir bhee mujhay jaanay deejiay.”

²³allaah nay ek aur aadmee ko bhee sulemaan kay khilaaf barpa kiya. us ka naam razoon bin ilyada tha. pahelay vah zobaah kay baadshaah hadad’azar kee khidmat anjaam deta tha, lekin ek din us nay apnay maalik say bhaag kar ²⁴kuchh aadmiyon ko apnay gird jama kiya aur daakuon kay jathay ka sarghana ban gaya. jab daaood nay zobaah ko shikast day dee to razoon apnay aadmiyon kay saath damishq gaya aur vahaan aabaad ho kar apnee hukoomat qaaim kar lee. ²⁵hotay hotay vah pooray shaam ka hukmaraan ban gaya. vah israaeeliyon say nafrat karta tha aur sulemaan kay jeetay jee israaeel ka khaas dushman bana raha. hadad kee tarah vah bhee israaeel ko tang karta raha.

yarubiaam aur akhiyaah nabee

²⁶sulemaan ka ek sarkaaree afsar bhee us kay khilaaf uth khada hua. us ka naam yarubiaam bin nabaat tha, aur vah ifraaeem kay shaher sareeda ka tha. us kee maan sarooa beva thee. ²⁷jab yarubiaam baaghee hua to un dinon men sulemaan ird-gird kay chabootray aur faseel ka aakhiree hissa taameer kar raha tha. ²⁸us nay dekha ki yarubiaam maahir aur mehanatee javaan hai, is liyay us nay usay ifraaeem aur manassee kay qabeelon kay tamaam begaar men kaam karnay vaalon par muqarrar kiya.

²⁹ek din yarubiaam shaher say nikal raha tha to us kee mulaaqaat saila kay nabee akhiyaah say huee. akhiyaah naee chaadar odhay phir raha tha. khulay maidaan men jahaan koee aur nazar na aayaa ³⁰akhiyaah nay apnee chaadar ko pakad kar baarah tukdon men phaad liyaa ³¹aur yarubiaam say kaha,

“chaadar kay das tukday apnay paas rakhen! kyoonki rabb israaeel ka khuda farmaata hai, is vaqt main israaeel kee baadshaahee ko sulemaan say chheennay vaala hoon. jab aisa hoga to main us kay das qabeelay teray havaalay kar doonga. ³²ek hee qabeela us kay paas rahega, aur yah bhee sirf us kay baap daaood aur us shaher kee khaatir jisay main nay tamaam qabeelon men say chun liya hai. ³³is tarah main sulemaan ko saza doonga, kyoonki vah aur us kay log mujhay tark karkay saidaaniyon kee devee astaaraat kee, moaabiyon kay devta kamos kee aur ammoniyon kay devta milkoom kee pooja karnay lagay hain. vah meree raahon par naheen chaltay balki vahee kuchh kartay hain jo mujhay bilkul naapsand hai. jis tarah daaood meray ahkaam aur hidaayaat kee pairvee karta tha us tarah us ka beta naheen karta.

³⁴lekin main is vaqt pooree baadshaahee sulemaan kay haath say naheen chheenoonga. apnay khaadim daaood kee khaatir jisay main nay chun liya aur jo meray ahkaam aur hidaayaat kay taabay raha main sulemaan kay jeetay jee yah naheen karoonga. vah khud baadshaah rahega, ³⁵lekin us kay betay say main baadshaahee chheen kar das qabeelay teray havaalay kar doonga. ³⁶sirf ek qabeela sulemaan kay betay kay sapurd rahega taaki meray khaadim daaood ka charaagh hamesha meray huzoor yarooshalam men jalta rahay, us shaher men jo main nay apnay naam kee sukoonat kay liyay chun liya hai. ³⁷lekin tujhay, ai yarubiaam, main israaeel par baadshaah bana doonga. jo kuchh bhee tera jee chaahata hai us par too hukoomat karega. ³⁸us vaqt agar too meray khaadim daaood kee tarah meree har baat maanega, meree raahon par chalega aur meray ahkaam aur hidaayaat kay taabay rah kar vah kuchh karega jo mujhay pasand hai to phir main teray saath rahoonga. phir main tera shaahee khaandaan utna hee qaaim-o-daaim kar doonga jitna main nay daaood ka kiya hai, aur israaeel teray hee havaalay rahega.

³⁹yoon main sulemaan kay gunaah kay baais daaood kee aulaad ko saza doonga, agarchi yah abdee saza naheen hogee.”

⁴⁰is kay baad sulemaan nay yarubiaam ko marvaanay kee koshish kee, lekin yarubiaam nay faraar ho kar misr kay baadshaah seesaq kay paas panaah lee. vahaan vah sulemaan kee maut tak raha.

sulemaan kee maut

⁴¹sulemaan kee zindagee aur hikmat kay baaray men mazeed baaten ‘sulemaan kay aamaal’ kee kitaab men bayaan kee gaee hain. ⁴²sulemaan 40 saal pooray israaeel par hukoomat karta raha. us ka daar-ul-hakoomat yarooshalam tha. ⁴³jab vah mar kar apnay baapdaada say ja mila to usay yarooshalam kay us hissay men dafan kiya gaya jo ‘daaood ka shaher’ kahelaata hai. phir us ka beta rahubiaam takhtnasheen hua.